நெட்டுக்கு அடிமையாகும் டீன்-ஏஜ்

மெல்போர்ன் : டீன்-ஏஜ் வயதினர் நெட்டை தொடர்ந்து பயன்படுத்தி, அதற்கு அடிமையாகும் நிலைக்கு மாறிவருகின்றனர். அவ்வாறு அடிமையாகும் நிலைக்கு மாறுபவர்களுக்கு, இரண்டு மடங்கு மனநிலை சம்பந்தமான நோய்களுக்கு உள்ளாகின்றனர். இதற்கு முந்தைய ஆய்வுகளில், மணிக்கணக்கில் ஆன்லைனில் இருப்பதால், அவர்கள் வேறு வேலைகளில் ஈடுபடமுடியாத நிலை ஏற்படும் என கூறியிருந்தன. ஆனால் தற்போது, வெப் தொடர்ந்து பயன்படுத்துவதனால், மனஅழுத்தம் ஏற்படுவதாக ஆய்வுகள் தெரிவிக்கின்றன. விடலை பருவத்திற்கான சீன பத்திரிக்கை ஒன்று, சராசரியாக 15வயதுடைய 1000 பேரிடம் ஆய்வு மேற்கொண்டதில், பெரும்பாலானவர்கள் மன உளைச்லுக்கு ஆளாகி இருப்பதாக தகவல்கள் வெளியிட்டுள்ளது. அவர்களிடம் மேற்கொண்ட கேள்வியில், ஆன்லைன் உபயோகிப்பதற்கு முன் இருந்த மன நிலையும், ஆன்லைன் உபயோகித்தபின் இருந்த மனநிலையும் குறித்த கேள்வியும் அடங்கியிருந்தது. 9மாத ஆய்விற்கு பிறகு, சோதனை செய்ததில் 1000க்கு 87 பேர் மன தொய்வு அல்லது மனஉளைச்சலுக்கு ஆளாகி இருந்தனர். சாதாரணமானவர்களை விட இன்டெர்நெட் பயன்படுத்தியவர்கள் இரண்டரை முறை அதிக மனஉளைச்சலுக்கு ஆளாகி இருந்ததாக ஆராய்ச்சியாளர் தெரிவித்தார். இந்த ஆய்வை, ஆஸி., சிட்னியில் உள்ள லாரன்ஸ் லாம் மருத்துவ கல்லூரி, சி-வென் பெங்க் கல்வி அமைச்சகம் மற்றும் சீனாவின் சன் யாட்-சென் பல்கலை., இணைந்து நடத்தியது. ஆய்வின் முடிவில், இளம் வயதினர் தொடர்ந்து இன்டர்நெட்டை பயன்படுத்துவதனால், மனஉளைச்சல், மற்றும் மனநலன்களில் பிரச்னைகள் ஏற்படும் என கருத்து தெரிவித்துள்ளது.

போக்குவரத்து நெரிசல் பற்றி எஸ்எம்எஸ் மூலம் தகவல்

சென்னை: போக்குவரத்து நெரிசல் இருக்கும் இடங்கள் பற்றி செல்போனில் எஸ்எம்எஸ் மூலம் அறிவிக்கும் திட்டத்தை விரைவில் அமல்படுத்த உள்ளதாக போக்குவரத்து போலீஸ் கூடுதல் கமிஷனர் ஷகீல் அக்தர் கூறினார். நகரில் போக்குவரத்து நெரிசல் உள்ள தெருவில் வாகன ஓட்டிகள் செல்ல வேண்டாம். மாற்று பாதையில் செல்ல வேண்டும்ÕÕ என்பது பற்றி, 13 எம்எப் ரேடியோவில் அறிவிக்கும் திட்டத்தை போக்குவரத்து கூடுதல் கமிஷனர் ஷகீல் அக்தர் நேற்று அறிமுகம் செய்தார். பின் நிருபர்களிடம் அவர் கூறியதாவது: சென்னையில் சாலையின் அகலம் குறைவாக இருந்தாலும் வாகனங்கள் நெரிசல் இல்லாமல் செல்லவும், மாற்று வழி ஏற்படுத்தவும், மழை காலங்களில் உள்ள சிரமங்களை போக்கவும் எப்எம் ரேடியோ மூலம் போக்குவரத்து விவரத்தை அறிவிக்கும் திட்டத்தை அறிமுகம் செய்துள்ளோம். வாகனங்கள் நெரிசல், ஊர்வலம் ஆகியவற்றால் நெரிசல் ஏற்பட்டாலும் உடனுக்குடன் தெரிவிக்கப்படும். போக்குவரத்து கட்டுப்பாட்டு அறையில் இதற்காக சிறப்பு போலீசார் ஈடுபடுத்தப்பட்டுள்ளனர்.விரைவில் செல்போனில் எஸ்எம்எஸ் மூலம் சென்னையில் உள்ளவர்களுக்கு நெரிசல் குறித்து அறிவிக்கும் திட்டத்தை 20 நாட்களுக்குள் தொடங்க உள்ளளாம். அதேநேரத்தில் போக்குவரத்து நெரிசல் ஏற்பட்டாலும் உடனடியாக விரைந்து சென்று நெரிசல்கள் குறைய நடவடிக்கை எடுக்கப்படும். நகரில் நம்பர் பிளேட் இல்லாமல் சென்றதாக 40 ஆயிரம் பேர் மீது நடவடிக்கை எடுக்கப்பட்டுள்ளது. அதேபோல விதிமுறை மீறியதாக 40 ஆயிரம் ஆட்டோக்கள் மீது வழக்குப்பதிவு செய்யப்பட்டுள்ளது. மேலும் 458 ஆட்டோக்கள் பறிமுதல் செய்யப்பட்டு, போக்குவரத்து துறையிடம் ஒப்படைக்கப்பட்டுள்ளது. போக்குவரத்து துறை அதிகாரிகள் அந்த ஆட்டோக்களை ஏலம் விடுவது குறித்து நடவடிக்கை எடுப்பார்கள். இவ்வாறு ஷகீல் அக்தர் கூறினார். பேட்டியின்போது துணை கமிஷனர்கள் மனோகரன், ஜெயகவுரி, முத்துச்சாமி ஆகியோர் உடனிருந்தனர்.

Source: http://www.dinakaran.com

செல் ஒன் பேன்சி எண்கள் ஒரு வாரம் ஏலம்

சென்னை: சென்னை தொலைபேசி நிறுவனம் வித்தியாசமான 1520 செல்போன் எண்களை ஏலம் விட உள்ளது. இந்த எண்கள் வித்தியாசத்திற்கு ஏற்ப (உதாரணம்: 94458 66666 முதல் வகை) , ((94458 67777 2வது வகை), (94458 68000 3வது வகை) என 3 வகையாக பிரிக்கப்பட்டுள்ளன. இன்று காலை 10 மணி முதல் ஒரு வாரத்துக்கு ஏலம் நடைபெறும். செல்போன் மூலம் ஏலம் கேட்கலாம். இதற்கு எஸ்எம்எஸ் மூலம் முதலில் பதிவு செய்ய வேண்டும். அதற்கு ரூ.50 கட்டணம். பிறகு விரும்பும் எண்ணை அதற்கான தொகையை குறிப்பிட்டு எஸ்எம்எஸ் செய்ய வேண்டும். எண்களின் வித்தியாசத்திற்கு ஏற்ப ரூ.1000, 2000, 3000 என அடிப்படை விலை நிர்ணயிக்கப்பட்டுள்ளது. அதிலிருந்து நூறின் மடங்குகளாக ஏலம் கேட்கலாம். ஒவ்வொரு எஸ்எம்எஸ்சுக்கும் ரூ.1.50 கட்டணம். ஏலத்தில் பங்கேற்கும் பிரீபெய்டு வாடிக்கையாளர்கள் தங்கள் கணக்கில் குறைந்தபட்சம் ரூ.300 வைத்திருக்க வேண்டும்.

Source : http://www.dinakaran.com

அதிரடி ஆள்குறைப்பு: சத்யம் நிறுவனத்தில் 6400 பேர் வேலை நீக்கம்

ஐதராபாத்தை தலைமையிடமாக கொண்டு சத்யம் கம்ப்யூட்டர் நிறுவனம் செயல்பட்டு வந்தது. 25 ஆயிரத்துக்கும் மேற்பட்ட ஊழியர்கள் பணியாற்றி வந்தனர். இந்த நிறுவனத்தில் அதிபர் ராமலிங்க ராஜூ நிறுவனங்களில் மோசடி செய்து இருப்பது கண்டுபிடிக்கப்பட்டது. இதையடுத்து அவர் கைது செய்யப்பட்டு ஜெயிலில் அடைக்கப்பட்டார்.



அதன் பிறகு சத்யம் நிறுவனத்தை மத்திய அரசு அமைத்த குழு நிர்வாகம் செய்தது. பின்னர் மகேந்திரா நிறுவனம் சத்யம் கம்ப்யூட்டரை வாங்கி விட்டது.



இதையடுத்து இந்த நிறுவனம் ஊழியர்களை குறைக்கும் பணியில் ஈடுபட்டுள்ளது. இங்கு வேலை பார்த்த 9 ஆயிரம் ஊழியர்களுக்கு கடந்த ஜூன் மாதம் கட்டாய விடுமுறை அளித்து பணியில் இருந்து தற்காலிகமாக நிறுத்தி இருந்தனர். அவர்களில் 1600 ஊழியர்களை திரும்ப அழைத்து கொண்டனர்.



இந்த நிலையில் மீதி உள்ள 6400 ஊழியர்களுக்கு நிர்வாகம் நேற்று இ.மெயில் ஒன்று அனுப்பி உள்ளது. அதில் உங்களை பணியில் தொடர வைக்க முடியாது. டிசம்பர் 18-ந் தேதிக்குள் உங்கள் கணக்குகளை முடித்து பணத்தை பெற்றுக் கொள்ளுங்கள் என்று அறிவிக்கப்பட்டு உள்ளது.



எனவே 6400 ஊழியர்களும் திடீரென வேலையை இழந்துள்ளனர்.

சிங்கப்பூர் கப்பலுடன் இந்தியர்கள் கடத்தல்

புதுடில்லி : இந்தியப் பெருங்கடலில், ஏடன் வளைகுடா அருகே சென்ற சிங்கப்பூர் கப்பலை, சோமாலிய கடல்கொள்ளையர்கள் கடத்திச் சென்றனர். இந்த கப்பலில் இருந்த இரண்டு இந்தியர்களும் கடத்தப்பட்டுள்ளனர்.சோமாலியா நாட்டில் நிரந்தர அரசு ஏதும் இல்லை. வன்முறையாளர்கள் ஒவ்வொரு குழுவாக செயல்பட்டு ஒவ்வொரு பகுதியை தங்கள் கட்டுப்பாட்டில் வைத்துக் கொண்டுள்ளனர். இந்த வன்முறையாளர்களில் சிலர் கடல் கொள்ளையர்களாக உள்ளனர்.
ஏடன் வளைகுடா பகுதியில் செல்லும் சர்வதேச கப்பல்களை துப்பாக்கி முனையில் நிறுத்தி கடத்திச் செல்வதும், கணிசமான பிணைய தொகையைப் பெற்றுக் கொண்டு கப்பலை விடுவிப்பதும் வாடிக்கையாக உள்ளது.இந்த ஆண்டில் மட்டும், நூற்றுக்கும் அதிகமான கப்பல்களை சோமாலிய கடல் கொள்ளையர்கள் கடத்தியுள்ளனர். இதற்கிடையே, கடந்த 15ம் தேதி "எம்.வி.கோட்டா வாஜர்' என்ற சிங்கப்பூர் கப்பல், செஷல்ஸ் தீவுக்கு அருகே சென்ற போது, சோமாலிய கடல் கொள்ளையர்களால் கடத்தப்பட்டது. இந்த கப்பலில் இரண்டு இந்தியர்கள், இலங்கை, இந்தோனேசியா, பாகிஸ்தான் ஆகிய நாடுகளைச் சேர்ந்த ஊழியர்களும் உள்ளனர்.கப்பலையும், கப்பலில் இருக்கும் ஊழியர்களையும் மீட்க, கப்பல் நிறுவனம் சிங்கப்பூர் அரசின் உதவியை கோரியுள்ளது.
இந்த கப்பலில் உள்ள ரகுவீர் சிங் என்பவரின் மனைவி தீபிகா குறிப்பிடுகையில், "கப்பலில் உள்ளவர்கள் பாதுகாப்பாக இருப்பதாகவும், ஆனால், எப்போது விடுவிக்கப்படுவார்கள் என்பது தெரியவில்லை, எனவும் கப்பல் நிறுவனம் தெரிவித்துள்ளது. கடந்த வாரம் கப்பல் கடத்தப்பட்டது. இந்த தகவலை தெரிந்து நாங்கள் வற்புறுத்தியதன் பேரில் தான், கப்பல் நிறுவனம் நடவடிக்கையில் இறங்கியுள்ளது. எங்களுக்கு பணம் தேவையில்லை. எங்கள் கணவர் விடுவிக்கப்படவேண்டும். கப்பல் நிறுவனத்துக்கு கப்பல் ஊழியர்களின் உயிர் பெரிதாக தெரியவில்லை' என்றார்.ஏடன் வளைகுடா பகுதியில், கடல் கொள்ளையை தடுக்க இந்திய கடற்படையும் ரோந்துப் பணியில் ஈடுபட்டுள்ளது. இருப்பினும் கடல்கொள்ளையர்களின் அட்டகாசத்தை தடுக்க முடியவில்லை.

Source: http://www.dinamalar.com

மொபைல் போன் பாதுகாப்பு வழிகள்

. மொபைல் போன்களுக்குள் திரவங்கள் செல்வது வெகு எளிது. இதனைத் தடுப்பது மிக மிகக் கடினம். தண்ணீர், எண்ணெய், பால், டீ, கூல் ட்ரிங்க், ஷேவிங் கிரீம் என எது வேண்டுமானாலும் மொபைல் உள்ளே செல்லலாம். எனவே இவற்றிலிருந்து கூடுதல் கவனத்துடன் தள்ளி இருக்க வேண்டும். ஈரப்பதத்தினால் போன் கெட்டுப் போனால் அதனைச் சரி செய்வது கடினம். அப்படிக் கெட்டுப் போனால் போனை விற்பனை செய்தவர் போன் வாரண்டி காலத்தில் இருந்தாலும் ஏற்றுக் கொள்ளமாட்டார்.
2. திரையில் உள்ள லிக்விட் கிறிஸ்டல் டிஸ்பிளே (LCD) மீது அழுத்தத்தைப் பிரயோகித்தால் திரை கெட்டுவிட வாய்ப்பு உள்ளது. எனவே பாக்கெட்டில் போனை வைத்திடுகையில் ஏதேனும் கூர்மையான அல்லது பாதிப்பு ஏற்படுத்தக் கூடிய பொருள் மொபைல் போனுடன் உரசிக் கொண்டிருக்கிறதா என்பதைக் கவனித்துச் செயல்படவும். போம் கவர்கள் அல்லது பிளாஸ்டிக் கவர்கள் இந்த வகையில் பாதுகாப்பு தரலாம்.
3. சூரிய ஒளியில் மொபைல் போன்களை அதிகம் வெளிக் காட்டக் கூடாது. இதன் மூலம் போனின் பளபளப்பு மற்றும் வண்ணம் மாறும் வாய்ப்புண்டு. சூரிய ஒளியினைத் தடுப்பதிலும் சிறிய பைகள் மற்றும் பிளாஸ்டிக் கவர்கள் உதவுகின்றன.
4. ஒவ்வொரு மொபைல் வாங்கி இயக்கத் தொடங்கியவுடன் *#06# என்ற எண்ணை அழுத்தி அதன் தனி அடையாள
எண்ணைத் (International Mobile Equipment Identity) தெரிந்து வைத்துக் கொள்ளுங்கள். உங்கள் மொபைல் போனுக்கான வாரண்டி இதனைச் சார்ந்ததாகும். மேலும் உங்கள் மொபைல் தொலைந்து போனால் இந்த எண்ணைக் கொண்டு தேடிக் கண்டுபிடிக்கலாம்.
5. எலக்ட்ரானிக் சாதனங்கள் அனைத்துமே தூசியினால் கெட்டுப் போகும் வாய்ப்புள்ளவை. எனவே நல்ல கவர் போட்டு மூடியவாறே பயன்படுத்துவது நல்லது.
6. உங்கள் மொபைல் போனில் ஏதேனும் ஒரு ஆண்டி வைரஸ் சாப்ட்வேர் தொகுப்பைப் பதிந்து வைப்பது நல்லது.
7. விரலால் கீ பேடினை இயக்கவும். விரல் நகங்கள் மற்றும் கூர்மையான சாதனங்கள் கீ பேடிற்குத் தீங்கு விளைவிக்கும்.
8. வெகு காலத்திற்கு மொபைலைப் பயன்படுத்தப்போவது இல்லை என்றால் பேட்டரியினைக் கழற்றி வைக்கவும்.
9. மொபைல் போனுடன் எந்த துணைச் சாதனத்தை அல்லது பேட்டரியைப் பயன்படுத்துவதாக இருந்தாலும் மொபைலைத் தயாரித்த நிறுவனம் அங்கீகரித்த சாதனங்களை மட்டுமே பயன்படுத்தவும்.
10. சிறிய மொபைல் போனில் எக்கச்சக்க வசதிகளைத் தருவதில் இன்றைய மொபைல் நிறுவனங்கள் முயற்சித்து வடிவமைத்து வருகின்றன. இதற்கேற்ற வகையில் மொபைலில் பயன்படுத்தப்படும் சர்க்யூட் போர்டுகள் பல லேயர்களாக அமைக்கப்பட்டுள்ளன. இவை அனைத்தும் சிறிய தள வரிசைகளாக நிற்க வைக்கப்பட்டுள்ளதால் சிறிய அதிர்ச்சி கூட இவற்றின் செயல்பாட்டினை முடக்கும். இவற்றைத் தடுப்பதிலும் சிறிய போம் பைகள் அல்லது கவர்கள் பெரும் பங்கு வகிக்கின்றன. மேலும் இத்தகைய வழிகளில் சேதம் ஏற்பட்டாலும் நிறுவனங்கள் ஏற்றுக் கொள்வதில்லை.
11. அடிக்கடி சார்ஜ் செய்யப்படும் மொபைல் பேட்டரிகள் விரைவில் வீணாகும் வாய்ப்பு உண்டு. எனவே பேட்டரி சார்ஜர்களை எடுத்துச் சென்று தேவைப்படும்போது மட்டும் பயன்படுத்தவும்.
12. நோக்கியா போன்கள் ரிசர்வ் பேட்டரியுடனேயே வருகின்றன. எனவே பேட்டரி சார்ஜ் தீருகையில் *3370# என்ற எண்ணைப் பயன்படுத்தவும். இந்த எண்ணை அழுத்தினால் ரிசர்வ் பேட்டரி செயல்படுத்தப்பட்டு மொபைலின் பேட்டரி திறன் 50% கூடுவதைக் காணலாம்.
13. மொபைல் போனுடன் வரும் மேனுவல் என்னும் பயன்படுத்துவதற்கான குறிப்பு புத்தகத்தினை படித்து தெரிந்து கொண்டு மொபைலைப் பயன்படுத்தவும்.
14. உங்கள் நெட்வொர்க்கினைத் தாண்டி விட்டீர்களா? மொபைல் போனை ஆப் செய்வது நல்லது. இல்லையேல் பேட்டரி பவர் வீணாகும்.
15. பேட்டரியை மொபைல் போனிலிருந்து வெளியே எடுக்கப் போகிறீர்களா? முதலில் மொபைலை ஆப் செய்துவிட்டு பின் எடுங்கள்.
16. தேவைப்படும்போது மட்டும் புளுடூத் வசதியை இயக்கவும். மற்ற நேரங்களில் அதனை ஆப் செய்து வைப்பது பேட்டரி மற்றும் உங்கள் மொபைல் போனுக்கு நல்லது.

இ-டிக்கெட் போல இ-கன்னிகா தானம்

வதோதரா: ரயில், விமான டிக்கெட் களை முன்பதிவு செய்ய இன்டர்நெட் மூலம் "எலக்ட் ரானிக் டிக்கெட்' என்று சொல்லப்படும் "இ-டிக்கெட்' வசதி உள்ளது; இதில் இப்போது புதிதாக அரங்கேறி உள்ளது எது தெரியுமா? "இ-கன்னிகா தானம்!' என்ன வியப்பாக இருக்கிறதா? பெண்ணை பெற்றவர், மருமகனிடம் மகளை, திருமணத்தின் போது தாரை வார்த்துத் தரும் வைபவம் தான் கன்னிகா தானம். "என் மகளை உங்களிடம் ஒப்படைக்கிறேன்; கண்கலங்காமல் வாழ வைக்க வேண்டும்' என்பது தான் அதன் நோக்கம்.
கடவுளை தரிசிப்பது, பூஜை செய்வது, வீட்டு சடங்குகள் செய்வது மட்டுமல்ல இப்போது, கன்னிகா தானம் தருவதும் கம்ப்யூட்டர் இன்டர்நெட் மூலம் செய்யலாம் என்ற வசதி அமலுக்கு வந்து விட்டது. அமெரிக்காவில் தொழிலதிபராக இருப்பவர் சந்திரவதன் சுதார்(48). நிதி நெருக்கடியில் சிக்கித் தவிக்கும் நிறுவனங்களுக்கு இடையே போட்டி போட்டு வர்த்தகம் செய்வதே பெரும் பாடு என்பதால், அவரால் தன் மகள் திருமணத்தை சொந்த மாநிலம் குஜராத்துக்கு வந்து நடத்த முடியவில்லை. அதற்கேற்ப, அவர் குடும்பத்து உறவினர், நண்பர்களும் அமெரிக்காவில் கணிசமான பேர் உள்ளனர். அவர்களும் திருமணத்துக்காக சில நாள் வந்து செல்வது பெரும் செலவாகும் என்று கவலைப்பட்டனர்.
இந்த சூழ்நிலையில், அமெரிக்காவில் கம்ப்யூட்டர் முன் பெண்ணும், வதோதராவில் உள்ள வீட்டில், "லேப்-டாப்' முன் மாப்பிள்ளையும் சமீபத்தில் திருமண நாள் அன்று ஆஜராயினர். இரு தரப்பிலும் உறவினர், நண்பர்கள் வந்து விட்டனர். அமெரிக்காவில் உள்ள சந்திரவதன், தன் பெண் ஹமிக்சாவை, மாப்பிள்ளை அமித் வசானியிடம் கன்னிகாதானம் செய்து வைத்தார். அமெரிக்காவில் உள்ள வீட்டில் நடந்த வைபவம் எல்லாம் கம்ப்யூட்டர் இன்டர் நெட் வழியில், "இ-கான்பரன் சிங்' வசதி மூலம் ஒளிபரப்பானது.
வேதபண்டிதர், கன்னிகா தானம் தரும் மந்திரங்களை சொல்ல அதை சந்திரவதன் சொல்லி, இன்டர்நெட் வழியாகவே, மாப்பிள்ளைக்கு தன் பெண்ணை கன்னிகா தானம் செய்து வைத்தார். மற்ற சடங்குகளும் முடிந்து, கம்ப்யூட்டர் வழியாகவே, பெண்ணை தன் மனைவியாக ஏற்றுக் கொண் டார் மருமகன் அமித் வசானி. இரு பக்கமும் அவரவர் வீடுகளில் இருக்கும் கம்ப்யூட்டர்களில் பார்த்து, உறவினர்களும், நண்பர்களும் பூக்களை சொரிந்து வாழ்த்தினர். இந்த வைபவம் முடிந்ததும், வதோதராவில் உள்ள வீட்டில் மாப்பிள்ளை வீட்டார் அளித்த விருந்தை அவரின் உறவினர், நண்பர்கள் சாப்பிட்டனர். அதுபோல, நியூ ஜெர்சியில் பெண்ணின் உறவினர் மற்றும் நண்பர்களுக்கு விருந்து அளிக்கப்பட்டது.

கால் சென்டர்கள் மீண்டும் அமெரிக்கா போகுது: இந்தியர் ஆங்கிலம் அமெரிக்கர்களுக்கு பிடிக்கலையாம்

வாஷிங்டன்: சர்வதேச நிதி நெருக்கடி காரணமாக, சாப்ட்வேர் நிறுவனங்களுக்கு பெருத்த அடி விழுந்த நிலையில், கால் சென்டர்களுக்கு தொடர்ந்து அடிமேல் அடி விழும் என்று அஞ்சப்படுகிறது.பன்னாட்டு நிறுவனங்கள் இந்தியா உட்பட வெளிநாடுகளில் அமைத்துள்ள கால்சென்டர்களை மீண்டும் அமெரிக்காவுக்கே திரும்ப கொண்டு போக ஆரம்பித்து விட்டன. அமெரிக்காவில் உள்ள மொபைல் போன், வங்கி கணக்கு, இன்சூரன்ஸ் பாலிசி வாடிக்கையாளர்கள், தங்களுக்கு உள்ள சந்தேகங்கள், கேள்விகளை கேட்டு தெரிந்து கொள்ள வேண்டுமானால், அவர்கள் "கால் சென்டர்' போன் நம்பரை சுழற்றலாம். ஆனால், அவர்களுடன் பேசும் கால் சென்டர் ஊழியர், இந்தியாவில் எங்காவது ஒரு இடத்தில் அமர்ந்து பேசுவார். இப்படி, அமெரிக்க நிறுவனங்களுக்காக, இந்தியாவில் பல இடங்களில் "கால் சென்டர்' கள் அமைக்கப்பட்டன.
அமெரிக்க வாடிக்கையாளர்களுக்கு பதில் அளிப்பது தான் இந்த கால் சென்டர்களில் பணியாற்றும் ஊழியர்கள் பணி. அமெரிக்காவை பொறுத்தவரை, அங்கு பகல் என்றால், இந்தியாவில் இரவு நேரம். அதனால், பெரும்பாலான கால் சென்டர்கள், இரவில் தான் சுறுசுறுப்பாக பணியாற்றும். இந்தியாவில் கால் சென்டர்களை அமெரிக்க நிறுவனங்கள் அமைக்க காரணம், செலவு 50 முதல் 75 சதவீதம் வரை மிச்சமாகிறது என்பதால் தான். ஆனால், அமெரிக்க வாடிக்கையாளர்களுக்கு, இந்திய கால் சென்டர் ஊழியர்கள் பலரும் பேசுவதில் திருப்தியில்லை; அதுபோல, நிதி நெருக்கடியும் அமெரிக்க நிறுவனங்களை படுத்துவதால், மீண்டும் பழைய நிலைக்கே போக சில நிறுவனங்கள் முடிவு செய்துள்ளன. அமெரிக்காவில் தலைமையகத்தை கொண்ட டெல் நிறுவனம், இந்தியாவில் உள்ள பெங்களூரு, பிலிப்பைன்சில் உள்ள மணிலா மற்றும் பல நாடுகளில் அமைத்துள்ள கால் சென்டர்களை மூடி விட்டு, மீண்டும் அமெரிக்காவுக்கே மாற்ற திட்டமிட்டு அதற்கான வேலையையும் ஆரம்பித்து விட்டது.
கம்ப்யூட்டர் நிறுவனமான இதில், நிதி நெருக்கடி காரணமாக, அமெரிக்க வாடிக்கையாளர்கள் குறைந்து விட்டதுடன், இந்திய கால் சென்டர்களில் இருந்து பதில் பெறுவதை அவர்கள் விரும்பவில்லை என்பதால், இந்த நடவடிக்கையை மேற்கொண்டுள்ளது டெல். அமெரிக்கரின் உதவி தேவையா, அப்படியானால், அதிக கட்டணம் வசூலிக்கப்படும் என்று அறிவித்தும், அமெரிக்கர் பலரும் அதை பொருட்படுத்தாமல், அமெரிக்க கால் சென்டர்களின் உதவியை பெறவே விரும்புகின்றனர். டெல் நிறுவனத்தை தொடர்ந்து, அமெரிக்காவின் பழம் பெரும் மொபைல் நிறுவனம் "ஜிட்டர்பர்க்'கும் தன் வெளிநாட்டு கால் சென்டர்களை மூடி வருகிறது.

ஐ.டி., மாப்பிள்ளைக்கு மவுசு குறையுது

திருவனந்தபுரம் : சாப்ட்வேர் நிறுவனங்களில் பணியாற்றுவோர் எக்கச்சக்க சம்பள கனவு மங்கி வருவதால், "ஐ.டி.,' மாப்பிள்ளை வேண்டாம் என்று, அந்த துறையில் பணியாற்றும் பெண்களே மறுக்கும் நிலை அதிகரித்து வருகிறது. கேரளாவில் சமீப காலமாக, தகவல் தொழில்நுட்ப துறையில் பணியாற்றும் மாப்பிள்ளைகள் என்றால், அதிக எதிர்ப்பார்ப்பு இருந்தது.
பெண்ணை பெற்ற பல பெற்றோரும், ஐ.டி.,மாப்பிள்ளை வந்தால் தங்கள் பெண் நிம்மதியாக இருப்பாள்; சந்தோஷமாக,வசதியாக வாழ்வாள் என்று எண்ணியிருந்தனர். ஆனால், அவர்கள் கனவு மங்கி வருகிறது. ஐ.டி.,மாப்பிள்ளை என்றாலே பலரும் பயப்படுகின்றனர். திருவனந்தபுரத்தை சேர்ந்த பலரும் இப்போது ஐ.டி.,மாப்பிள்ளை என்றால் அவர்களுக்கு பெண் கொடுக்க தயங்குகின்றனர். சாப்ட்வேர் துறையில் பணியாற்றும் ஒருவருக்கு பெண்ணை தருவதை விட, விவசாயம் பார்க்கும் யாருக்காவது தரலாம் என்று பழைய எண்ணத்துக்கு தூசி தட்டவும் ஆரம்பித்துள்ளனர் சிலர். கேரளாவில் 150 சாப்ட்வேர் நிறுவனங்கள் உள்ளன; ஆண்டுக்கு 1,000 கோடி ரூபாய் வருவாய் கிடைக்கிறது. 25 ஆயிரம் பேர் வேலை செய்கின்றனர். இந்த நிறுவனங்களில், ஊழியர்களுக்கு கைநிறைய சம்பளம் கிடைத்தும் வந்தது. ஆனால், சமீப காலமாக அவர்களுக்கு சம்பள உயர்வும் குறைவு; வேலையில் நீடிக்கும் நிலையும் நிச்சயமில்லாமல் இருக்கிறது. முன்னணி நிறுவனங்களை தவிர, நடுத்தர, சிறிய நிறுவனங்கள், தங்கள் ஊழியர்கள் எண்ணிக்கையில் ஒரு சதவீதம் அளவாவது நீக்கி விட்டன. இன்னும் சிலரை நீக்கும் முடிவில் தீவிரமாக உள்ளன. நிறுவன வருவாயில் அடி விழுந்தது தான் இதற்கு காரணம். அதிலும் சில நிறுவனங்களில், ஊழியர்களிடம் இருந்து அடையாள அட்டையை வாங்கி வைத்துக்கொள்ளும் போதே, அவர்களுக்கு தாங்கள் நீக்கப்படுவோம் என்று தெரிந்துவிடுகிறது. அதனால், பல நடுத்தர நிறுவனங்களில் உள்ள ஊழியர்கள் பீதியுடன் வேலையில் நீடிக்கும் நிலை உள்ளது.

அமெரிக்க நிதி சுனாமியால் ஐ.டி., ஊழியர்கள் கலக்கம்

அமெரிக்காவில் ஏற்பட்டுள்ள நிதிச் சுனாமியால் தங்கள் வேலைக்கு பாதிப்பு ஏற்பட்டு விடக் கூடாது என்பதற்காக, ஆந்திராவில் உள்ள தகவல் தொழில்நுட்ப நிறுவன ஊழியர்கள், சில்கூர் பாலாஜி கோவிலில் சிறப்பு வழிபாடு நடத்தினர்.அமெரிக்காவில் ஏற்பட்ட நிதிச் சுனாமி காரணமாக அங்குள்ள முக்கிய வங்கிகள் திவாலாகியுள்ளன. சர்வதேச அளவில் பங்குச் சந்தைகளில் சரிவு ஏற்பட்டுள்ளது. இதன் காரணமாக, அமெரிக்காவைச் சேர்ந்த தகவல் தொழில் நுட்ப நிறுவனங்கள், வேலைக்கு ஆள் எடுப்பதை தற்காலிகமாக நிறுத்தி வைத்துள்ளன.ஆந்திராவில் ஏராளமான தகவல் தொழில்நுட்ப நிறுவனங்கள் உள்ளன. இவற்றில் பெரும்பாலானவை அமெரிக்க நிறுவனங்களுக்கான பணிகளைச் செய்து வருகின்றன. இவற்றில் பலர் பணியாற்றி வருகின்றனர். தற்போது ஏற்பட்டுள்ள நிதிச் சுனாமி காரணமாக, புதிய "புராஜெக்ட்' எதையும், இங்குள்ள நிறுவனங்களுக்கு அமெரிக்க நிறுவனங்கள் அளிக்கவில்லை.ஏராளமான அமெரிக்க நிறுவனங்கள் இந்தியா போன்ற வெளிநாடுகளில் மேற்கொள்ளப்படும் தங்களின் "அவுட் சோர்சிங்' பணிக்கான செலவை பெருமளவு குறைத்து விட்டன. இதனால், தகவல் தொழில்நுட்ப நிறுவனங்களில் பணியாற்றும் ஊழியர்களிடையே கலக்கம் ஏற்பட்டுள்ளது. அமெரிக்காவில் கம்ப்யூட்டர் இன்ஜினியராக பணியாற்றும் ஆந்திராவைச் சேர்ந்த பெண், ஐதராபாத் அருகே உள்ள சில்கூர் பாலாஜி கோவில் நிர்வாகிகளை தொடர்பு கொண்டார். நிதிச் சுனாமி பிரச்னை தீர்ந்து எங்கள் வேலை நிலைக்க சிறப்பு பூஜை நடத்த வேண்டும் என, கேட்டுக் கொண்டார். கோவிலில் சிறப்பு பூஜை : இதையடுத்து, சில்கூர் கோவிலில் சிறப்பு பூஜைக்கு ஏற்பாடு செய்யப்பட்டது.இந்த விஷயம் அறிந்து, ஐதராபாத்தில் தகவல் தொழில் நுட்ப நிறுவனங்களில் பணியாற்றும் ஊழியர்கள் கோவிலுக்கு படையெடுத்து வரத் துவங்கி விட்டனர். கம்ப்யூட்டர் தொடர்பான கல்வி பயிலும் மாணவர்களும் ஏராளமாக குவிந்து விட்டனர். சிறப்பு பூஜையின் போது இவர்கள் அனைவரும் கலந்து கொண்டு, நிதிச் சுனாமி பிரச்னை சுமுகமாக தீர்ந்து எங்கள் வேலை நிலைக்க வேண்டும் என, பாலாஜியிடம் மனம் உருக வேண்டிக் கொண்டனர்.