http://mukkiaseidhigal.blogspot.com/2010/01/blog-post_4057.html

ஆலந்தூர் தாடி ராமசாமி கோவில் தெருவைச் சேர்ந்தவர் ரமாதேவி (வயது 27). பட்டதாரி பெண்ணான இவர் புறநகர் போலீஸ் கமிஷனர் ஜாங்கிட்டிடம் ஒரு புகார் மனு கொடுத்தார்.

அதில் கூறி இருப்பதாவது:-

எனக்கும் திருச்சியை சேர்ந்த பிரபாகர் என்பவருக்கும் கடந்த செப்டம்பர் மாதம் 3-ந்தேதி திருமணம் நடந்தது. திருமணத்தின்போது எனது பெற்றோர் 70 பவுன் நகையும், 3 கிலோ வெள்ளிப் பொருட்களையும் வரதட்சணையாக கொடுத்தனர். திருமணம் முடிந்து திருச்சியில் இருந்தபோது எனது மாமியார் நகைகளை வாங்கிக் கொண்டார்.

அதன் பிறகு கணவருடன் சென்னை ஆலந்தூரில் வசித்து வந்தேன். என் கணவர் தனியார் நிறுவனத்தில் கம்ப்யூட்டர் என்ஜினீயராக வேலை பார்த்து வந்தார்.

இந்த நிலையில் என் கணவரின் தங்கை கணவருக்கு பண நெருக்கடி ஏற்பட்டது. எனவே என்னிடம் கூடுதல் வரதட்சணை பணம் கேட்டு கணவர் மற்றும் அவரது வீட்டார் சித்ரவதை செய்தனர். என் கணவரின் தம்பி என்னிடம் பணம் கேட்டு மிரட்டினார். என்னை பட்டினி போட்டு சித்ரவதை செய்தனர்.

திருச்சியில் கணவர் வீட்டார் ஷாப்பிங் காம்ப்ளக்ஸ் கட்டி வருகிறார்கள். அதற்காக எனது வீட்டில் சென்று ரூ.3 லட்சம் பணம் வாங்கி வருமாறு கூறினார்கள். நான் மறுக்கவே என்னை கணவர் எனது தாய் வீட்டில் கொண்டு விட்டுவிட்டார். ரூ.3 லட்சம் பணத்துடன் வந்தால் குடும்பம் நடத்தலாம். இல்லாவிட்டால் அங்கேயே இருந்து விடு என்கிறார்கள். எனது கணவரின் நண்பர்களும் எனக்கு போன் செய்து கேலி கிண்டல் செய்கிறார்கள்.

என்னை சித்ரவதை செய்யும் எனது கணவர் பிரபாகர், அவரது தந்தை ஏழுமலை, தாய் பானுமதி, தம்பி நந்தகுமார், தங்கை கவிதா, அவரது கணவர் லோகநாதன், உறவினர் கிருஷ்ணவேணி ஆகியோர் மீது நடவடிக்கை எடுக்க வேண்டும்.

இவ்வாறு புகார் மனுவில் கூறி இருந்தார்.
இந்த மனு மீது விசாரித்து நடவடிக்கை எடுக்க பரங்கிமலை மகளிர் போலீசுக்கு புறநகர் கமிஷனர் ஜாங்கிட் உத்தரவிட்டார். இது தொடர்பாக இன்ஸ்பெக்டர் மல்லிகா, சப்- இன்ஸ்பெக்டர் ரஜினி ஆகியோர் வழக்குப்பதிவு செய்து ரமாதேவியின் கணவர் பிரபாகரை கைது செய்தனர். மற்றவர்களை தேடிவருகிறார்கள்.

மாஜி 'தாய்' வழக்கால் தத்து மகன் அச்சம்

மும்பை: பத்து ஆண்டுக்கு மேல் விலகி இருந்த மாஜி மனைவி, திடீரென மகன் மீது உரிமை கோரி கோர்ட்டுக்கு சென்றாள். தத்து கொடுக்கப்பட்ட மகன் நிலை இப்போது கேள்விக்குறியாக உள்ளது.
மகாராஷ்டிர மாநிலம் மும்பையை சேர்ந்தவர் ராகேஷ் மேத்தா. இவரது மகன் கரண் மேத்தா(12). இச்சிறுவனை, அவரது உறவினர், திரண் என்பவருக்கு ராகேஷ் தத்து கொடுத்தார்; இதை அவரின் மாஜி மனைவி எதிர்த்து உள்ளார். "அவருக்கு மகன் மீது அன்பில்லை என்ற அடிப்படையில், கரண் மேத்தாவை, அவரின் முன்னாள் மனைவி மீத்தாவிடம் ஒப்படைக்க வேண்டும்' என்று குடும்ப நலக் கோர்ட் நீதிபதி, வி.ஜே.லோகியா உத்தரவிட்டார். அதற்கு, ராகேஷ் ஐகோர்ட்டில் தடை உத்தரவு பெற்றதோடு, மேல் முறையீடும் செய்துள்ளார்.ராகேஷ் தனது மனுவில் கூறியிருப்பதாவது:
கரணின் ஒன்றரை வயதிலேயே அவன் தாய், அவனை விட்டு சென்று விட்டார். அதன் பின், 2006ம் ஆண்டு, இருவரும், விவாகரத்து பெற்றோம். 2007ம் ஆண்டு, மறுமணம் செய்து கொண்டேன். மீத்தா, கடந்தாண்டு, குடும்ப நலக் கோர்ட்டில் கரணை தன்னிடம் ஒப்படைக்க கோரி மனு தாக்கல் செய்யும் வரை, அவனை சந்திக்கவில்லை. அதன், பின், கரணை தன்வசம் இழுக்க, அவனை ஐந்து முறை சந்தித்துள்ளார். ஆனால், கரண் மீத்தாவிடம் பேச மறுத்துள்ளான். கரணின் நல்வாழ்விற்காகவே, குழந்தைகள் இல்லாத தம்பதியருக்கு, அவனை தத்து கொடுத்தேன். அவர்கள் தங்கள் சொத்தை கரணுக்கு முறைப்படி வழங்குவதற்காக, இத்தகைய ஏற்பாட்டை செய்தனர். மேலும், கரண் என் இரண்டாவது மனைவியுடன் சந்தோஷமாக உள்ளான். எனவே, கரணை என்னுடன் இருக்க அனுமதிக்க வேண்டும். இவ்வாறு அந்த மனுவில் கூறப்பட்டுள்ளது.

Source: http://www.dinamalar.com

இ-மெயிலில் கணவனின் பொய் அம்பலம்: மனைவிக்கு ஜீவனாம்ச தொகை அதிகரிப்பு

மும்பை: "மாதம் எட்டாயிரம் ரூபாய் மட்டுமே சம்பளம்' என்று பொய் சொன்ன கோடீஸ்வர கணவனின் உண்மையான சொத்து விவரத்தை அவரது இ-மெயில் மூலம் கோர்ட்டில் வெளிப்படுத்தியுள்ளார் மனைவி.
மும்பை பாந்த்ரா பகுதியைச் சேர்ந்தவர்கள் ராஜேஷ்-ரீமா தம்பதியினர். இவர்களுக்கு 2005ல் திருமணம் நடந்தது. இவர்களுக்கு மூன்று வயதில் ஒரு மகள் இருக்கிறாள். ராஜேஷ் "இம்பீரியல் அகடமி' என்ற கார்கள் ஏற்றுமதி நிறுவன உரிமையாளர். இவரது வருமானம் மாதம் 15 லட்ச ரூபாய். இந்தூர், மும்பை, டில்லி, துபாயில் பங்களாக்கள் இவருக்கு உண்டு. மகளின் மூன்றாவது வயதில் ரீமா, விவாகரத்து கோரி, வழக்கு தொடுத்தார்.
கோர்ட் இருவரது சம்மதத்தையும் பெற்று ஜீவனாம்சமாக, மாதம் 12 ஆயிரம் ரூபாய் ராஜேஷ் அளிக்க வேண்டும் என்று உத்தரவிட்டது. இதை மறுத்து ராஜேஷ், தான் மாதம் எட்டாயிரம் மட்டுமே சம்பளம் வாங்குவதாகவும், ரீமாவுக்கு இரண்டாயிரம் தான் தரமுடியும் என்றும் வாதாடினார். இதைக் கேட்டு அதிர்ந்து போன ரீமா, தன் முன்னாள் கணவர் கோடீஸ்வரர் என்ற உண்மையை அவரது இ-மெயில் ஐ.டி., மூலம் கோர்ட்டில் நிரூபித்தார்.
ராஜேஷ் தன் இ-மெயில் ஐ.டி.,யில்,"நான் துபாய்க்கு கார்கள் ஏற்றுமதி செய்யும் நிறுவனம் நடத்துகிறேன்; இந்தூர் உள்ளிட்ட நான்கு நகரங்களில் வீடுகள் உள்ளன' என்ற தகவல்களைக் கொடுத்திருந்தார். அதோடு ரீமா, 2005-06ல் ராஜேஷ் 12 லட்ச ரூபாய் வரை வரி கட்டிய சான்றையும் சமர்ப்பித்தார்.வழக்கை விசாரித்த நீதிபதிகள் பி.வி. மஜும்தார், ஆர்.வி.மோர் தங்களது தீர்ப்பில்,"ராஜேஷின் இ-மெயில் ஐ.டி., ஆதாரங்கள் அவர் போதுமான வருமானம் உள்ளவர் என்பதைக் காட்டுகின்றன.
மேலும், அவர் துபாய்க்கு விமானப் பயணம் அடிக்கடி மேற் கொண்டதும் இதை நிரூபிக்கின்றது. தவறான தகவல்களைத் தந்து அதன் மூலம் மனைவி மற்றும் மகளுக்குத் தரவேண்டிய ஜீவனாம்சத்தை குறைக்க முற்பட்டுள்ளார். இனி அவர் மாதம் 30 ஆயிரம் ரூபாய் மனைவிக்குக் கொடுக்க வேண்டும். மனைவி சீதனமாகக் கொண்டுவந்த 168 கிராம் தங்கநகைகளையும் திருப்பியளிக்க வேண்டும்,' என்று உத்தரவிட்டுள்ளனர்.

source: http://www.dinamalar.com/