அசாருதீனுடன் தொடர்பு: பேட்மின்டன் வீராங்கனை ஜூவாலா விவாகரத்து கேட்டு மனு

இந்திய கிரிக்கெட் அணியின் முன்னாள் கேப்டன் அசாருதீன் மேட்ச் பிக்சிங்கில் (சூதாட்டம்) ஈடுபட்டதால் இவருக்கு கடந்த 2000-ம் ஆண்டு ஆயுட்கால தடை விதிக்கப்பட்டது. அவர்தற்போது காங்கிரசில் சேர்ந்து எம்.பி. ஆகிஇருக்கிறார்.

 

அசாருதீன் தனது முதல்- மனைவி நஸ்ரினை விவாகரத்து செய்து விட்டு சங்கீதா பிஜ்லானியை 2-வதாக திருமணம் செய்து இருந்தார். சுமார் 15 ஆண்டுகளுக்கு முன்பு இந்ததிருமணம் நடந்தது.

 

இதற்கிடையே அசாருதீனுக்கும், பேட்மின்டன் வீராங்கனை ஜூவாலாவுக்கும் இடையே தொடர்பு இருப்பதாக தகவல் வெளியானது. இதற்காக சங்கீதா பிஜ்லானியை அசாருதீன் விவாகரத்து செய்ய போவதாகவும் தகவல் வெளியானது. இதை இருவரும் மறுத்தனர்.

 

இந்த நிலையில் ஜூவாலா தனது கணவரும் உலகின் 13-ம் நிலை பேட்மின்டன் வீரருமான சேட்டன் ஆனந்திடம் இருந்து விவாகரத்து கேட்டு மனு தாக்கல் செய்துள்ளார்.

 

இதை ஜூவாலா உறுதி செய்துள்ளார். இதன் மூலம் அவர் அசாருதீனை திருமணம் செய்யலாம் என்று கூறப்படுகிறது.

 

இது தொடர்பாக அவர்கூறும் போது நான் விவாகரத்து கேட்டு மனு செய்து இருப்பது உண்மைதான். இதற்கு அசாருதீனுடன் உள்ள தொடர்புதான் என்று கூறப்படுகிறது வதந்தியே. நாங்கள் இருவரும் நல்ல நண்பர்கள் என்றார்.

அதிக டெஸ்ட் போட்டிகளில் விளையாடிய வீரர் : சச்சின் சாதனை

அதிக டெஸ்ட் போட்டிகளில் விளையாடிய வீரர் என்ற பெருமையை இந்திய மாஸ்டர் ‌பேட்ஸ்மேன் சச்சின் டெண்டுல்கர் பெற்றுள்ளார். இதுவரை சச்சின் 169 டெஸ்ட் போட்டிகளில் விளையாடியள்ளார். இதற்கு முன்னர் ஆஸ்திரேலிய அணி மாஜி கேப்டன் ஸ்டீவ் வாக் 168 போட்டிகளில் விளையாடி அதி டெஸ்ட் போட்டிகளில் விளையாடியவர் என்ற பெருமையை தக்க வைத்திருந்தார். சச்சின் 168 டெஸ்ட் போட்டிகளில் விளையாடி 13 ஆயிரத்து 742 ரன்கள் குவித்துள்ளார். 48 சதங்களும், 55 அரைசதங்களும் அடித்துள்ளார். ஒரு நாள் போட்டியில் 442 போட்டிகளில் விளையாடியுள்ளார். அதிகபட்சமாக ஜெயசூர்யா 444 ஒரு நாள் சர்வதே போட்டிகளில் விளையாடியுள்ளார். சச்சின் ஒரு நாள் சர்வதேச போட்டிகளில் மொத்தம் 17 ஆயிரத்து 598 ரன்கள் எடுத்துள்ளார் என்பது குறிப்பிடத்தக்கது.

பாகிஸ்தான் கிரிக்கெட் வீரர்களுக்கு ஆதரவு: ஷாருக்கான் வீட்டுமுன்பு சிவசேனா ஆர்ப்பாட்டம்

ஐ.பி.எல். 20 ஓவர் கிரிக்கெட் போட்டியில் பாகிஸ்தான் வீரர்களை யாரும் ஏலம் எடுக்கவில்லை. ஆனால் கொல்கத்தா நைட்ரைடர்ஸ் அணியின் உரிமையாளரான நடிகர் ஷாருக்கான், “பாகிஸ்தான் கிரிக்கெட் வீரர்களை அணியில் சேர்க்க ஆர்வமாக இருக்கிறேன்” என்று கூறினார்.

பாகிஸ்தான் வீரர்களுக்கு ஆதரவாக சில கருத்துக்களையும் தெரிவித்தார். இதற்கு சிவசேனா கடும் எதிர்ப்பை தெரிவித்தது. ஷாருக்கானுக்கு எதிராக போராட்டம் நடத்தப் போவதாகவும் அறிவித்தது.

இந்த நிலையில் சிவசேனா கட்சி தொண்டர்கள் மும்பை பாந்த்ரா பகுதியில் உள்ள நடிகர் ஷாருக்கான் வீட்டு முன்பு ஆர்ப்பாட்டத்தில் ஈடுபட்டனர். அப்போது, ஷாருக்கானுக்கு எதிராக கோஷமிட்டனர்.

ஷாருக்கான் மும்பையில் இருந்து பாகிஸ்தான் செல்வதற்கான மாதிரி விமான டிக்கெட்டுகளை பலர் கையில் வைத்துக்கொண்டு, “ஷாருக்கானே பாகிஸ்தானுக்கு” போ” என்று குரல் எழுப்பினார்கள். இதனால் அங்கு பெரும் பரபரப்பு ஏற்பட்டது.

ஆர்ப்பாட்டம் குறித்து சிவசேனா கட்சியினர் கூறும்போது, பாகிஸ்தான் வீரர்களுக்கு ஆதரவு தெரிவிப்பதென்றால் ஷாருக்கான் பாகிஸ்தானுக்கே போய்விடலாம். இந்தியாவில் அவருக்கு வேலை இல்லை. “கான்” என்ற பெயரில் அவர் நடித்து வெளிவர இருக்கும் படத்தை தடைசெய்ய வேண்டும்.

இது தேசப்பற்று தொடர்பான விஷயம். மும்பையில் பல ஆண்டுகளாக வசித்து வரும் ஷாருக்கான் இதுவரை மராட்டியர்களுக்கு ஆதரவாக ஒரு வார்த்தை கூட பேசியதில்லை ஆனால் பாகிஸ்தான்காரர்களை ஆதரித்து பேசுகிறார்” என்று குற்றம்சாட்டினார்கள்.

மும்பை நகரில் பல்வேறு இடங்களில் வைக்கப்பட்டிருந்த ஷாருக்கானின் பேனர்களையும் சிவசேனா கட்சியினர் கிழித்து எறிந்தனர். தீ வைத்தும் கொளுத்தினார்கள். அமீர்கானையும் சிவசேனா கட்சியினர் கடுமையாக விமர்சித்துள்ளனர். இந்த சம்பவத்தையடுத்து ஷாருக்கான் வீட்டுக்கு பலத்த போலீஸ் பாதுகாப்பு போடப்பட்டுள்ளது.

ஆஸ்திரேலிய ஓபன் கலப்பு இரட்டையரில் இந்தியாவின் லியாண்டர் பயஸ், காரா பிளாக்(ஜிம்பாப்வே) ஜோடி சாம்பியன் பட்டம் கைப்பற்றியது.

இதன் மூலம் தனது 11வது கிராண்ட்ஸ்லாம் பட்டம் பெற்ற பயஸ், சக வீரர் பூபதியின் சாதனையை சமன் செய்தார். ஆண்கள் ஒற்றையரில் சுவிட்சர்லாந்தின் ரோஜர் பெடரர், கோப்பை வென்றார்.ஆஸ்திரேலியன் ஓபன் கிராண்ட்ஸ்லாம் டென்னிஸ் தொடர் மெல்போர்னில் நடந்தது. நேற்று நடந்த கலப்பு இரட்டையர் பைனலில் இந்தியாவின் லியாண்டர் பயஸ், ஜிம்பாப்வேயின் காரா பிளாக் ஜோடி, ரஷ்யாவின் எகாடரினா, செக் குடியரசின் ஜராஸ்லோவ் ஜோடியை எதிர்கொண்டது. விறுவிறுப்பான போட்டியின் முதல் செட்டை பயஸ் ஜோடி 7-5 என கைப்பற்றியது. தொடர்ந்து அபார ஆட்டத்தை வெளிப்படுத்திய பயஸ் ஜோடி, இரண்டாவது செட்டை 6-3 என மிகச் சுலபமாக தன்வசப்படுத்தியது. இறுதியில் பயஸ்-காரா பிளாக் ஜோடி 7-5, 6-3 என்ற நேர் செட்டில் வெற்றி பெற்று, சாம்பியன் பட்டம் வென்றது.சாதனை சமன்:இதன்மூலம் பயஸ்-காரா பிளாக் ஜோடி, முதன்முறையாக ஆஸ்திரேலியன் ஓபனில் சாம்பியன் பட்டம் வென்றது. ஆஸ்திரேலியன் ஓபன் கலப்பு இரட்டையரில் பயஸ், இரண்டாவது முறையாக கோப்பை வென்றார். முன்னதாக கடந்த 2003ல் பயஸ், அமெரிக்காவின் மார்டினா நவரத்திலோவாவுடன் இணைந்து பட்டம் வென்றார். இது பயஸ் வென்ற, 11வது கிராண்ட்ஸ்லாம் பட்டம் (இரட்டையர்-6, கலப்பு இரட்டையர்-5). இதன்மூலம் அதிக கிராண்ட்ஸ்லாம் பட்டம் வென்ற இந்தியர்கள் வரிசையில், சகவீரர் மகேஷ் பூபதியின் (இரட்டையர்-4, கலப்பு இரட்டையர்-7) சாதனையை சமன் செய்தார்.வெற்றி குறித்து பயஸ் கூறுகையில், ""ஆஸ்திரேலியன் ஓபனில் பட்டம் வென்றது மகிழ்ச்சி அளிக்கிறது. இத்தொடரில் சாதிக்க, முழு ஆதரவு கொடுத்த இந்திய ரசிகர்களுக்கும், இங்கு போட்டியை காண வந்த ரசிகர்களுக்கும் எனது மனமார்ந்த நன்றியை தெரிவித்துக் கொள்கிறேன். போட்டியில் எனக்கு முழு ஒத்துழைப்பு தந்த காரா பிளாக்கிற்கும், நன்றி கூற கடமைப்பட்டுள்ளேன்,'' என்றார்.

சொகுசு காருக்கு வரி செலுத்தாததால் தெண்டுல்கருக்கு நோட்டீஸ்

உலகின் தலை சிறந்த பேட்ஸ்மேன்களில் ஒருவரான தெண்டுல்கர் பி.எம்.டபிள்யூ.எம். 5 என்ற சொகுசு காரை வாங்கி இருந்தார். இந்த காரை அவர் நவி மும்பை பகுதியில் உள்ள ஆர்.டி. 3 அலுவலகத்தில் பதிவு செய்து உள்ளார்.

ஆனால் இதற்காக அவர் ரூ. 1 லட்சம் வரியை செலுத்தாமல் இருப்பது தற்போது தெரிய வந்துள்ளது. இதை தொடர்ந்து தெண்டுல்கருக்கு மும்பை மாநகராட்சி நோட்டீஸ் அனுப்பி உள்ளது.

அதிக வருமான வரி கட்டும் விளையாட்டு வீரர் தெண்டுல்கர் ஆவார். கடைசி காலாண்டில் அவர் ரூ. 1 1/2 கோடி வருமான வரி செலுத்தி இருந்தார். அப்படிப்பட்ட அவர் தனது சொகுசு காருக்கு ரூ. 1 லட்சம் கட்டணத்தை செலுத்தாதது வியப்பாக உள்ளது.

சானியாமிர்சா திருமண நிச்சயதார்த்தம் ரத்து

இந்தியாவின் முன்னணி டென்னிஸ் வீராங்கனை சானியாமிர்சா. கிராண்ட்சிலாம் போட்டிகளில் 4-வது சுற்று வரை நுழைந்த முதல் இந்திய வீராங்கனை என்ற பெருமையை பெற்றவர்.

சானியாமிர்சாவுக்கும், நீண்டகால நண்பரான முகமது சோரப்புக்கும் இடையே கடந்த ஆண்டு ஜூலை மாதம் ஐதராபாத்தில் திருமண நிச்சயதார்த்தம் நடந்தது. திருமணத்துக்கு பிறகு டென்னிசுக்கு முழுக்கு போட்டு விடுவதாக சானியா அறிவித்து இருந்தார்.

இந்த நிலையில் சானியாவுக்கும், முகமது சோரப்புக்கும் இடையேயான திருமண நிச்சயதார்த்தம் முறிந்து விட்டதாக சானியாவின் தந்தையான இம்ரான் தெரிவித்து உள்ளார்.

இதுதொடர்பாக அவர் கூறும்போது, இரு குடும்பங்களும் 50 ஆண்டுகளாக பழகி வருகிறோம். ஜோடிகள் பிரிந்துவிட்டாலும் எங்களது நட்பு தொடரும் என்றார்.

திருமண நிச்சயதார்த்தம் ரத்து செய்யப்பட்டதற்கான காரணம் எதுவும் தெரிவிக்கப்படவில்லை. இதுகுறித்து சானியா மிர்சா கூறும்போது, 10 ஆண்டுகளுக்கு மேலாக நாங்கள் இருவரும் நல்ல நண்பர்களாக இருந்தோம். திருமண நிச்சயதார்த்தம் நடந்த பிறகு இருவரும் இணக்கமாக வாழ முடியாது என்பதை உணர்ந்தோம் என்றார்.

தற்போது நடைபெற்று வரும் ஆஸ்திரேலிய ஓபனில் சானியா மிர்சா தொடக்க சுற்றிலேயே தோல்வி அடைந்தார். கோலாம்பூரில் நடைபெறும் ஆசிய ஒசியானியா பெடரேசன் கோப்பை போட்டியில் பங்கேற்க நாளை அவர் செல்கிறார். முகமது சோரப் தற்போது இங்கிலாந்தில் பிசினஸ் மேனேஜ்மென்ட் படித்து வருகிறார்.

திருமணத்துக்கு பிறகு சானியா விளையாடுவதை சோரப் விரும்பவில்லை. இதை சானியா ஏற்றுக்கொள்ளவில்லை. இது தொடர்பாக ஏற்பட்ட கருத்து வேறுபாடால்தான் திருமணம் முறிந்ததாக இருக்கலாம் என்று தெரிகிறது.

13 வயது அணியில் கிரிக்கெட் ஆடிய தெண்டுல்கர் மகன் - ஒரு ரன் எடுத்ததற்கே இந்த கூத்தா? ஐயோ ஐயோ

ஒரு ரன் எடுத்ததற்கே இந்த கூத்தா? ஐயோ ஐயோ

13 வயது அணியில் இடம் பெற்று தெண்டுல்கர் மகன் கிரிக்கெட் ஆடினான். இந்திய நட்சத்திர கிரிக்கெட் ஆட்டக்காரர் தெண்டுல்கருக்கு சாரா என்ற மகளும், அர்ஜுன் என்ற மகனும் உள்ளனர்.

இதில் அர்ஜுனுக்கு 10 வயது ஆகிறது. தந்தையைப் போலவே தானும் கிரிக்கெட் வீரர் ஆகவேண்டும் என்ற ஆசை. எனவே தெண்டுல்கர் மகனையும் கிரிக்கெட்டில் சேர்த்து விட்டுள்ளார்.

தந்தையை போலவே அர்ஜுனும் சிறப்பாக விளையாடி வருகிறார். எனவே கிரிக்கெட் அணிகளிலும் இடம் கிடைத்து வருகிறது.

தற்போது மராட்டிய மாநிலம் புனேயில் எப்.ஐ.ஜி. கிரிக்கெட் கிளப் சார்பில் 13 வயதுக்கு உட்பட்டோருக்கான கேடன்ஸ் கோப்பை தேசிய கிரிக்கெட் போட்டி நடந்து வருகிறது. இதில் ஒரு அணியில் அர்ஜுனுக்கும் இடம் கிடைத்து உள்ளது.

போட்டியில் ஆடுவதற்காக அர்ஜுன் தனது தாயார் அஞ்சலியுடன் புனே வந்திருக்கிறார்.

அவரது அணியும், மற்றொரு அணியும் மோதிய 30 ஓவர் போட்டி நடந்தது. அர்ஜுன் தொடக்க வீரராக களம் இறங்கினார். முதல் ஓவரில் ரன் எதுவும் எடுக்கவில்லை. 2-வது ஓவரில் அர்ஜுன் தனது தந்தையின் அதே ஸ்டைலில் பந்தை லாவகமாக அடித்து ஒரு ரன் எடுத்தார்.

அடுத்து இன்னொரு பந்தை அடித்துவிட்டு ரன் எடுக்க ஓடினார். ஆனால் எதிர்முனையில் இருந்த வீரர் சரியாக ஓடாமல் குழப்பி விட்டார். இதனால் அர்ஜுன் ரன்அவுட் ஆனார். கடைசியில் அவர் அணி தோற்றுவிட்டது.

தனது அணிக்காக அதிக ரன்கள் எடுக்க முடியாமல் போய் விட்டதே என்று அர்ஜுன் வேதனை அடைந்தார். அவருக்கு தாயார் அஞ்சலி ஆறுதல் கூறி தேற்றினார்.

இந்த போட்டியில் ஆடு வதற்காக அர்ஜுன் 5 மாதமாக பயிற்சி பெற்று வந்தார். அர்ஜுன் வழக்கமாக நன்றாக ரன் எடுப்பாராம். ஆனால் இந்த போட்டியில் தான் அவர் ரன் எடுக்க முடியாமல் போய்விட்டது.

தந்தையை போல் இல்லாமல் அர்ஜுன் இடக்கை ஆட்டக்காரர். பேட்டிங்குடன் பந்துவீச்சும் நன்றாக வருகிறது. இடக்கையால் பந்து வீசுகிறார். மீடியம் வேகப்பந்து வீச்சாளராக செயல்படுகிறார்.

அர்ஜுன் 1999-ம் ஆண்டு செப்டம்பர் 24-ந் தேதி பிறந்தார். அப்போது தெண்டுல்கருக்கு விளையாட்டு வீரர்களுக்கான அர்ஜுனா விருது கிடைத்தது. எனவே மகனுக்கு அர்ஜுன் என்று பெயர் சூட்டினார்.

தெண்டுல்கர் தனது 16 வயதில் தேசிய கிரிக்கெட் அணியில் இடம் பெற்றார். அர்ஜுனும் 16 வயதில் தேசிய அணிக்கு வருவார் என்று எதிர்பார்க்கலாம்.

தொடர்ந்து 4-வது சதம்: காம்பீர் 3-வது வீரர்

கான்பூர் டெஸ்டில் தொடக்க வீரர் காம்பீர் அபாரமாக விளையாடி சதம் (167) அடித்தார். தொடர்ந்து அவர் அடித்த 4-வது சதம் ஆகும். நியூசிலாந்துக்கு எதிராக மார்ச்-ஏப்ரல் மாதங்களில் நேப்பியர் டெஸ்டில் 137 ரன்னும், வெலிங்டன் டெஸ்டில் 167 ரன்னும், அதன் தொடர்ச்சியாக கடந்த வாரம் அகமதாபாத்தில் இலங்கைக்கு எதிரான முதல் டெஸ்டில் 114 ரன்னும் எடுத்தார். தொடர்ந்து 4 சதம் அடித்த 3-வது இந்திய வீரர் காம்பீர் ஆவார். இதற்கு முன்பு கவாஸ்கர், ராகுல் டிராவிட் ஆகியோர் தொடர்ந்து 4 சதங்கள் அடித்து உள்ளனர். உலக அளவில் 13-வது வீரர் ஆவார்.

கவாஸ்கர் 1976-77 ஆண்டில் இங்கிலாந்துக்கு எதிராக 108 ரன் எடுத்தார். அதை தொடர்ந்து ஆஸ்திரேலியாவுக்கு எதிராக 113, 127 மற்றும் 118 ரன்களை முறையே எடுத்தார். ராகுல்டிராவிட் 2002-ம் ஆண்டு இங்கிலாந்துக்கு எதிராக 115, 148, 217 ரன்களையும், அதை தொடர்ந்து வெஸ்ட்இண்டீசுக்கு எதிராக 100 ரன்னையும் எடுத்தார்.

டெஸ்டில் அதிக ரன்: ஆலன் பார்டரை முந்திய டிராவிட் 4-வது இடத்தை பிடித்தார்

கான்பூர் டெஸ்டில் ராகுல் டிராவிட் அபாரமாக விளையாடி சதம் அடித்தார். 136-வது டெஸ்டில் விளையாடும் அவருக்கு இது 28-வது சதம் ஆகும். இலங்கை அணிக்கு எதிராக அடித்த 3-வது செஞ்சூரியாகும்.பிராட்மேன் (29 சதம்) சாதனையை சமன் செய்ய அவருக்கு இன்னும் ஒரு சதம் தேவை. டிராவிட் அபாரமாக விளையாடி 144 ரன்கள் குவித்தார். 137-வது ரன்னை தொட்டபோது டெஸ்டில் அதிக ரன்கள் எடுத்து 4-வது இடத்தில் இருக்கும் ஆலன் பார்டரை (ஆஸ்திரேலியா) முந்தினார்.டிராவிட் 11,182 ரன் எடுத்து 4-வது இடத்தை பிடித்தார். பார்டர் 11,174 ரன் எடுத்துள்ளார்.

காம்பீர் சூப்பர் ஸ்டார் ஷேவாக் பாராட்டு

இலங்கைக்கு எதிராக கான்பூரில் நேற்று தொடங்கிய 2-வது டெஸ்டில் ஷேவாக், காம்பீர் ஆட்டம் மிகவும் அதிரடியாக இருந்தது. காம்பீர் 215 பந்தில் 15 பவுண்டரியுடன் 167 ரன்னும், ஷேவாக் 122 பந்தில் 18 பவுண்டரி 2 சிக்சருடன் 131 ரன்னும் எடுத்தனர். டெல்லியை சேர்ந்த இருவரும் தொடக்க விக்கெட்டுக்கு 233 ரன் எடுத்தனர்.

காம்பீரின் ஆட்டத்தை ஷேவாக் பாராட்டியுள்ளார். இது தொடர்பாக அவர் கூறியதாவது:-

காம்பீர் இந்தியாவின் அடுத்த சூப்பர் ஸ்டார். கவாஸ்கருக்கு பிறகு சிறந்த தொடக்க வீரர் அவர் ஆவார். காம்பீரின் ஆட்டம் என்னை பிரமிக்க வைக்கிறது. அளவுக்கு அதிகமான திறமை அவரிடம் இருக்கிறது.

தொடர்ந்து 4 சதங்களை அடித்துள்ள அவர் அடுத்த டெஸ்டிலும் சதம் அடிப்பார். ஒவ்வொரு டெஸ்டிலும் அவரால் சதம் அடிக்க முடியும் என்று நினைக்கிறேன்.

பேட்டிங்கில் அவர் தொடர்ந்து நல்ல நிலையில் உள்ளார். பந்துகளை அடித்து ஆடுகிறார். அவரது அதிரடி ஆட்டம் எனக்கு நெருக்கடியை தந்தது.

இவ்வாறு ஷேவாக் கூறியுள்ளார்.

சூதாட்டத்தில் சிக்கிய அசாருதீன் மீதான தடை நீக்கப்படுமா?- கிரிக்கெட் வாரியம் பரிசீலனை

இந்திய கிரிக்கெட் அணியின் முன்னாள் கேப்டன் அசாருதீன்.
99 டெஸ்டில் விளையாடி 6215 ரன்னும், 334 ஒரு நாள் போட்டியில் விளையாடி 9378 ரன்னும் எடுத்துள்ளார். 1992, 1996, 1999 ஆகிய 3 உலக கோப்பை போட்டியில் கேப்டனாக பணியாற்றினார். அறிமுகமான 3 டெஸ்டிலும் சதம் அடித்து சாதனை படைத்தார்.

2000-ம் ஆண்டு தென் ஆப்பிரிக்க அணி இந்தியா வந்த போது சூதாட்ட புயல் வெடித்தது.

அப்போது அசாருதீன் சூதாட்டத்தில் ஈடுபட்டது தெரிய வந்தது. மேட்ச் பிக்சிங்கில் ஈடுபட்டதாக கூறி அசாருதீனுக்கு இந்திய கிரிக்கெட் கட்டுப்பாட்டு வாரியம் (பி.சி.சி.ஐ) ஆயுட் கால தடை விதித்தது. இதை எதிர்த்து அவர் கோர்ட்டில் வழக்கு தொடர்ந்தார்.

இதற்கிடையே அசாருதீன் அரசியலில் அதிரடியாக நுழைந்தார். காங் கிரஸ் கட்சியில் சேர்ந்த அவர் பாராளுமன்ற தேர்தலில் உத்தரபிரதேச மாநிலம் மொராதாபாத் தொகுதியில் போட்டியிட்டு எம்.பி.யானார்.
இந்த நிலையில் அகில இந்திய காங்கிரஸ் பொதுச்செயலாளர் திக்விஜய்சிங் தலைமையிலான காங்கிரஸ் எம்.பி.க்கள் குழு முன்னாள் கிரிக்கெட் வாரிய தலைவரும், ஐ.சி.சி. துணை தலைவருமான சரத்பவாரை சந்தித்து அசாருதீன் மீதான தடையை நீக்க வேண்டும் என்று வலியுறுத்தினார்கள். இது தொடர்பாக திக்விஜய் சிங் கூறும் போது பல்வேறு வீரர்கள் மீதும் சூதாட்ட குற்றச்சாட்டு உள்ளது. ஆனால் அவர்கள் எல்லாம் தடையில் இருந்து வெளியே வந்து விட்டார்கள். அசாருதீன் மட்டும் தடையில் தொடர்ந்து நீடிப்பது எப்படி சரியாகும்? அவர் தனது திறமை மூலம் பெருமை தேடிக்கொடுத்துள்ளார். அவரது தடையை நீக்க வலியுறுத்தியுள்ளோம் என்றார்.
இந்த எம்.பி.க்கள் குழுவில் இந்திய கிரிக்கெட் வாரியத்தின் துணைத் தலைவரான ராஜீவ் சுக்லாவும் இடம் பெற்றுள்ளார். அவர் காங்கிரஸ் எம்.பி. ஆவார். ராஜீவ் சுக்லா இது குறித்து கூறும் போது, கிரிக்கெட் வாரிய தலைவர் சசாங்க் மனோகரிடம் இது தொடர்பாக பேசினேன். அதற்கு அவர் அசாருதீன் ஒரு மனு கொடுத்தால் பொதுக்குழுவில் முடிவு செய்யப்படும் என்று என்னி டம் தெரிவித்தார் என்றார்.
அசாருதீன் மீதான தடையை நீக்குவது தொடர்பாக கிரிக்கெட் வாரியம் பரிசீலனை செய்ய விரும்புகிறது. இதனால் விரைவில் அவர் மீதான தடை நீக்கப்படுகிறது.

சென்னை போலீசிடம் சிக்கிய நியூசி., வீரர்கள்

வெலிங்டன்: சென்னை வந்த நியூசிலாந்து வீரர்கள் நீல் புரூம், ஆரன் ரெட்மாண்ட் ஆகியோர் குடித்து விட்டு போதையில் சர்ச்சை கிளப்பிய விஷயம் தற்போது அம்பலமாகியுள்ளது. போலீஸ் விசாரணைக்கு பின், இவர்கள் விடுவிக்கப்பட்டுள்ளனர்.
கடந்த ஆகஸ்ட் மாதம் நடந்த புச்சிபாபு கிரிக்கெட் தொடரில் பங்கேற்க நியூசிலாந்து "ஏ' அணியினர் சென்னை வந்தனர். இந்த அணியில் ஷேன் பாண்ட், கைல் மில்ஸ், புரூம், ரெட்மாண்ட் உள்ளிட்ட நட்சத்திர வீரர்கள் இடம் பெற்றிருந்தனர்.
போதையில் சர்ச்சை:இதில் முன்னணி பேட்ஸ்மேன்களான புரூம், ரெட்மாண்ட் பாதுகாப்பு விதிமுறைகளை மீறி ஓட்டலை விட்டு ரகசியமாக வெளியேறியுள்ளனர். பின் இரவு விடுதிக்கு சென்ற இவர்கள் குடித்துள்ளனர். அருகில் இருந்த ஏ.டி.எம்., சென்று பணம் எடுத்துள்ளனர். போதை தலைக்கேற தெருவோரத்தில் தங்கியிருந்த ஏழைகளுக்கு பணத்தை வாரி வழங்கியுள்ளனர். இதனை பார்த்ததும் அங்கு மக்கள் கூட்டம் திரள, பெரும் அமளி ஏற்பட்டுள்ளது. தகவல் அறிந்ததும் அங்கு வந்த போலீசார், இருவரையும் "ஸ்டேஷனுக்கு' அழைத்துச் சென்று விசாரணை நடத்தியுள்ளனர். இதில் நியூசிலாந்து வீரர்கள் என்பது உறுதி செய்யப்பட, விடுவிக்கப்பட்டுள்ளனர். "டாக்சி' மூலம் ஓட்டலுக்கு பத்திரமாக அனுப்பி வைக்கப்பட்டுள்ளனர். இது தொடர்பான செய்தி நேற்று நியூசிலாந்து "மீடியாவில்' வெளியானது. இரு வீரர்களின் பெயர் குறிப்பிடப்படாததால் பெரும் பரபரப்பு ஏற்பட்டது.
தவறுக்கு மன்னிப்பு:இதனை அறிந்த ரெட்மாண்ட், புரூம் தங்களது தவறை ஒத்துக் கொண்டனர். நியூசிலாந்து அணிக்காக 7 டெஸ்ட், 5 ஒருநாள் போட்டிகளில் பங்கேற்றுள்ள 30 வயதான ரெட்மாண்ட் கூறுகையில்,""இவ்விஷயத்தில் மற்ற வீரர்களை சந்தேகப்பட வேண்டாம். நாங்கள் தான் ஓட்டலை விட்டு வெளியேறி இரவு விடுதிக்கு சென்றோம். தெருவோரத்தில் வாழும் மக்களுக்கு பணம் கொடுத்ததால் பெரும் கூட்டம் திரண்டது. இதனால் போலீசார் பிடியில் சிக்கும் நிலைமை உருவானது துரதிருஷ்டவசமானது. துவக்கத்தில் யார் என்று தெரியாததால் போலீஸ் "ஸ்டேஷனுக்கு' அழைத்துச் செல்லப்பட்டோம். பின்னர் ஓட்டலுக்கு திரும்ப "டாக்சி' ஏற்பாடு செய்து கொடுத்தனர். எங்களது முறையற்ற நடத்தைக்காக சக வீரர்கள், ரசிகர்களிடம் மன்னிப்பு கேட்டுக் கொள்கிறோம்,'' என்றார்.
இது குறித்து 16 ஒரு நாள் போட்டிகளில் விளையாடியுள்ள 26 வயதான புரூம் கூறுகையில்,""அணியின் விதிமுறையை மீறி செயல்பட்டதற்காக வருத்தம் தெரிவித்துக் கொள்கிறோம். நியூசிலாந்து கிரிக்கெட் போர்டிடமும் மன்னிப்பு கேட்டுக் கொள்கிறோம்,''என்றார்.
இவர்களது தவறான நடத்தைக்காக நியூசிலாந்து கிரிக்கெட் போர்டு கடும் நடவடிக்கை எடுத்துள்ளது. ஆனாலும், தண்டனை தொடர்பான விபரங்களை வெளியிட மறுத்து விட்டது. இது பற்றி நியூசிலாந்து கிரிக்கெட் போர்டின் தலைமை செயல் அதிகாரி ஜஸ்டின் வான் கூறுகையில்,""இவ்விஷயத்தில் விரிவான விசாரணை நடத்தி உரிய நடவடிக்கை எடுக்கப்பட்டது. அனைத்தும் ரகசியமாக வைக்கப்பட்டுள்ளது. நியூசிலாந்து கிரிக்கெட்டின் உள்விவகாரம் என்பதால், எதையும் வெளியே சொல்ல முடியாது. எங்களை பொறுத்தவரை இது முடிந்து போன விஷயம்,''என்றார்.
குற்றம் இல்லை:இப்பிரச்னையில் நியூசிலாந்து கிரிக்கெட் வீரர்கள் சங்கம் சம்பந்தப்பட்ட இரு வீரர்களுக்கும் ஆதரவு தெரிவித்துள்ளது. இதன் செயல் அதிகாரி ஹீத் மில்ஸ் கூறுகையில்,""வீரர்கள் குற்றம் எதுவும் செய்யவில்லை. இவர்கள் மீது புகார் எதுவும் பதிவு செய்யப்படவில்லை. ஓட்டலை விட்டு வெளியேறி குடித்து விட்டு, சர்ச்சை ஏற்படுத்தியிருக்கக் கூடாது என்பதை ஒத்துக் கொண்டுள்ளனர்,''என்றார்.

கோவில் கட்டி பரபரப்பை ஏற்படுத்திய டோனி ரசிகர்: தேர்தலில் போட்டி

இந்திய கிரிக்கெட் அணியின் கேப்டன் டோனிக்கு ஏராளமான ரசிகர்கள் உள்ளனர். ஜார்க்கண்ட் மாநிலத்தைச் சேர்ந்த ஜிதேந்திராசிங் என்பவர் டோனி ரசிகர் மன்ற தலைவராக உள்ளார்.

இவர் டோனிக்கு கோவில் கட்ட முடிவு செய்து அடிக்கல் நாட்டி பணியை தொடங்கினார். இதற்கு டோனியின் குடும்பத்தினர் எதிர்ப்பு தெரிவித்ததால் கோவில் கட்டுவதை அவர் கைவிட்டார்.

பின்னர் டோனியை பாராட்டும்விதமாக அருங் காட்சியகம் அமைக்க போவதாக அவர் அறிவித்தார். இந்த நிலையில் ஜிதேந்திரா சிங் ஜார்க்கண்ட் மாநில சட்டசபை தேர்தலில் போட்டியிடுகிறார். ஹாடியா தொகுதியில் சுயேட்சையாக போட்டியிட அவர் வேட்பு மனு தாக்கல் செய்துள்ளார்.

இது குறித்து அவர் கூறும்போது, நான் டோனியின் தீவிர ரசிகன். தேர்தலில் போட்டியிடுவதன் மூலம் டோனியின் பெயரை எனது சுயலாபத்திற்காக உபயோகப்படுத்துவதாக நினைக்கவில்லை என்றார்.

ஜார்க்கண்டில் வருகிற 25-ந்தேதி முதல் டிசம்பர் 18-ந்தேதி வரை 5 கட்டமாக தேர்தல் நடக்கிறது.

ரன் எடுக்கும் போது கோவிலை கட்டிவிட்டு, தோனி அவுட்டாகும் போது அவர் வீட்டை இடிக்க கிளம்புறதுதானே இந்த வெறி பிடித்த ரசிகர்கள் செய்வது. விளையாட்டை விளையாட்டாகவே பாருங்கள், கோவில் கட்ட வேண்டும் என்றால் அவரவர் மனதில் கட்டிக் கொள்ளுங்கள்.

ஒருநாள் போட்டி மற்றும் டெஸ்ட் 30 ஆயிரம் ரன்னை நெருங்கும் தெண்டுல்கர்

உலகின் தலைசிறந்த பேட்ஸ்மேன் தெண்டுல்கர். 1989-ம் ஆண்டு நவம்பர் 15-ந்தேதி பாகிஸ்தானுக்கு எதிரான டெஸ்டில் அறிமுகம் ஆனார். வருகிற 15-ந்தேதி அவர் 21-வது ஆண்டில் அடியெடுத்து வைக்கிறார். இந்த 20 ஆண்டு கால விளையாட்டில் அவர் பல்வேறு சாதனைகளை புரிந்துள்ளார். சாதனை என்றாலே சச்சின் தான் என்று சொல்லுமளவுக்கு உள்ளது.

தெண்டுல்கர் தற்போது மேலும் ஒரு மைல்கல்லை நோக்கி செல்கிறார். டெஸ்ட் மற்றும் ஒருநாள் போட்டியில் சேர்த்து அவர் 30 ஆயிரம் ரன்னை நெருங்குகிறார். அதற்கு இன்னும் 49 ரன் தேவை. அவர் 436 ஒருநாள் போட்டியில் விளையாடி 17, 178 ரன்னும், 159 டெஸ்டில் 12,773 ரன்னும் எடுத்துள்ளார். இரண்டையும் சேர்த்து 29,951 ரன் குவித்துள்ளார்.

இன்றைய போட்டி மழையால் பாதிக்க வாய்ப்பு இருக்கிறது. இதனால் இலங்கைக்கு எதிரான டெஸ்ட் தொடரில் அவர் 30 ஆயிரம் ரன்னை தொடுவார். தெண்டுல்கரின் சாதனைகளை எட்டிபிடிக்க முடியாத தூரத்தில் மற்ற வீரர்கள் உள்ளனர்.

Source: http://www.maalaimalar.com/

2011 உலக கோப்பை கிரிக்கெட் சென்னையில் 4 ஆட்டங்கள்

சென்னை, : உலகக் கோப்பை கிரிக்கெட் போட்டியில் (2011) இந்தியா & வெஸ்ட்இண்டீஸ் மோதும் லீக் போட்டி உட்பட 4 ஆட்டங்கள் சென்னையில் நடக்கவுள்ளன. இந்த தொடரின் பைனல் உட்பட 29 ஆட்டங்கள் இந்தியாவில் நடக்கிறது. இலங்கையில் 12 ஆட்டங்களும், வங்கதேசத்தில் 8 ஆட்டங்களும் நடக்கிறது. பாகிஸ்தானில் நடக்க இருந்த போட்டிகள் இலங்கைக்கு மாற்றப்பட்டுள்ளது. மொத்தம் 43 நாட்கள் (பிப்.19 & ஏப்.2) போட்டிகள் நடக்கிறது. மிர்பூரில் பிப்ரவரி 19ம் தேதி நடக்கும் தொடக்க ஆட்டத்தில் இந்தியா & வங்கதேசம் மோதுகின்றன. இறுதிப் போட்டி மும்பையில் ஏப்ரல் 2ல் நடக்கிறது. சென்னை, சேப்பாக்கம் எம்.ஏ.சிதம்பரம் ஸ்டேடியத்தில் மொத்தம் 4 ஆட்டங்கள் நடக்கிறது. இதில் இந்தியா & வெஸ் ட்இண்டீஸ் (மார்ச்.20), கென்யா & நியூசிலாந்து, தென்ஆப்ரிக்கா & இங்கிலாந்து, வெஸ்ட்இண்டீஸ் & இங்கிலாந்து அணிகள் மோதுகின்றன. சேப்பாக்கம் ஸ்டேடியம் நவீன வசதிகளுடன் புதுப்பிக்கப்பட்டு வருவதால், கடந்த ஒரு வருடமாக எந்த போட்டியும் நடக்கவில்லை. இந்நிலையில், உலகக் கோப்பை போட்டியின் 4 ஆட்டங்கள் இங்கு நடக்க உள்ளதால் சென்னை ரசிகர்கள் மகிழ்ச்சியடைந்துள்ளனர்.

Source: http://www.dinakaran.com/

செரீனா வில்லியம்ஸ் சினிமாவில் நடிக்கிறார்

அமெரிக்காவைச் சேர்ந்த பிரபல டென்னிஸ் வீராங்கனை செரீனா வில்லியம்ஸ். பல்வேறு கிராண்ட் சிலாம் பட்டங்களை வென்றுள்ள அவர் தற்போது முதல் நிலை வீராங்கனையாக திகழ்கிறார்.

டென்னிஸ் போட்டியில் இருந்து ஓய்வு பெற்ற பிறகு சினிமாவில் நடிக்க செரீனா வில்லியம்ஸ் முடிவு செய்துள்ளார். இது தொடர்பாக அவர் கூறியதாவது:-

2005-ம் ஆண்டு நான் டெலிவிஷன் தொடரில் நடித்தேன். டென்னிஸ் போட்டியில் இருந்து ஓய்வு பெற்ற பின்னர் சினிமாவில் பிரவேசம் ஆவேன். நடிப்பது எனக்கு உண்மையிலேயே மகிழ்ச்சியை அளிக்கும். கேமிரா முன்பு நிற்பதை விரும்புகிறேன்.

ஆக்ஷன் நடிகை ஆக வேண்டும் என்பதுதான் எனது விருப்பம். உதைப்பது, வேகமாக ஓடுவதை விரும்புகிறேன்.

இவ்வாறு அவர் கூறியுள்ளார்.

Source: http://www.maalaimalar.com

கபில்தேவ் ஆட்டம் போல் இருந்தது: தெண்டுல்கருக்கு ஸ்ரீகாந்த் பாராட்டு

கிரிக்கெட்டின் சகாப்தம் என்பதை தெண்டுல்கர் ஐதராபாத்தில் நடந்த போட்டியில் நிரூபித்துவிட்டார். 36 வயதான அவர் 20 வயது இளைஞர் போல் அதிரடியாக விளையாடி ரசிகர்களை மகிழ்ச்சி வெள்ளத்தில் ஆழ்த்தினார். ஓய்ந்து கிடந்த ஆட்டத்தக்கு புத்துயிர் கொடுத்தார்.

தனது 20 ஆண்டு கால கிரிக்கெட் வாழ்க்கையில் இப்படி ஒரு சிறப்பான ஆட்டத்தை வெளிப்படுத்தியுள்ளார். இதற்கு முன்பு சார்ஜாவில் 1998-ம் அண்டு இதே ஆஸ்திரேலியாவுக்கு எதிராக புயல் வேகத்தில் ஆடி இருந்தார். அதை விட ஐதராபாத் போட்டியில் 175 ரன் குவித்தது அவரது சிறந்த இன்னிங்ஸ் ஆகும்.

3 ரன்னில் தோற்றதால் இந்த சிறப்பான அட்டத்தை அவரால் மகிழ்ச்சி பொங்க கொண்டாட முடியவில்லை. தோல்வி மிகுந்த ஏமாற்றம் அளித்ததாக அவர் கூறி இருந்தார்.

தெண்டுல்கரின் சிறப்பான ஆட்டத்தை தேர்வு குழு தலைவரும், முன்னாள் கேப்டனுமான ஸ்ரீகாந்த் பாராட்டியுள்ளார். இது தொடர்பாக அவர் கூறியதாவது:-

தெண்டுல்கரின் ஆட்டம் மிகவும் அற்புதமாக இருந்தது. கடந்த சில ஆண்டுகளில் நான் பார்த்த சிறந்த ஆட்டம் இதுவாகும். இந்த ஆட்டத்தை பார்க்கும்போது எனக்கு 1983-ம் ஆண்டு உலக கோப்பையில் ஜிம்பாப்வேக்கு எதிராக கபில்தேவ் 175 ரன் குவித்ததுதான் நினைவுக்கு வந்தது. அந்த ஆட்டம் போல் இது இருந்தது. தோல்வியால் அவர் மட்டுமின்றி அணியே வேதனை அடைந்து இருக்கும். தெண்டுல்கரிடம் இருந்து இளம் வீரர்கள் பாடம் கற்றுக் கொள்ள வேண்டும்.

351 ரன் இலக்கு என்பது சாதாரணமானது அல்ல. தனி ஒரு மனிதர் பொறுப்புடன் விளையாடியது . அவரது ஆட்ட நுணுக்கம் சிறப்பாக இருந்தது.

தெண்டுல்கரிடம் இருந்து நாங்கள் இன்னும் எதிர்பார்க்கிறோம். அதை அவர் நிச்சயம் செய்வார் என்று உறுதியாக நம்புகிறேன். 2011-ம் ஆண்டு உலக கோப்பையை வெல்ல வேண்டும் என்பது அவரது விருப்பமாக உள்ளது.

இவ்வாறு ஸ்ரீகாந்த் கூறியுள்ளார்.

Source: http://www.maalaimalar.com

அதிரடி ஆட்டம் பழைய டோனியை மீண்டும் பார்த்தேன்; ஸ்ரீகாந்த் பெருமிதம்

நாக்பூர் போட்டியில் டோனி அதிரடியாக ஆடியது குறித்து இந்திய அணி தேர்வு குழு தலைவர் ஸ்ரீகாந்த் கூறியதாவது:- நாக்பூரில் இந்திய அணியின் ஆட்டம் எதிர்பாராத அளவுக்கு அபாரமாக இருந்தது. எல்லா வீரர்களுமே எந்த குறைகளும் சொல்ல முடியாமல் சிறப்பாக ஆடினார்கள்.

பழைய டோனியை இந்த ஆட்டத்தின் மூலம் மீண்டும் பார்த்தேன். மிக பிரமாண்டமாக ஆடினர். அதேபோல காம்பீர், ஷேவாக் மற்ற வீரர்களின் ஆட்டமும் பாராட்டும் படியாக இருந்தது.

ஆஸ்திரேலியா மிக வலுவான அணி. இதை 99 ரன்கள் வித்தியாசத்தில் தோற்கடித்தது சாதாரண விஷயம் அல்ல. இந்த வெற்றி மூலம் இனிவரும் அனைத்து போட்டிகளையும் வெல்ல முடியும் என்ற நம்பிக்கை ஏற்பட்டுள்ளது.
இவ்வாறு ஸ்ரீகாந்த் கூறினார்.

Source: http://www.maalaimalar.com

தெண்டுல்கர் ஒருநாள் போட்டியை குறைத்து கொள்ள வேண்டும்; ஆலன் பார்டர் யோசனை

ஆஸ்திரேலிய முன்னாள் கேப்டன் ஆலன் பார்டர் அளித்த பேட்டியில் கூறியதாவது:-
சர்வதேச கிரிக்கெட்டில் தெண்டுல்கர் செய்த சாதனை மிக பிரமாண்டமானது. நாட்டுக்காக அவர் 20 வருடம் ஆடிகொண்டிருப்பது சாதாரண சாதனை அல்ல. சர்வதேச போட்டிகளில் ஆடும்போது பல்வேறு நெருக்கடிகள் ஏற்படும். அதை சிறப்பாக சமாளித்து இத்தனை ஆண்டு காலம் நீடித்து இருப்பது பெரிய விஷயம்.

அவர் டெஸ்ட் போட்டிகளில் நீண்ட காலம் தொடர வேண்டும். இதற்காக ஒரு நாள் போட்டிகளை குறைத்து கொள்வது நல்லது. ஒருநாள் போட்டிகளில் அதிகம் ஆடினால் அது பாதிப்பை ஏற்படுத்தி டெஸ்ட் போட்டிகளில் ஆட முடியாத நிலையை ஏற்படுத்தி விடும்.

மற்ற வீரர்களை போலவே அவருக்கும் காயத்தால் பிரச்சினைகள் ஏற்பட்டு வருகின்றன. பல ஏற்றத்தாழ்வுகளை சந்தித்து வருகிறார். இருந்தாலும் அவருக்கு கிரிக்கெட் மீது உள்ள ஆர்வத்தால் எல்லாம் நல்லபடியாக அமைந்து விடுகிறது. ஒவ்வொரு கட்டத்திலும் அவருடைய ஆட்டம் மெருகேறி வருகிறது. இது எல்லா வீரர்களுக்கும் சாத்தியமானது அல்ல.

இவ்வாறு அவர் கூறினார்.

Source: http://www.maalaimalar.com

விமர்சனங்களை தகர்த்த தோனி

நாக்பூர்: நாக்பூரில் நடந்த இரண்டாவது ஒரு நாள் போட்டியில், 5 வது வீரராக களமிறங்கி சதமடித்த தோனி, தன் மீது எழுந்த விமர்சனங்களை தகர்த்தார். இந்தியா வந்துள்ள ஆஸ்திரேலிய அணி 7 போட்டிகள் கொண்ட ஒரு நாள் தொடரில் விளையாடி வருகிறது. வதோதராவில் நடந்த முதல் போட்டியில் ஆஸ்திரேலியா வெற்றி பெற்றது. இதனை அடுத்து நேற்று முன் தினம் நாக்பூரில் நடந்த இரண்டாவது போட்டியில், இந்திய அணி 99 ரன்கள் வித்தியாசத்தில் அபார வெற்றியை எட்டியது. இவ்வெற்றிக்கு இந்திய கேப்டன் தோனி (124 ரன்) அடித்த சூப்பர் சதம் முக்கிய காரணமாக அமைந்தது. "பேட்டிங் ஆர்டர்' பிரச்னை: ஆரம்பக் கட்டத்தில் இந்திய அணியில் இடம் பிடித்த தோனி, அதிரடி ஆட்டத்தில் அசத்தினார். ஆனால் கேப்டன் பொறுப்பேற்ற பின், நிதான ஆட்டத்தை வெளிப்படுத்தி வந்தார். இதனால் அணி தோல்வி அடையும் போது, விமர்சனங்களுக்கு உள்ளானார். தவிர, இவர் மூன்றாவது வீரராக களமிறங்க வேண்டும் என கங்குலி, கில்கிறிஸ்ட் உள்ளிட்ட முன்னாள் வீரர்கள் பலர் கருத்து தெரிவித்தனர். ஆனால் அணியின் தேவைக்கேற்ப, தான் செயல்படுவதாக தோனி தெரிவித்து இருந்தார். நாக்பூர் போட்டியில் இதை உண்மையாக்கி விமர்சனங்களுக்கு பதிலடி கொடுத்துள்ளார். இப்போட்டியில் 5 வது வீரராக களமிறங்கிய இவர், அதிரடியாக ஆடி 124 ரன்கள் குவித்தார். சிறப்பான சதம்: இது குறித்து தோனி கூறியது: ஒரு நாள் போட்டிகளில் 5 வது வீரராக களமிறங்கினால் அதிக ரன்கள் குவிக்க முடியாது. சிறப்பாக ஆடினாலும் 50 அல்லது 60 ரன்கள் தான் குவிக்க முடியும். ஆனால் நாக்பூர் போட்டியில் எனது சதம் சிறப்பானதாக அமைந்தது. இருப்பினும் ஒரு நாள் அரங்கில் நான் பதிவு செய்த 5 சதங்களும் சிறப்பானவை தான். இவ்வாறு தோனி கூறினார். இந்தியா, ஆஸ்திரேலிய அணிகள் மோதும் மூன்றாவது ஒரு நாள் போட்டி நாளை டில்லியில் நடக்க உள்ளது. --------- அணியில் மாற்றம் இல்லை ஆஸ்திரேலியாவுக்கு எதிரான அடுத்த 2 போட்டிகளுக்கான இந்திய அணியில் எந்த மாற்றமும் இல்லை என தேர்வுக் குழு தலைவர் ஸ்ரீகாந்த் தெரிவித்துள்ளார். இது குறித்து அவர் கூறுகையில்,"" நாக்பூர் போட்டியில் இந்திய அணியினர் அபார ஆட்டத்தை வெளிப்படுத்தி அசத்தினர். தோனியின் அதிரடி அவரது பழைய ஆட்டத்தை நினைவு படுத்தியது. காம்பிர், சேவக் ஆகியோரும் சிறப்பாக ஆடினார்கள். 99 ரன்கள் வித்தியாசத்தில் உலக சாம்பியனான ஆஸ்திரேலியாவை வீழ்த்துவது எளிய காரியம் அல்ல. இவ்வெற்றி, அடுத்து வரும் போட்டிகளில் சிறப்பாக செயல்பட தூண்டுதலாக அமைந்துள்ளது. 3 வது (டில்லி) மற்றும் 4 வது (மொகாலி) ஒரு நாள் போட்டிகளுக்கான இந்திய அணியில் எந்த மாற்றமும் இல்லை. இதே அணியே விளையாடும்,'' என்றார். ------------- பெய்ன் நீக்கம் நாக்பூர் போட்டியின் போது,காயமடைந்த ஆஸ்திரேலிய விக்கெட் கீப்பர் டிம் பெய்ன் தொடரிலிருந்து நீக்கப்பட்டுள்ளார். அவருக்குப் பதில் கிரஹாம் மானோ தேர்ந்தெடுக்கப்பட்டுள்ளார். இது குறித்து ஆஸ்திரேலிய கிரிக்கெட் போர்டின் தேர்வுக் குழு தலைவர் ஹில்டிச் கூறுகையில்,"" டிம் பெய்னுக்கு கைவிரலில் முறிவு ஏற்பட்டுள்ளது. இதனால் எஞ்சியுள்ள போட்டிகளில் அவரால் பங்கேற்க முடியாத சூழ்நிலை ஏற்பட்டுள்ளது. அவருக்குப் பதில், அறிமுக வீரராக கிரஹாம் மானோ களமிறங்க உள்ளார்,'' என்றார்.

Source: http://www.dinakaran.com