அமெரிக்கர்களை துரத்தும் பயங்கரவாத பகீர் : விமானநிலையத்தில் நுழைந்த மர்ம மனிதன் !

நியூயார்க்: அமெரிக்காவில் சர்வதேச விமானநிலையத்தில் மர்ம மனிதன் நுழைந்துள்ளதால் அவனை தேடும் பணியில் போலீசார் மும்முரமாக ஈடுபட்டுள்ளனர். இதனால் விமான நிலையம் மூடப்பட்டுள்ளது. பயணிகள் அனைவரும் ஆங்காங்கே நிறுத்தி வைத்து கடும் சோதனைக்குட்படுத்தப்பட்டுள்ளனர். இங்கிருந்து புறப்பட வேண்டிய விமானங்கள் கிளம்புவதில் தாமதம் ஏற்பட்டுள்ளது. அமெரிக்காவில் இரட்டை கோபுரம் தகர்க்கப்பட்ட நாள் முதல் அங்கு பாதுகாப்பு பலமுனை கட்டங்களாக விரிவுப்படுத்தப்பட்டுள்ளது. முக்கிய நகரங்களில் போலீசார் உஷார்படுத்தப்பட்டுள்ளனர். குறிப்பாக விமான நிலையங்கள் கடும் கட்டுப்பாட்டிற்குள் வைக்கப்பட்டுள்ளது.
வீடியோவில் பதிவு : இந்நிலையில் நியூயார்க் நகரில் இருந்து 20 கி.மீட்டர் தொலைவில் உள்ள நியூஜெர்ஸி விமான நிலையம் உள்ளது. இது சர்வதேச விமான நிலையம் ஆகும். இங்கு ஆண்டுக்கு 35 மில்லியன் பயணிகள் இங்கு வந்து செல்கின்றனர். இந்நிலையில் இங்குள்ள செக்போஸ்ட்டில் இருந்து பாதுகாப்பையும் மீறி ஒரு பிரமுகர் விமான நிலையத்தில் நுழைந்துள்ளார். இது பாதுகாப்பு துறை வீடியோ மூலம் தெரிய வந்தது. இதனையடுத்து அங்கு போலீசார் உஷார் படுத்தப்பட்டனர். உடனடியாக பயணிகள் ஆங்காங்கோ நிறுத்தப்பட்டனர். விமான நிலையம் மூடப்பட்டது. தொடர்ந்து அந்த மர்ம மனிதனை தேடும் பணி நடந்து வருகிறது. செக்பாய்ன்ட் வழியாக இந்த மர்ம மனிதன் பாதுகாப்பு படைவீரர்களின் கண்ணை மூடி பயணிகளோடு, பயணியாக நுழைந்து சென்றிருப்பதாக அமெரிக்காவில் உள்ள சி.என்.என்., தெரிவித்துள்ளது. மர்ம மனிதனை தேடும்பணி காரணமாக அங்கிருந்து விமானங்கள் எதுவும் கிளம்பவில்லை. பயணிகள் பலர் தங்களது ஊர்களுக்கு செல்ல முடியாமல் தவித்தனர்.
விமானத்தில் வந்த நைஜீரிய இளைஞன் : கடந்த சில நாட்களுக்கு முன்னர் அமெரிக்காவில் விமானத்தில் பயணித்த நைஜீரிய இளைஞர் ஒருவர் வெடிபொருட்களுடன் கைது செய்யப்பட்டார். அவர் அல்குவைதாவுடன் தொடர்பு உடையவன் என்றும் கிறிஸ்துமஸ் விழாவையொட்டி அங்கு பெரும் சேதத்தை ஏற்படுத்தி திட்டமிட்டிருந்ததாகவும் விசாரணையில் தெரிய வந்துள்ளது. சமீபத்தில் அமெரிக்காவில் பாதுகாப்பு படை வீரர்கள் முகாமில் இருந்த வீரர் சக வீரர்களை சுட்டு கொன்றார். ஈராக்கிற்கு பாதுகாப்பு பணிக்கு செல்ல மனம் இல்லாமல் இருந்த காரணத்தினால் அவர் இந்த துப்பாக்கி சூட்டை நடத்தியதாக கூறப்பட்டது. ஆப்கனில் பணி செய்வதற்கு அமெரிக்க அதிகாரிகள் அச்சம் தெரிவித்துள்ளனர். சமீபத்தில் ஆப்கனில் சி.ஐ.ஏ., அதிகாரிகள் சிலர் கொல்லப்ப்பட்டனர்.
தூதரகம் மூடல் : பாதுகாப்பு காரணமாக ஏமனில் உள்ள அமெரிக்க தூதரகம் மூட முடிவு செய்துள்ளதுஏமனில் உள்ள அமெரிக்க தூதரகம் அல்குவைதாவினர் தாக்குதல் நடத்த திட்டமிட்டுள்ளதாகவும் இதனை கருத்தில் கொண்டு இங்கு காலி செய்வதாகவும் அமெரிக்க பாதுகாப்பு அதிகாரிகள் ஒத்துக்கொண்டுள்ளனர். குறிப்பாக அமெரிக்காவில் கடந்த 2001 ம் ஆண்டில் செப்டம்பர் 11 தாக்குதலில் ஆயிரக்கணக்கானவர்கள் கொல்லப்பட்டனர். இதில் இருந்து அமெரிக்காவில் பாதுகாப்பு பலப்படுத்தப்பட்டுள்ளது. குறிப்பாக விமான நிலையம் உயர்கட்டுப்பாட்டுக்குள் கொண்டு வரப்பட்து.
14 நாட்டு விமானத்தில் பயங்கரவாதிகள்: ? அமெரிக்கா வந்து செல்லும் 14 நாட்டு விமானங்கள் முக்கிய கவனத்தில் எடுத்துக்கொள்ள உத்தரவிடப்பட்டுள்ளது. இதன்படி ஆப்கன், அல்ஜீரியா, ஈராக், லெபனான், லிபியா, நைஜீரியா, பாகிஸ்தான், சவுதிஅரேபியா, சோமாலியா, ஏமன், ஆகிய 10 நாட்டு விமானங்கள் உன்னிப்பாக கவனிக்க உத்தரவிடப்பட்டுள்ளது. இதன்படி இந்த விமானம் கடும் சோதனைக்கு உட்படுத்தப்படும். மேலும், கியூபா, ஈரான், சடான், சிரியா ஆகிய 4 நாடுகளும் இந்தப்பட்டியலில் சேர்க்கப்படும் வாய்ப்புள்ளது.
சமீபத்தில் விமான நிலையங்களில் பயணிகள் கடும் சோதனைக்குட்படுத்தப்படுகின்றனர். இதனால் பல நாட்டு பயணிகளும் கடும் சிரமத்திற்குள்ளாகின்றனர். தற்போதைய நியூயார்க் விமான நிலையத்தில் மர்ம மனிதன் நுழைந்த சம்பவம் அங்கு பரபரப்பை ஏற்படுத்தியுள்ளது

மும்பை தாக்குதல் தீவிரவாதி அஜ்மலை மின் கம்பத்தில் தூக்கில் போட வேண்டும்: மரணமடைந்த அதிரடிப்படை வீரரின் தந்தை ஆவேசம்

மும்பையில் கடந்த ஆண்டு நவம்பர் 26-ந் தேதி தீவிரவாதிகள் நடத்திய தாக்குதலில் தேசிய பாதுகாப்பு படையில் மேஜராக இருந்த சந்தீப் உன்னி கிருஷ்ணன் கொல்லப்பட்டார்.

இவருடைய தந்தை உன்னி கிருஷ்ணன் பெங்களூரில் வசித்து வருகிறார். சந்தீப் பெற்றோருக்கு ஒரே மகன். அவரை இழந்த துக்கம் இன்னும் பெரிய அளவில் அவர்களை வாட்டிக்கொண்டே இருக்கிறது. மகன் மரணம் அடைந்து ஒரு ஆண்டு ஆவதையொட்டி உன்னிகிருஷ்ணன் மகனை நினைவு கூர்ந்து கூறியதாவது:-

எங்கள் மகன் மரணம் அடைந்த அந்த நிகழ்வுகள் இன்னும் எங்கள் மனதை விட்டு அகலவில்லை. அவன் எங்களுடன் இல்லையே என்ற ஏக்கத்துடன் இருக்கிறோம்.

அந்த தாக்குதலில் பிடிபட்ட தீவிரவாதி அஜ்மலை இன்னும் உயிருடன் வைத்து பார்த்து கொண்டிருக்கிறார்கள். அஜ்மலை யாரோ இயக்கி இருக்கிறார்கள், அவனை என்னை செய்வது என்று சிலர் கூறலாம். அவனுக்கும் சுயமாக செயல்பட மூளை இருக்கிறது. திட்டமிட்டு செயல்களை செய்கின்றனர்.

அவனும், அவனுடைய கூட்டாளியும் மட்டுமே 53 அப்பாவிகளை சுட்டுக் கொன்றனர். குழந்தைகள், கர்ப்பிணி பெண்களை எல்லாம் துடிக்க துடிக்க கொன்றனர். அவர்கள் உயிரிழந்ததை பார்த்து சிரித்தபடி அஜ்மல் நின்றிருக்கிறான். இந்த கொடூர மனிதனை விளக்கு கம்பத்தில் தூக்கில் போட வேண்டும்.

நாம் பாகிஸ்தான் ஏதாவது செய்ய வேண்டும் என்று கேட்டு கொண்டு இருக்கிறோம். முதலில் அஜ்மலை கொல்ல வேண்டும், இதை பழிவாங்கும் நோக்கத்துடன் சொல்லவில்லை. இது தீவிரவாதிகளுக்கு பாடமாக இருக்க வேண்டும்.

இவ்வாறு அவர் கூறினார்.

ஐ.நா. சபையில் பணியாற்ற விரும்பும் பின்லேடன் மகன்

அல்-கொய்தா தீவிரவாத இயக்கத்தின் தலைவன் பின்லேடன். இவன் உலகம் முழுவதும் தேடப்படும் சர்வதேச குற்றவாளி. அவனது மகன் ஒமர் பின்லேடன். இவர் ஒரு பத்திரிகைக்கு பேட்டி அளித்துள்ளார்.அதில் கூறி இருப்பதாவது:-

அரசியல்வாதியாகும் எண்ணம் எனக்கு இல்லை. எப்போதும் நான் உண்மையே பேசுகிறேன். சமாதானத்தையே விரும்புகிறேன். இதற்காக ஐ.நா.சபையில் சமாதான பிரசாரகாரராக பணிபுரிய விரும்புகிறேன்.

எனது தந்தையை ஒரே ஒருமுறை சந்தித்து இருக்கிறேன். அப்போது என்னையும், சகோதரர்களையும் ஆயுதம் ஏந்துமாறு எனது தந்தை பின்லேடன் கேட்டுக்கொண்டார். ஆனால் அதை யாரும் விரும்பவில்லை.

ஆனால் ஒருபோதும் என்னை அல்-கொய்தா இயக்கத்தில் சேரும்படி கூறவில்லை. ஆனால் ஒரு வேலையை என்னிடம் ஒப்படைத்தார். அதற்கு நான் தகுதியானவன் இல்லை என்று கூறி மறுத்து விட்டேன். கருத்து வேற்றுமை மற்றும் வன்முறையில் எனக்கு உடன்பாடு இல்லை என்று தெரிவித்துள்ளேன்.

ஒமர் பின்லேடன் தனது தந்தை பின்லேடனுடன் ஆன தொடர்பை 2001-ம் ஆண்டு ஏப்ரல் மாதத்துடன் முறித்து கொண்டதாகவும் கூறியுள்ளார்.

சோமாலியாவில் செல்போன் ரிங்டோன்களுக்கு தீவிரவாதிகள் தடை

சோமாலியா நாட்டில் அல்ஷபாப் என்ற அமைப்பை சேர்ந்த தீவிவாதிகள் ஆதிக்கம் செலுத்தி வருகின்றனர். சமீபத்தில் இவர்கள் சோமாலியாவில் உள்ள கிஷ்மாயூ என்ற துறைமுக பகுதியையும் தெற்கு பகுதி யையும் கைப்பற்றினர்.

இதைத் தொடர்ந்து அப்பகுதியில் அவர்கள் தங்கள் அதிகாரத்தை செலுத்த தொடங்கி விட்டனர். மோகாடிசுவை தலைநகராக அறிவித்துள்ளனர். தங்களுக்கு என்று தனி சட்ட திட்டங்கள் அடங்கிய கோர்ட்டுகள், தனி கொடி என்று அமைத்துள்ளனர்.

தங்கள் ஆளுமைக்குட்பட்ட பகுதிகளில் சினிமா, நடன நிகழ்ச்சிகள் மற்றும் திருமண நிகழ்ச்சிகள், மற்றும் விளையாட்டுகளை தடை செய்துள்ளனர். இந்த நிலையில் அவர்கள் செல்போன்களில் பயன்படுத்தி வந்த ரிங் டோன்களுக்கு தடை விதித்துள்ளனர்.

அந்நாட்டு மக்கள் இந்திப்பட பாடல்கள் மற்றும் தாங்கள் பின் பற்றும் மத பாடல்களை செல்போன்களில் ரிங்டோன் களாக பயன்படுத்தி வந்தனர். அதற்கு தடை விதிக்கப்பட்டுள்ளதால் அவற்றை பயன்படுத்த முடிய வில்லை.

தீவிரவாதிகளின் தடையை மீறுபவர்களுக்கு கடுமையான தண்டனையும் வழங்கப்படுகிறது. அலி முகமது யூசுப் (20) என்ற வாலிபர் தனது செல்போன் மூலம் இசை மற்றும் வீடியோ மூலம் படங்களை பார்த்து ரசித்தார்.

இதை அறிந்த தீவிரவாதிகள் அவரை நடுரோட்டில் நிறுத்தி வைத்து சவுக்கால் அடித்து தண்டனையை நிறைவேற்றினர். தங்கள் மதத்துக்கு எதிரான கொள்கைகளை குறிப்பாக இசை மற்றும் செக்ஸ் வீடியோ காட்சிகளை அனுமதிக்க முடியாது என அல் ஷபாப் தீவிரவாத அமைப்பின் செய்தி தொடர்பாளர் ஷேக் ஹாசன்யாகூப் தெரிவித்துள்ளார்.

Source: http://www.maalaimalar.com

காஷ்மீரில் 2 தீவிரவாதிகளை கடித்து கொன்ற கரடிகள்

பாகிஸ்தானில் இருந்து காஷ்மீருக்குள் ஊடுருவும் தீவிரவாதிகள் அடர்ந்த காடுகளுக்குள் பதுங்கி இருந்து பின்னர் ஊர் பகுதிகளுக்கு வருகிறார்கள். இப்படி காட்டுக்குள் பதுங்கி இருந்த தீவிரவாதிகள் 2 பேரை கரடிகள் கடித்து கொன்ற சம்பவம் நடந்து உள்ளது.

காஷ்மீர் மாநிலம் சோவியான் மாவட்டத்தில் உள்ள பிர்பாஞ்சாப் என்ற இடத்தில் அடர்ந்த காடு உள்ளது. கரடி மற்றும் வன விலங்குகள் நடமாட்டம் உண்டு.

இங்குள்ள கரடி குகை ஒன்றில் தீவிரவாதிகள் 2 பேர் பதுங்கி இருந்தனர். அப்போது அங்கு வந்த கரடிகள் 2 தீவிரவாதிகளையும் கடித்து கொன்றன.

அவர்கள் இருவரும் ஹிஸ்புல் முஜாகிதீஸ் இயக்கத்தை சேர்ந்தவர்கள். அவர்கள் பெயர் கைசார் அகமது, ஷபிபுல்லா என்று தெரிந்தது.

அவர்கள் இறந்து கிடந்த இடத்தில் 2 ஏ.கே.47 துப்பாக்கிகள் மற்றும் வெடிகுண்டுகள் கண்டெடுக்கப்பட்டன.

கடந்த 20 வருடத்தில் வன விலங்கு தாக்குதலில் தீவிரவாதிகள் பலியானது இதுதான் முதல் தடவை.

Source: http://www.maalaimalar.com

கடல் வழியாக இந்தியாவுக்கு வந்த பாக்., பயங்கரவாதிகள்

கடலில் நீந்தி பாதுகாப்பு படையினரிடம் இருந்து தப்பி விட்டார்கள் என்பதை நம்ப முடியவில்லை. உண்மையா? பொய்யா?

காந்திநகர்: குஜராத் மாநில கடல் எல்லை அருகே கடல் பகுதி வழியாக வந்த பயங்கரவாதிகளை பாதுகாப்பு படையினர் பிடிக்க முயன்ற போது கடலில் குதித்து தப்பினர். இந்தியாவில் பயங்கரவாதிகள் பல இடங்களில் தாக்குதல் நடத்தக்கூடும் என முன்னெச்சரிக்கையாக பாதுகாப்பு பலப்படுத்தப்பட்டு உஷார் நிலையில் வைக்கப்பட்டுள்ளது., அமெரிக்க உளவு துறையும் எச்சரிக்கை விடுத்துள்ளது. வரும் 26 / 11 மும்பை தாக்குதல் நாள் நெருங்கி வரும் வேளை என்பதால் கூடுதல் கவனம் செலுத்தப்பட்டு வருகிறது.
இந்நேரத்தில் இந்திய கடல்பகுதியில் பாதுகாப்பில் இருந்த பாதுகாப்பு படையினர் குஜராத் கட்ச் மாவட்டம் அருகே சர் கிரீக் கடல் பகுதியில் ஒரு மர்ம படகு வந்ததை கண்டனர். இதில் இருப்பவர்கள் யார் என கண்டறிய அந்த படகு நோக்கி விரைந்தனர். இந்நேரத்தில் பாதுகாப்பு படையினர் வருவதை கண்டதும் படகில் இருந்தவர்கள் கடலில் குதித்து நீச்சலடித்து தப்பி விட்டனர். அவர்களை பிடிக்க முடியவில்லை. படகு மட்டும் பிடிக்கப்பட்டுள்ளது. இந்தப்படகு பாகிஸ்தானில் இருந்து வந்துள்ளதாக சந்தேகிக்கப்படுகிறது.
மும்பையில் பயங்கரவாதிகள் தாக்குதல் நடத்தியபோது கடல் மார்க்கமாகத்தான் இந்தியாவிற்குள் நுழைந்தனர். இதே போல் தற்போது வந்தவர்கள் தாக்குதல் நடத்தும் திட்டத்துடன் வந்திருக்கலாம் என பாதுகாப்பு படை வட்டாரம் தெரிவிக்கிறது.
காஷ்மீர் எல்லையில் 2 பேர் சுட்டு கொலை : இதற்கிடையில் காஷ்மீரில் பந்திப்பூரா பகுதியில் பாகிஸ்தான் இந்திய எல்லையில் இந்தியாவிற்குள் நுழைய முயன்ற 2 பயங்கரவாதிகள் சுட்டுக்கொல்லப்பட்டனர். இந்த பயங்கரவாதிகளிடம் இருந்து நவீனரக செல்போன் ஆயுதங்கள் இருந்தது. கெரன் பகுதியில் நுழைய முயன்ற 2 பயங்கராவதிகளும் கொல்லப்பட்டனர். இவர்களிடம் இருந்து பாகிஸ்தான் ராணுவ அடையாள அட்டை இருந்தது கண்டுபிடிக்கப்பட்டுள்ளது.


Source: http://www.dinakaran.com

தீவிரவாத தாக்குதல்கள் : இதற்கு முன்...

இந்தியா மற்றும் உலகளவில் தீவிரவாத தாக்குதல்களில் ஏராளமானோர் பலியாகியுள்ளனர்.பயங்கரவாதிகள் பொதுமக்களை பிணைக்கைதிகளாக்குவதும் தொடர்கதையாகிவருகிறது. இதற்குமுன் நடந்த சம்பவங்கள் தொகுப்பு இதோ...
1977- ஜப்பான் ரெட் ஆர்மி: ஜப்பானை சேர்ந்த "ஜப்பான் ரெட் ஆர்மி' எனப்படும் பயங்கரவாத அமைப்பு இந்திய மண்ணில் வான்வழிக் கடத்தலை கடந்த 1977 ம் ஆண்டு செப்., 28 ம் தேதி அரங்கேற்றியது. பாரிசிலிருந்து, டோக்கியோ ஹனேடா விமான நிலையத்துக்கு "டோக்லஸ்' டிசி-8 வகை விமானம் சென்றது. மும்பையில் தரையிறங்கிய இவ்விமானத்தில் 156 பயணிகள் இருந்தனர். மும்பையிலிருந்து இவ்விமானம் கிளம்பியவுடன், 5 பேர் கொண்ட "ஜப்பான் ரெட் ஆர்மி' குழு விமானத்தை தங்களது கட்டுப்பாட்டுக்குள் கொண்டு வந்தனர். இவர்கள் விமானத்தை வங்கதேசத் தலைநகர் தாகாவுக்கு செலுத்துமாறு கட்டளையிட்டனர். கடத்தப்பட்டவர்களை விடுவிக்க 30 கோடி ரூபாயும், சிறையில் உள்ள தங்கள் இயக்கத்தை சேர்ந்த 9 பேரையும் விடுதலை செய்ய வேண்டும் என்று ஜப்பான் அரசிடம் நிபந்தனை விதித்தனர். பயங்கரவாதிகளின் நிபந்தனையை ஜப்பானிய அரசு ஏற்றுக் கொண்டது. அதன் படி அக். 2 ம் தேதி பணத்தையும், 6 பயங்கரவாதிகளையும் தாகாவுக்கு அனுப்பி வைத்தது. உடனடியாக 118 பேரை பயங்கரவாதிகள் விடுதலை செய்தனர். அதன் பிறகு குவைத் விமான நிலையம் சென்று அங்கு 11 பயணிகளை விடுவித்தனர். மற்ற பயணிகள் அல்ஜீரியாவில் விடுதலை செய்யப்பட்டனர். 5 நாட்கள் நீடித்த இக்கடத்தலில் எந்த உயிர்ச்சேதமும் ஏற்படவில்லை.
1995 - அல்-பரான்: காஷ்மீரில் அனந்த்நாக் மாவட்டத்தில் உள்ள பகல்காமில், 1995ம் ஆண்டு ஜூலை 4 ம் தேதி, வெளிநாட்டு சுற்றுப்பயணிகள் சிலரை, அல்-பரான் பயங்கரவாத அமைப்பு கடத்தியது. பிரிட்டன், அமெரிக்கா, ஜெர்மன், நார்வே உள்ளிட்ட நாடுகளிலிருந்து வந்த 6 பேர் பயங்கரவாதிகள் பிடியில் சிக்கினர். சிறையில் இருந்த மவுலானா மசூத் அசார் மற்றும் 20 பயங்கரவாதிகளை விடுதலை செய்தால் மட்டுமே, 6 பேரை விடுவிப்பதாக அல்-பரான் கோரிக்கை விடுத்தது. கடத்தப்பட்டவர்களை விடுவிக்க இந்திய அரசின் சார்பில் பல்வேறு முயற்சிகள் மேற்கொள்ளப்பட்டன. ஆனால் எந்த பயனும் இல்லை. நார்வேயை சேர்ந்த ஆஸ்ட்ரோவின் சடலம், தலை வெட்டப்பட்ட நிலையில் 1995 ம் ஆண்டு ஆக., 13 ம் தேதி பகல்காம் அருகே கண்டுபிடிக்கப்பட்டது. மற்றவர்களை பற்றிய தகவல் கடைசி வரை கிடைக்கவில்லை.
1999- காந்தகார் விமான கடத்தல்: கடந்த 1999 ம் ஆண்டு டிச., 24 ம் தேதி நேபாளத் தலைநகர் காத்மாண்டுவிலிருந்து டில்லி புறப்பட்ட ஐ.சி-814 என்ற விமானத்தை பயங்கரவாதிகள் கடத்தினர். இதில் 174 பயணிகள் இருந்தனர். இந்தியாவில் சிறையில் உள்ள பயங்கரவாதிகளை விடுதலை செய்யுமாறு, நிபந்தனை விதித்தனர். அமிர்தசரசில் தரையிறக்கி விமானத்தில் எரிபொருள் நிரப்பித் தருமாறு பயங்கரவாதிகள் இந்திய அரசிடம் கேட்டனர். விமானத்தில் இருந்த 25 வயதான ரூபின் கத்யால் என்பவரை கத்தியால் குத்தினர். பின்னர் விமானத்துக்கு எரிபொருள் வழங்கப்பட்டது. லாகூர் சென்ற விமானம் அங்கிருந்து துபாய் சென்றது. துபாய் போகும் வழியில் பயங்கரவாதிகளால் குத்தப்பட்ட ரூபின் கத்யால் இறந்தார். துபாயில் 25 பேர் விடுவிக்கப்பட்டனர். அங்கிருந்து ஆப்கானிஸ்தானில் உள்ள காந்தகாருக்கு விமானம் சென்றது. பயங்கரவாதிகளின் நிபந்தனைகளுக்கு ஒப்புக் கொண்ட இந்திய அரசு, மவுலானா மசூத் அசார், முஸ்டாக் அகமது சர்க்கார், அகமது உமர் சயீது ஆகிய மூன்று பேரை விடுதலை செய்தது. இதனை அடுத்து பயணிகள் அனைவரும் விடுவிக்கப்பட்டனர். தலிபான் கட்டுப்பாட்டிலிருந்த ஆப்கான் அரசு உதவியுடன் பயங்கரவாதிகள் தப்பி சென்றனர். 8 நாட்கள் நடந்த இக்கடத்தலில் ஒருவர் மட்டுமே உயிரிழந்தார்.
2002 - அக்ஷர்தாம் கோயில் முற்றுகை: குஜராத் தலைநகர் காந்திநகரில் உள்ள அக்ஷர்தாம் கோயிலுக்குள், பயங்கரவாதிகள் கடந்த 2002 ம் ஆண்டு செப். 25 ம் தேதி நுழைந்து தாக்குதல் நடத்தினர். அப்போது கோயிலில் 600 பேர் வழிபாட்டுக்கு வந்திருந்தனர். உடனடியாக அங்கிருந்த ஒரு பெண்ணையும், கோயில் அலுவலர் ஒருவரையும் கொன்றனர். கோயிலுக்குள் இருந்தவர்களை நோக்கி சரமாரியாக பயங்கரவாதிகள் குண்டுகளை வீசினார். தேசிய பாதுகாப்பு படையை சேர்ந்த கமாண்டோ வீரர்கள், கோயிலுக்குள் புகுந்து பயங்கரவாதிகள் மீது தாக்குதல் நடத்தி, அங்குள்ளவர்களை பாதுகாப்பாக மீட்கும் பணியில் ஈடுபட்டனர். 2 நாட்கள் நடந்த இம்மோதலில் 29 பக்தர்கள் உயிரிழந்தனர். 79 பேர் காயமடைந்தனர். இச்சம்பவத்தில் 2 பயங்கரவாதிகள் உட்பட மொத்தம் 33 பேர் பலியானார்கள்.
"பிணை கைதிகள்' தொடரும் பயங்கரம்! : இதற்கு முன் வெளிநாடுகளில் ஏராளமான பயங்கரவாத பிணைக்கைதி சம்பவங்கள் அரங்கேறியிருக்கின்றன.
இவற்றில் முக்கிய சம்பவங்களின் தொகுப்பு:
1977 மே, நெதர்லாந்து: பள்ளியில் இருந்த 105 குழந்தைகளை பயங்கரவாதிகள் பிணைக்கைதிகளாக்கினர். 20 நாட்களுக்குபின் குழந்தைகள் எந்த பாதிப்பும் இன்றி மீட்கப்பட்டனர்.
1977 செப்டம்பர், மேற்கு ஜெர்மனி: மூனிக் நகரில் நடந்த ஒலிம்பிக் போட்டியின் போது இஸ்ரேல் ஒலிம்பிக் குழுவை சேர்ந்த 9 பேரை "பிளாக் செப்டெம்பர்' என்ற பயங்கரவாத அமைப்பு கடத்தியது. இந்த சம்பவம் 21 மணி நேரம் நீடித்தது. இதில் இஸ்ரேல் ஒலிம்பிக் குழுவை சேர்ந்த 11 பேர் பலியானார்கள்.
1979 நவம்பர், ஈரான்: அமெரிக்க தூதரகத்தை கைப்பற்றிய ஈரான் புரட்சிக்குழுவை சேர்ந்த பயங்கரவாதிகள், 52 அமெரிக்க அதிகாரிகளை பிணைக்கைதிகளாக்கினர். 444 நாட்களுக்கு பின்னர் பிணைக்கைதிகள் விடுவிக்கப்பட்டனர்.
1980 பிப்ரவரி, கொலம்பியா: டொமினிக்கன் குடியரசு நாட்டின் தூதரகம் கொரில்லா படையினரால் கைப்பற்றப்பட்டது. 60 பேர் பிணைக்கைதிகளாகினர். 61 நாட்கள் இந்த கடத்தில் சம்பவம் நீடித்தது. பணத்தை பெற்றுக்கொண்டு, பிணைக்கைதிகளை விடுவித்தனர்.
1994 டிசம்பர், அல்ஜீரியா: ஏர் பிரான்ஸ்விமானத்தை கைப்பற்றிய பயங்கரவாதிகள் 232 பேரை பிணைக்கைதிகளாக்கினர். கடத்தல்காரர்களுடன் நடந்த மோதலில் 3 பயணிகள் உட்பட 7 பேர் கொல்லப்பட்டனர். இந்த சம்பவம் நான்கு நாட்கள் நீடித்தது.
1996 ஜனவரி, கருங்கடல்: துருக்கியில் இருந்து ரஷ்யாவுக்கு புறப்பட்ட கப்பல் கருங்கடல் பகுதியில் செசன்ய பயங்கரவாதிகளால் கடத்தப்பட்டது. 232 பேர் பிணைக்கைதிகளாக்கப்பட்டனர். நான்கு நாட்களுக்குபின் அனைவரும் மீட்கப்பட்டனர்.
1996 டிசம்பர், பெரு: லிமா நகரில் உள்ள ஜப்பானிய தூதரகத்தை துபாக் அமரு புரட்சிக்குழுவை சேர்ந்த 14 பேர் கைப்பற்றினர். நூற்றுக்கணக்கான அரசு அதிகாரிகள், ராணுவ அதிகாரிகளை பிணைக்கைதிகளாக பிடித்துக்கொண்டனர். 126 நாள் நீடித்த இந்த சம்பவத்தின் ராணுவ நடவடிக்கைக்குப் பின்னர் அனைத்து பிணைக்கைதிகளும் விடுவிக்கப்பட்டனர்.
2002 அக்டோபர், ரஷ்யா: மாஸ்கோ நகரில் இருந்த ஒரு திரையரங்கை செசன்ய பயங்கரவாதிகள் கைப்பற்றினர். 850 பேரை பிணைக்கைதிகளாக்கினர். 129 பிணைக்கைதிகள் பலியானார்கள்.
2004 செப்டம்பர், ரஷ்யா: ஒரு பள்ளியில் ஆயுதங்களுடன் புகுந்த பயங்கரவாதிகள் குழந்தைகள் உட்பட ஆயிரத்து 100 பேரை பிணைக்கைதிகளாக்கினர். 3 நாட்கள் நீடித்த இந்த சம்பவத்தில் 186 குழந்தைகள் உட்பட 334 பேர் கொல்லப்பட்டனர்.
2007 ஜூலை, ஆப்கானிஸ்தான்: தென் கொரியாவை சேர்ந்த 23 பேரை தலிபான்கள் பிணைக்கைதியாக்கினர். இதில் இரண்டு பேர் கொல்லப்பட்டனர். 42 நாட்கள் இந்த சம்பவம் நீடித்தது. பேச்சுவார்த்தைக்கு பின்னர் மற்ற பிணைக்கைதிகள் விடுவிக்கப்பட்டனர்.
கருப்பு ஆண்டு - 2008: இந்த ஆண்டில் மட்டும் இந்தியாவில் பல்வேறு இடங்களில் நடந்த பயங்கரவாத தாக்குதல்களில் நூற்றுக்கணக்கானோர் உயிரிழந்தனர்.
நவ., 26, மும்பை: ஐந்து நட்சத்திர ஓட்டல்கள் உட்பட ஏழு இடங்களில் பயங்கரவாதிகள் நடத்திய தாக்குதலில் நூற்றுக்கணக்கானோர் பலி.
அக்., 30, அசாம்: மாநிலம் முழுவதும் 18 இடங்களில் நடந்த குண்டுவெடிப்புகளில் 45 பேர் பலி.
அக்., 21, இம்பால்: மணிப்பூர் போலீஸ் கமாண்டோ காம்ப்ளெக்ஸ் அருகே சக்திவாய்ந்த குண்டுவெடித்ததில் 18 பேர் பலி.
அக்., 14, கான்பூர்: கலோனல்கஞ்ச் மார்க்கெட் பகுதியில் சைக்கிளில் வைககப்பட்டிருந்த குண்டுவெடித்ததில் 8 பேருக்கு காயம்.
செப்., 29, மாலேகான்: மார்க்கெட் பகுதியில் மோட்டார் சைக்கிளில் வைக்கப்பட்டிருந்த குண்டுவெடித்ததில் 5 பேர் பலி.
செப்., 29, மொடாசா: மசூதி அருகில் மோட்டார்சைக்கிளில் வைக்கப்பட்டிருந்த குண்டுவெடித்ததில் ஒருவர் பலி.
செப்., 27, டில்லி: மெஹ்ரோலியில் மார்க்கெட் பகுதியில் குண்டுவீசப்பட்டதில் 3 பேர் பலி.
செப்., 13, டில்லி: நாடு முழுவதும் ஆறுஇடங்களில் நடந்த குண்டுவெடிப்பு சம்பவங்களில் 26 பேர் பலி.
ஜூலை 26, ஆமதாபாத்: இரண்டு மணிநேரத்துக்குள்ளாக அடுத்தடுத்து நடந்த 20 குண்டுவெடிப்புகளில் 57 பேர் பலி.
ஜூலை 25, பெங்களூரு: சக்திகுறைந்த குண்டுவெடித்ததில் ஒருவர் பலி.
மே 13, ஜெய்ப்பூர்: தொடர் குண்டுவெடிப்பில் 68 பேர் பலி.
மீண்டும் மும்பையில் சோகம்: கடந்த 15 ஆண்டுகளில் இந்தியாவின் வர்த்தக தலைநகரான மும்பை மட்டும் நான்கு முறை கடுமையான பயங்கரவாத தாக்குதல்களை சந்தித்துள்ளது.
2008 நவ. 26: வெளிநாட்டினர் தங்கும் ஓட்டல்கள் உட்பட ஏழு இடங்களில் பயங்கரவாதிகள் தாக்குதல் நடத்தியதில் நூற்றுக்கும் மேற்பட்டோர் கொல்லப்பட்டனர்.
2006 ஜூலை 11: மும்பையில் புறநகர் ரயில்கள் மற்றும் ரயில் நிலையங்களில் நடந்த குண்டுவெடிப்புகளில் 200க்கும் மேற்பட்டோர் பலியானர்கள்.
2003 ஆக. 25: மும்பையில் இரண்டு இடங்களில் நடந்த குண்டுவெடிப்பில் 46 பேர் கொல்லப்பட்டனர்.
1993 மார்ச் 12: ஸ்டாக் எக்சேஞ்ச், ஓட்டல்கள், ஏர் இந்தியா அலுவலகம், விமான நிலையம் உள்ளிட்ட முக்கிய இடங்களில் நடந்த தொடர்குண்டுவெடிப்பில் 257 பேர் பலியானார்கள்.