பிரபாகரன் மரண சான்றிதழ் வந்து விட்டது: ப.சிதம்பரம் தகவல்

ராஜீவ்காந்தி கொலை வழக்கில் விடுதலைப்புலிகள் தலைவர் பிரபாகரன் முதன்மை குற்றவாளியாக சேர்க்கப்பட்டு இருந்தார். இலங்கை இறுதிக்கட்ட போரில் அவர் கொல்லப்பட்டதாக அறிவிக்கப்பட்டது. எனவே அவருடைய மரண சான்றிதழை ராஜீவ்காந்தி கொலை வழக்கை விசாரித்த சி.பி.ஐ. கேட்டது.

ஆனால் இதுவரை மரண சான்றிதழை இலங்கை தரவில்லை என்று சி.பி.ஐ. அதிகாரி ஒருவர் கூறி இருந்தார். இதை மத்திய உள்துறை மந்திரி ப.சிதம்பரம் மறுத்துள்ளார். பிரபாகரன் இறந்ததை உறுதி செய்து மரண சான்றிதழை இலங்கை கொடுத்து விட்டதாக அவர் கூறி இருக்கிறார்.

முத்துக்குமார் நினைவு நாள்: வைகோ-நல்லகண்ணு அஞ்சலி

இலங்கை தமிழர்களுக்காக சென்னை சாஸ்திரி பவன் முன்பு சென்னை கொளத்தூரை சேர்ந்த முத்துக்குமார் தீக்குளித்து உயிர் தியாகம் செய்தார். அவர் உயிர் தியாகம் செய்து இன்றுடன் ஒரு வருடம் நிறைவடைகிறது. அவருக்கு அஞ்சலி செலுத்தும் வகையில் கொளத்தூரில் இன்று நினைவு தினம் கடைப்பிடிக்கப்பட்டது. குமரன் நகரில் உள்ள முத்துக்குமார் வீட்டின் முன்பு 19 அடி உயரத்தில் நினைவு தூண் அமைக்கப்பட்டு இருந்தது.

அதில் முத்துக்குமார் உள்பட ஈழத் தமிழர்களுக்காக உயிர் தியாகம் செய்த 19 பேரின் உருவ படங்கள் வைக்கப்பட்டிருந்தன. அந்த நினைவுத்தூணுக்கு தலைவர்கள் அஞ்சலி செலுத்தினார்கள்.

இலங்கை தமிழர் பாதுகாப்பு இயக்கம் சார்பில் ம.தி.மு.க. பொது செயலாளர் வைகோ, இந்திய கம்யூனிஸ்டு கட்சியை சேர்ந்த நல்லக்கண்ணு, மகேந்திரன் மற்றும் பா.ஜனதா துணை செயலாளர் டாக்டர் தமிழிசை சவுந்திரராஜன், வட சென்னை மாவட்ட தலைவர் பிரகாஷ், ஆதிகேசவன், கருணாநிதி, ஏழுமலை, புதிய தமிழகம் கட்சி தலைவர் டாக்டர் கிருஷ்ணசாமி, நடிகர் சத்யராஜ், டைரக்டர் சீமான், புலமைபித்தன், கவிஞர் தமிழருவி மணியன் ஆகியோர் மலர் தூவி அஞ்சலி செலுத்தினார்கள்.

முன்னதாக முத்துக்குமாரின் தந்தை குமரேசன், தங்கை தமிழரசி, மற்றும் குடும்பத்தினர் மலர் தூவினர். இந்த நிகழ்ச்சியில் சென்னை ஐகோர்ட்டு வக்கீல் சங்க தலைவர் பால்கனகராஜ், மா. நடராஜன், ம.தி.மு.க.வை சேர்ந்த சோமு, ஜீவன், மணிமாறன், செங்குட்டுவன், மனோகரன், வக்கீல் நன்மாறன், குமரி விஜயகுமார், ருக்மணி ராஜா, குமரிஅருண், புகழேந்தி தங்கராஜ் உளபட பலர் கலந்து கொண்டனர்.

நாகர்கோவிலில் இருந்து முத்துக்குமார் நினைவு ஜோதி கொளத்தூருக்கு கொண்டுவரப்பட்டது. நினைவு நாளையொட்டி நடந்த நிகழ்ச்சிக்கு பலத்த போலீஸ் பாதுகாப்பு போடப்பட்டிருந்தது.

முத்துக்குமார் தீக்குளித்து இறந்த சாஸ்திரி பவனில் தடையை மீறி தமிழர் எழுச்சி இயக்கம் சார்பில் ஒருங்கிணைப்பாளர் வேலு மணி தலைமையில் உள்ளே நுழைந்தனர். அவர்களை போலீசார் தடுத்து நிறுத்தி கைது செய்தனர். சாஸ்திரி பவன் முன் உள்ள ரோட்டுக்கு முத்துக்குமார் பெயர் சூட்ட வேண்டும் என்று கோஷம் எழுப்பினார்கள்.

முத்துக்குமார் நினைவு நாளையொட்டி மாலை 6 மணிக்கு பெரவள்ளூர் சதுக்கத்தில் அஞ்சலி கூட்டம் நடக்கிறது. பழ.நெடுமாறன் தலைமை தாங்குகிறார்.

பா.ம.க. நிறுவனர் டாக்டர் ராமதாஸ், ம.தி.மு.க. பொதுச்செயலாளர் வைகோ, இந்திய கம்யூனிஸ்டு செயலாளர் தா.பாண்டியன் ஆகியோர் பேசுகிறார்கள். தென்சென்னை மாவட்ட செயலாளர் வேளச்சேரி மணிமாறன் கூட்ட ஏற்பாடுகளை செய்துள்ளார்.

விடுதலை சிறுத்தைகள் சார்பில் தங்கசாலையில் இன்று இரவு பொதுக்கூட்டம் நடக்கிறது. விடுதலை சிறுத்தைகள் பொதுச் செயலாளர் திருமாவளவன் பேசுகிறார்.

ராஜபக்ஷே வெற்றி : தாயகம் திரும்ப அகதிகள் முடிவு

ராமநாதபுரம் : இலங்கை அதிபராக ராஜபக்ஷே மீண்டும் வெற்றி பெற்றுள்ளதால், அடுத்த ஆட்சியாளர் வரும் வரை காத்திருக்கும் எண்ணத்தை கைவிட்டு, தாயகம் திரும்ப அகதிகள் பலர் முடிவு செய்துள்ளனர்.
இலங்கையில் விடுதலை புலிகள் அழிவுக்கு பின், நடைபெற்ற அதிபர் தேர்தலில் ஆளும் ஐக்கிய மக்கள் சுதந்திர கூட்டணி சார்பில் ராஜபக்ஷேவும், எதிர்க்கட்சி கூட்டணியான ஐக்கிய தேசிய முன்னணி சார்பில் புலிகளுக்கு எதிரான போரில் ராணுவ பொறுப்பேற்ற பொன்சேகாவும் களம் இறங்கினர். தமிழ் தேசிய கூட்டணி கட்சி பொன்சேகாவை ஆதரித்தது. ஆனாலும், தேர்தலில் ராஜபக்ஷே வெற்றி பெற்றார். புலிகளை அழிக்க உத்தரவிட்ட ராஜபக்ஷே, அழித்து காட்டிய பொன்சேகா, என இருவருமே புலிகள் அழிவுக்கு காரணமானவர்களாக இருந்தனர். இந்நிலையில், தமிழ் தேசிய கூட்டணி கட்சி ஆதரித்த பொன் சேகா வெற்றி பெற்றால், தங்களுக்கு ஆதரவு கிடைக்கும், என அகதிகள் எதிர்பார்த்தனர். ஆனால், தற்போது ராஜபக்ஷே வெற்றியால் அகதிகள் எண்ணம் சிதைந்தது. "அடுத்த அதிபர் தேர்தல் வரை இந்தியாவில் இருக்கும் பட்சத்தில், தங்கள் உறவுகள், உடமைகளை இழக்க நேரிடும். எனவே, முடிவு எதுவாகயிருந்தாலும், தாயகம் திரும்புவதே சரியாக இருக்கும்,' என அகதிகள் முடிவு செய்துள்ளனர். இதனால், இலங்கைக்கு திரும்பிச் செல்ல அனுமதி கேட்டு விண்ணப்பிக்க துவங்கி உள்ளனர்.
அகதிகள் கூறியதாவது: அரசியல் மாற்றத்துக்கு பின், தாயகம் திரும்ப ஆசைபட்டோம். அது நிறைவேறாமல் போய்விட்டது. இனியும் காலம் கடத்தும் எண்ணம் இல்லை. எந்த ஆட்சி நடந்தாலும், தாயகத்தில் காலத்தை கடத்த முடிவு செய்து விட்டோம். அதற்காக விண்ணப்பிக்க வந்துள்ளோம், என்றனர்.
மண்டபம் முகாம் அகதிகள் அதிர்ச்சி: ராஜபக்ஷே வெற்றி குறித்து மண்டபம் அகதிகள் முகாமில் வசிக்கும் தமிழர்கள் கூறியதாவது: ராஜபக்ஷே அதிபராக இருந்தபோது இலங்கையில் தமிழர்கள் மீது நடந்த தாக்குதல்களை யாரும் மறக்க முடியாது. முள்வேலி முகாமில் தமிழர்களை அடைத்து வைத்து விட்டு, தமிழர்களின் குடியிருப்புகளில் சிங்களர்கள் குடியமர்த்தப்பட்டனர். போர் மரபிற்கு எதிராக தேவாலயங்கள், பள்ளிகள், மருத்துவமனைகள் என தமிழர்கள் பகுதியில் குண்டுகள் வீசப்பட்டன. இதை செய்த ராஜபக்ஷே தற்போது மீண்டும் வெற்றி பெற்றுள்ளதால், இலங்கையில்,இனி தமிழர்கள் நிம்மதியாக வாழமுடியாது. அதிபர் தேர்தலில் மாற்றம் ஏற்பட்டால், இலங்கை செல்லலாம் என, எண்ணியிருந்தோம். இப்போது அது கனவாகிவிட்டது. இனி, எங்கள் எதிர்காலத்தை எப்படி எதிர் நோக்குவது என தெரியவில்லை, என்றனர்.
மீனவர்கள் வாழ்வாதாரம் கேள்விக்குறி: விடுதலைப்புலிகளுடன், ராணுவம் போர் புரிந்த சூழலில், தமிழக கடல் மார்க்கமாக புலிகளுக்கு ஆயுதங்கள், வெடிபொருட்கள் கடத்தப்படுவதாக கூறி, தமிழக மீனவர்கள் மீது துப்பாக்கி சூடு, தாக்குதல்களை இலங்கை கடற்படையினர் நடத்தினர். புலி தலைவர் பிரபாகரன் கொல்லப்பட்ட பிறகும், தமிழக மீனவர்கள் மீதான தாக்குதல்கள் தொடர்ந்தன. இந்நிலையில், "அதிபர் தேர்தலில் மீண்டும் ராஜபக்ஷே வெற்றி பெற்றுள்ளதால், இலங்கை கடற்படையும் ரோந்து என்ற பெயரில் மீனவர்கள் மீது மீண்டும் தாக்குதலை நடத்தும். இதன் மூலம் தமிழக மீனவர்களின் வாழ்வாதாரமான மீன்பிடி தொழில் பாதிப்படையும் சூழல் ஏற்படும்,' என, மீனவர்கள் அச்சம் தெரிவித்துள்ளனர் .

தேர்தல் தோல்வி எதிரொலி: வீட்டுக்காவலில் சரத்பொன்சேகா- ஆதரவு வீரர்கள் 400 பேர் கைது

இலங்கை அதிபர் தேர்தலில் எதிர்க்கட்சிகள் சார்பில் பொது வேட்பாளராக நிறுத்தப்பட்ட சரத்பொன்சேகா தோல்வி அடைந்தார். அவருக்கு 41 லட்சத்து 73 ஆயிரத்து 185 ஓட்டுக்களே (40.15 சதவீதம்) கிடைத்தன.

தேர்தல் முடிவுகள் வெளியாகத் தொடங்கிய முதலே ராஜபக்சே முன்னிலையில் இருந்தார். அப்போது சரத்பொன்சேகா கொழும்பில் உள்ள தன் அலுவலக வீட்டில் இருந்தார். அந்த அலுவலகத்தை ராணுவம் சுற்றி வளைத்தது.

இதையடுத்து அலுவலகத்தில் இருந்து வெளியேறிய சரத்பொன்சேகா கொழும்பில் உள்ள ஒரு நட்சத்திர ஓட்டலுக்கு சென்று தங்கினார். ராணுவத்தில் பணியாற்றி ராஜினாமா செய்த சுமார் 400 வீரர்களும் அவருடன் ஓட்டலில் இருந்தனர். இதனால் சரத்பொன்சேகா ராணுவப் புரட்சியில் ஈடுபடக்கூடும் என்ற தகவல் பரவியது.

இதையடுத்து அந்த நட்சத்திர ஓட்டலை சிங்கள ராணுவம் முற்றுகையிட்டது. இதனால் பயந்துபோன சரத்பொன்சேகா, தன் உயிருக்கு ஆபத்து ஏற்பட்டுள்ளதாக கூறினார். அதோடு இந்தியாவிடமும் உதவி கேட்டார். இந்த நிலையில் அவரை தேர்தலில் களம் இறக்கி விட்ட தலைவர்கள் நட்சத்திர ஓட்டலுக்கு சென்று அவருடன் இருந்தனர்.

அப்போது நிருபர்களுக்கு பேட்டி கொடுத்த சரத் பொன்சேகா, தேர்தலில் தில்லுமுல்லு நடந்துள்ளது. மக்களை அரசு ஏமாற்றிவிட்டது. விதிமுறைகள் மீறப்பட்டுள்ளன. இதை எதிர்த்து கோர்ட்டில் வழக்குத் தொடரப் போகிறேன் என்றார்.

இதற்கிடையே சரத் பொன்சேகாவுக்கு ஆதரவாக இருக்கும் முன்னாள் ராணுவ வீரர்களை வேட்டையாடும் நடவடிக்கையை சிங்கள ராணுவம் தொடங்கியது. முதல் கட்டமாக 10 முன்னாள் வீரர்கள் கைது செய்யப்பட்டனர். இதை அறிந்ததும் தன்னையும் கைது செய்து விடுவார்கள் என்று பொன்சேகா பயந்தார்.

ஆனால் சரத்பொன் சேகாவை கைது செய்யும் திட்டம் எதுவும் இல்லை. சரத் பொன்சேகாவை யாரும் கட்டுப்படுத்தி ஓட்டலில் வைக்கவில்லை என்று இலங்கை சார்பில் மனித உரிமைகளுக்கான அமைச்சர் மகிந்த சமரசிங்க கூறினார்.

இலங்கை ராணுவ செய்தித் தொடர்பாளர் உதய நாணயக்காராவும் சரத் பொன்சேகாவை கைது செய்யும் எண்ணம் இல்லை என்றார்.

இதற்கிடையே பொன்சேகாவுக்கு ஆதரவாக ஓட்டலில் இருந்த முன்னாள் ராணுவ வீரர்களில் பெரும்பாலானவர்கள் கைது செய்யப்பட்டுள்ளதாக கூறப்படுகிறது. அவர்களை விசாரணைக்கு தனி இடத்தில் கொண்டு சென்றுள்ளதாக தெரிகிறது. சரத்பொன்சேகாவுக்கு ஆதரவு தெரிவித்த எதிர்க்கட்சி நிர்வாகிகளும் கைது செய்யப்படுவதாக உறுதி செய்யப்படாத தகவல்கள் தெரிவிக்கின்றன.

இதனால் கொழும்பில் எதிர்க்கட்சியினரிடம் பதட்டம் ஏற்பட்டுள்ளது. பெரும்பாலானவர்கள் தலைமறைவாகி விட்டனர். தேர்தல் விதிமுறைகளை மீறியதாக அவர்கள் மீது குற்றம் சாட்டப்பட்டு வழக்குகள் தொடரப்படும் என்று ஒரு தகவல் வெளியாகி உள்ளது.

ஆதரவாளர்கள் வேட்டையாடப்பட்டதை அறிந்ததும், வெளிநாட்டுக்கு புறப்பட சரத்பொன்சேகா முயற்சி செய்தார். ஆனால் அவரால் விமான நிலையத்துக்கு செல்ல இயலவில்லை. இதையடுத்து அவர் நட்சத்திர ஓட்டலை காலி செய்து விட்டு தனது வீட்டுக்குப்புறப்பட்டுச் சென்றார்.

கொழும்பில் உள்ள அவரது வீட்டையும் சிங்கள ராணுவம் முற்றுகையிட்டுள்ளது. இதன் மூலம் சரத்பொன் சேகா வீட்டுக்காவலில் வைக்கப்பட்டுள்ளதாக சந்தேகிக்கப்படுகிறது. ஆனால் சிங்கள ராணுவ அதிகாரிகள் இது பற்றி எந்த கருத்தும் வெளியிடவில்லை.

ராணுவத்தின் நடவடிக்கைகளைத் தொடர்ந்து அச்சம் அடைந்துள்ள சரத்பொன்சேகா வெளிநாட்டுக்கு சென்று விடவேண்டும் என்பதில் தீவிரமாக உள்ளார்.இது தொடர்பாக பிபிசிக்கு அவர் அளித்த பேட்டி வருமாறு:-

இலங்கையில் சட்டம்- ஒழுங்கு கடுமையாக சீர்குலைந்துள்ளது. நான் விமான நிலையத்துக்கு செல்லப் புறப்பட்டேன். ஆனால் ராணுவத்தினர் தடுத்துவிட்டனர். நான் இலங்கையைவிட்டு வெளியேற அனுமதிக்க கூடாது என்று கொழும்பு விமான நிலைய அதிகாரிகளுக்கு உத்தரவிட்டுள்ளனர்.

இப்போதைக்கு நான் வெளிநாடு செல்ல விரும்புகிறேன். நான் உயிர் வாழ சில பாதுகாப்பு நடவடிக்கைகளை எடுக்க வேண்டியதுள்ளது. எந்த நாட்டுக்கு போகப்போகிறேன் என் பதை இப்போதே சொல்ல இயலாது.

நான் இலங்கை மக்களை மறக்கமாட்டேன். மக்களுடன் தொடர்ந்து தொடர்பில் இருப்பேன். தேர்தலில் பெரிய அளவில் முறைகேடுகள் நடந்ததால்தான் தோற்றேன்.

இவ்வாறு சரத்பொன் சேகா கூறினார்.

இலங்கை கடற்படைக்கு பயந்து இருளில் மீன் பிடிக்கும் மீனவர்கள்

மண்டபம் : இலங்கை கடற்படைத் தாக்குதலுக்கு பயந்து, விசைப்படகில் இரவில் மீனவர்கள் மீன் பிடி தொழில் செய்கின்றனர்.
இலங்கை கடற்படை ராமேஸ்வரம், மண்டபம் விசைப்படகு மீனவர்களை தாக்குவது தொடர்ந்து நடக்கிறது. மத்திய,மாநில அரசுகள் கண்டு கொள்ளாத நிலையில், மீன் பிடி தொழிலை வாழ்வாதாரமாக கொண்டுள்ள மீனவர்கள் எதிர்காலம் கேள்விக் குறியாக உள்ளது.விசைப்படகில் மீன் பிடிக்கச் செல்லும் மீனவர்கள், இரவில் மீன் பிடிக்கும்போது வெளிச்சத்திற்காக போகஸ் லைட், தீப்பந்தங் களை உபயோகிப்பர்.ஆனால், மண்டபம் மீனவர்கள் தற்போது இலங்கை கடற்படைக்கு பயந்து, நடுக்கடலில் இரவில் விசைப்படகில் எவ்வித வெளிச்சமும் இன்றி, இருளில் மீன் பிடி தொழில் செய் கின்றனர்.
இது குறித்து மீனவர்கள் கூறுகையில், "நம் பகுதியில் மீன் பிடிக்கும் உரிமைகளை நாம் இழந்து வருகிறோம். இலங்கை கடற்படை அத்து மீறி நுழைந்து எங்கள் மீது தாக்குதல் நடத்துகிறது.இலங்கை கடற்படை இரவில் எங்களை அடையாளம் கண்டு தாக்குவதால், வெளிச்சமின்றி இருளில் மீன் பிடித்து வருகிறோம். வெளிச்சம் இல்லாததால் மீன் பிடிக்க மிகுந்த சிரமமாக உள்ளது' என்றனர்.அரசு தலையிட்டு மீனவர்கள் வாழ்வில் வெளிச்சத்தை கொண்டுவர வேண்டும்.

பாவம், இவர்களின் அழுகுரலுக்கு கை கொடுக்கும் முதல் அமைச்சர் வேண்டும், தமிழகத்துக்கு சொந்த மண்ணில் (நாட்டில்) அந்நிய அரசுக்கு அதுவும் ஒரு இந்தியாவை விட மிகவும் சிறய கப்பற்படையை கொண்ட ஒன்றை நம்மால் கட்டுபடுத்த முடியவில்லை. அவர்கள் அதிகம் துப்பாக்கி சூடு நடத்துவது சர்வதேச கடல் எல்லையில் தான். இந்த பிரச்சனையை எதிர்த்து குரல் கொடுக்க எந்த அரசியல் அமைப்பும் முன் வருவதில்லை. நம் மக்களும் தங்களின் ஆதங்கத்தை வெளிபடுதுவதிலை. இனிமேலாவது மீனவ மக்களின் வாழ்வாதார உரிமையை நிலை நாட்ட நம் அரசியல்வாதிகள் சுயநலமற்ற முறையில் தீர்வு காண வேண்டும்.

இலங்கையில் வாடகை வீடு கிடைக்காமல் சரத் பொன்சேகா தவிப்பு; அரசு வீட்டை காலி செய்ய உத்தரவு

இலங்கையில் ஈழத் தமிழர்களை கொன்று குவித்ததில் முக்கிய பங்கு வகித்தவர் சரத் பொன்சேகா. 600 தமிழர்களை குழியில் தள்ளி உயிரோடு புதைத்த மாபாதக செயலுக்காக ராஜபக்சேவால் இவருக்கு ராணுவ தளபதி பொறுப்பு கிடைத்தது. கடந்த மே மாதம் முள்ளிவாய்க்கால் சண்டையில் சுமார் 30 ஆயிரம் தமிழர்கள் உயிரிழக்க இவர் தான் காரணம் என்று குற்றஞ் சாட்டப்பட்டுள்ளது.

போரில் கிடைத்த வெற்றி புகழை பெறுவதில் இவருக்கும், அதிபர் ராஜபக்சேக்கும் கடும் போட்டி ஏற்பட்டுள்ளது. இதனால் ராணுவ தலைமை தளபதி பொறுப்பை ராஜினாமா செய்த சரத்பொன்சேகா அடுத்த அதிபர் தேர்தலில் ராஜபக்சேயை எதிர்த்து நிற்க தயாராகி வருகிறார்.

இதனால் ஆத்திரம் அடைந்துள்ள ராஜபக்சேயின் சிங்கள அரசு பொன்சேகாவை முடக்க அடுத்தடுத்த நடவடிக்கைகளில் ஈடுபட்டுள்ளது. அதன் ஒரு பகுதியாக அரசு வீட்டை உடனே காலி செய்யுமாறு சரத் பொன்சேகாவுக்கு உத்தர விடப்பட்டுள்ளது.

பொன்சேகா தற்போது கொழும்பு புல்லர்ஸ் வீதியில் உள்ள அரசு பங்களாவில் வசித்து வருகிறார். வரும் ஞாயிற்றுக்கிழமைக்குள் இந்த வீட்டை விட்டு வெளியேறி சென்று விட வேண்டும் என்று அவருக்கு உத்தர விடப்பட்டுள்ளது.

இதனால் நெருக்கடிக்குள்ளாகி இருக்கும் பொன்சேகா அவசரம், அவசரமாக வாடகைக்கு வீடு பார்த்து வருகிறார். ஆனால் அவருக்கு வீடு கிடைக்கவில்லை.

கடந்த 2 நாட்களில் 15 வீடுகளை பொன்சேகா சென்று பார்வையிட்டார். ஆனால் அந்த 15 வீட்டுக்காரர்களையும் சிங்கள அரசு கடுமையாக மிரட்டியது.
இதனால் அவர்கள் பொன் சேகாவுக்கு வாடகைக்கு வீடு கொடுக்க மறுத்து விட்டனர். இது அவரை தவிப்புக்குள் ஆழ்த்தி உள்ளது.

தமிழக மீனவர்களை நிர்வாணமாக்கி பாலியல் கொடுமை

ராமநாதபுரம் : தமிழக மீனவர்களை நிர்வாணமாக்கி இலங்கை கடற்படையினர் , இரவு முழுவதும் பாலியல் கொடுமை செய்து விரட்டியடித்தனர். நேற்று முன்தினம் இரவு 7 மணிக்கு ராமேஸ்வரம் அருகே இந்திய கடலோர பகுதியில் நூற்றுக்கணக்கான தமிழக மீனவர்களின் படகுகள் மீன்பிடித்து கொண்டிருந்தன. அப்போது அங்கு 15 காஸ் படகுகளில் வந்த இலங்கை கடற்படையினர், மீனவர்களை சுற்றிவளைத்தனர். சிலர் சுதாரித்து தப்பினர். கையில் சிக்கியவர்களை ஆடைகளை கழற்ற கூறி, இரவு முழுவதும் பாலியல் கொடுமை செய்துள்ளனர். ""மீன்பிடிக்க வந்தால் இனிமேல் உங்களை அடிக்க போவதில்லை, இது போல நிர்வாண தண்டனை தான்'' எனக்கூறி சென்றதாக தப்பி வந்த மீனவர்கள் கூறினர்.
மீனவர் மாசிலாமணி(70) கதறியவாறு கூறுகையில், ""சுற்றி வளைத்த இலங்கை கடற்படை எங்களிடம் இருந்த பொருட்களை எல்லாம் பறித்து கொண்டது. எனது 190 ரூபாய், செருப்பு, டார்ச் லைட் ஆகியவை பறிபோனது. எங்களிடம் உறவு முறைகளை கேட்டனர். பின் பாலியல் கொடுமை செய்தனர். வயது வித்தியாசம் கூட பார்க்கவில்லை,'' என்றார்.
படகின் டிரைவர் அலெக்சாண்டர் கூறுகையில், ""இந்திய கடற்பகுதியில் தான் மீன்பிடித்து கொண்டிருந்தோம். அவர்களது நாட்டில் வருவது போல இலங்கை கடற்படை வந்து அட்டகாசம் செய்கின்றனர்,'' என்றார்.

இலங்கையில் தமிழர்களுக்கு உரிமைகளை வழங்க வேண்டும்; போப் ஆண்டவர் வற்புறுத்தல்

கத்தோலிக்க கிறிஸ்தவ மத தலைவர் போப் ஆண்டவர் விடுத்துள்ள அறிக்கையில் கூறியிருப்பதாவது:-

இலங்கையில் அங்குள்ள நிலைமைகள் சீராகி நாடு முன்னேற அதிகாரிகளும், அந்த நாட்டு மக்களும் ஒன்று சேர்ந்து பாடுபட வேண்டும்.

போரின் போது வெளியேறிய மக்களை மீண்டும் அவர்களுடைய சொந்த இடத்திலேயே குடியமர்த்த அரசு விரைந்து நடவடிக்கை எடுக்கவேண்டும். தமிழர்களுக்கான அனைத்து உரிமையையும் வழங்க வேண்டும்.

அங்குமனித உரிமைகள் மீறப்படக்கூடாது இதற்கு இலங்கையில் அனைத்து பிரிவு மக்களும் ஒன்று சேர்ந்து பாடுபட வேண்டும். இலங்கையின் முன்னேற்றத்திற்காக சர்வதேச சமுதாயங்கள் பொருளாதார உதவி உள்ளிட்ட தேவையான உதவிகளை வழங்க வேண்டும்.
இவ்வாறு போப் ஆண்டவர் கூறியுள்ளார்.

இலங்கையில் போர் குற்றம் சர்வதேச விசாரணைக்கு அமெரிக்கா வற்புறுத்தல்

இலங்கையில் விடுதலைப்புலிகளுடன் நடந்த உச்சகட்ட போரின் போது வடக்கு பகுதியில் தமிழர்கள் மீது அடக்கு முறையும், போர்க்குற்றங்களும் நடந்ததாக உலக நாடுகள் புகார் கூறி வருகின்றன.

அப்போது நடைபெற்ற போர்க் குற்றங்கள் குறித்து விசாரணை நடத்த வேண்டும் என்றும் வலியுறுத்தி வருகின்றன. இந்த நிலையில் போர் நடந்த வட கிழக்கு பகுதியில் நடைபெற்ற போர்க்குற்றங்கள் குறித்து உலக நாடுகளின் அமைப்புகள் விசாரணை நடத்த இலங்கை அனுமதிக்க வேண்டும் எனஅமெரிக்கா தெரிவித்துள்ளது.

இது தொடர்பாக அமெரிக்காவின் வெளியுறவு துறை செய்தி தொடர்பாளர் லான் கெல்லி வெளியிட்டுள்ள அறிக்கையில் கூறியிருப்பதாவது:-

இலங்கையின் வடக்கு பகுதியில் விடுதலைப்புலிகளுடன் நடந்த இறுதி கட்ட போரின் போது ராணுவத்தினர் மற்றும் சிங்களர்களால் தமிழர்கள் மீது நடத்தப்பட்ட போர்க் குற்றங்கள் குறித்து உலக நாடுகளின் நிறுவனங்கள் விசாரணை நடத்த அந்நாட்டு அரசு அனுமதிக்க வேண்டும். அப்போதுதான் அங்கு நடந்த உண்மையான விவரங்கள் குறித்த தகவல்கள் தெரியவரும் என்று கூறியுள்ளார்.
அமெரிக்க பாராளுமன்ற வெளியுறவுத்துறை நேற்று வெளியிட்டுள்ள அறிக்கையில் கூறியிருப்பதாவது:-
இறுதி கட்ட போரின் போது இலங்கையில் அகில உலக மனித உரிமை சட்டம் மீறப்பட்டுள்ளதாக குற்றச்சாட்டுகள் வெளியாகி உள்ளன. இதுகுறித்து விசாரணை நடத்த வேண்டியது அவசியம். அது உண்மை என்றால் மிகப் பெரிய குற்றமாகும் என்று தெரிவிக்கப்பட்டுள்ளது.

இதற்க்கு இலங்கை அரசு அனுமதிக்குமா???????????????? விசாரணை நடைபெறுமா?????????????? எல்லாவற்றிற்கும் எப்போது விடியல் ஒன்று மட்டும் உண்மை..... விடியல் வெகு தொலைவில் இல்லை என்று நம்புவோம்...

Source: http://www.maalaimalar.com

இலங்கை அகதி முகாமில் இருந்து 41 ஆயிரம் தமிழர்கள் இன்று விடுவிப்பு; சொந்த ஊர் சென்றனர்

நம்பும் படி இல்லை
நல்லது நடந்தால் மகிழ்ச்சி


இலங்கையில் போர் பகுதியில் இருந்து வெளியேறிய தமிழர்கள் 3 லட்சம் பேர் முகாம்களில் அடைத்து வைக்கப்பட்டு இருந்தனர். அவர்களின் நிலைமைகளை நேரில் கண்டறிவதற்காக தமிழக எம்.பி.க்கள் குழு இலங்கை சென்றது. அவர்கள் முகாமை சுற்றி பார்த்து குறைகளை கேட்டறிந்தனர். பின்னர் இலங்கை அதிபர் ராஜபக்சேவை சந்தித்து பேசி அவர்கள் முகாமில் இருக்கும் அனைத்து தமிழர்களையும் விரைவில் விடுவித்து சொந்த ஊரில் குடியமர்த்தும்படி வற்புறுத்தினார்கள்.



அதற்கு ராஜபக்சே 2 வாரத்தில் 58 ஆயிரம் பேரை சொந்த ஊரில் குடியமர்த்துவோம் என்று உறுதி அளித்தார்.



அதன்படி இன்று 12 ஆயிரம் குடும்பங்களை சேர்ந்த 41 ஆயிரத்து 685 பேரை முகாமில் இருந்து விடுவித்தனர். அவர்களை பஸ் மற்றும் வாகனங்களில் ஏற்றி சொந்த ஊருக்கு அழைத்து சென்றனர்.



ஒவ்வொருவருக்கும் ரூ. 5 ஆயிரம் ரொக்கப்பணம், ரூ. 20 ஆயிரம் பாங்கி சேமிப்பு, 6 மாதத்துக்கு தேவையான ரேஷன் பொருட்கள், படுக்கை விரிப்புகள், அத்தியாவசிய பொருட்களும் வழங்கப்பட்டன.



இன்று விடுவிக்கப்பட்ட 41 ஆயிரத்து 685 பேரில் 8643 பேர் வவுனியா மாவட்டத்தையும், 6631 பேர் மன்னார் மாவட்டத்தையும், 16 ஆயிரத்து 394 பேர் முல்லைத்தீவு மாவட்டத்தையும், 10 ஆயிரத்து 17 பேர் கிளிநொச்சி மாவட்டத்தையும் சேர்ந்தவர்கள்.
 
Source: http://www.maalaimalar.com

தமிழர்களுக்கு போலீஸ் அதிகாரம் கிடையாது : ராஜபக்ஷே கூறியதாக சுதர்சன நாச்சியப்பன் தகவல்

""அனைத்து தரப்பினரும் ஒத்துக் கொண்டால் மட்டுமே, வடக்கு கிழக்கு பகுதிகளை இணைக்க முடியும். எந்த சூழ்நிலையிலும் போலீஸ் அதிகாரம் தமிழர்களுக்கு வழங்கப்பட மாட்டாது'' என்று, ராஜபக்ஷே தெரிவித்ததாக காங்கிரஸ் எம்.பி., சுதர்சன நாச்சியப்பன் கூறினார்.
இலங்கை சென்று வந்த எம்.பி.,க்கள் குழுவில் இடம்பெற்று இருந்த காங்கிரசைச் சேர்ந்த சுதர்சன நாச்சியப்பன் கூறியதாவது: ராஜிவ் - ஜெயவர்த்தனே உடன்பாட்டில் தமிழர்களுக்கு போலீஸ் அதிகாரம் தருவதற்கு பரிந்துரை செய்யப்பட்டிருந்தது. ஆனால் ராஜபக்ஷேயுடன் இதுகுறித்து பேசும்போது, எந்த சூழ்நிலையிலும் போலீஸ் அதிகாரம் தமிழர்களுக்கு வழங்கப்பட மாட்டாது என்று திட்டவட்டமாக தெரிவித்துவிட்டார். மேலும் வடக்கு கிழக்கு பகுதிகளை இணைப்பது குறித்து கேட்டதற்கு, அனைத்து தரப்பினரும் ஒப்புக் கொண்டால் அதுகுறித்து நடவடிக்கை எடுக்கப்படும் என்று பதிலளித்தார். "இதுபோன்ற பிரச்னைகள் அனைத்தையும் எங்களிடம் விட்டுவிடுங்கள், நாங்கள் பார்த்துக் கொள்கிறோம் என்று தெரிவித்த ராஜபக்ஷே, இதற்கென ஒரு குழு அமைத்து மூன்று ஆண்டுகளாக ஆய்வு செய்து வருகிறது' என்று கூறினார். அந்த குழு அளிக்கும் பரிந்துரைகளை ஏற்று அதிகாரங்களை பகிர்ந்து அளிக்கப்படும் என்று தெரிவித்தார்.
முகாம்களைப்பொறுத்த வரை மூன்று வகைகளாக பிரிக்கலாம். வீடு,நிலம் உள்பட சொத்துக்கள் வைத்திருப்பவர்கள் ஒருவகை. வடக்கு பகுதியில் சொந்தபந்தங்களை விட்டு பிரிந்து வாடுபவர்கள் இன்னொரு வகை. எந்த உறவுகளும் இன்றி தவிக்கும் அனாதைகளாக மற்றொரு வகை. இதில் முதல் வகையான சொத்து வைத்திருக்கும் தமிழர்களைத்தான் அரசு அதிகம் சோதனை செய்கிறது. மொத்தம் மூன்று வகையான சோதனை நடைபெறுகிறது. வருவாய் அதிகாரிகள் மூலம் சோதனை, போலீஸ் அதிகாரிகள் மூலம் சோதனை, ராணுவ அதிகாரிகள் மூலம் சோதனை என மூன்று அடுக்காக சோதனை செய்யப்படுகின்றனர்.இந்த மூன்று சோதனை முடிந்த பிறகு இவர்களில் பெரும்பானவர்களை அவரவர் இருப்பிடங்களுக்கு அனுப்பி வைக்கின்றனர். வடக்குபகுதியில் சொந்த பந்தங்கள் உள்ளவர்களையும், அனாதைகளாக இருப்பவர்களையும்தான் முகாம்களில் அதிகம் காணமுடிகிறது. அநாதையாக இருப்பவர்களை ஆதரவளித்து கூட்டிச் செல்ல தொண்டு நிறுவனங்கள் உள்பட யாரும் தயாராக இல்லை. முகாம்களை சீரமைக்க இந்தியா,சீனா,பாகிஸ்தான் ஆகிய நாடுகள்தான் உதவி வருகின்றன. காரணம், பிரிட்டன் போன்ற நாடுகள் வர்த்தக பரிவர்த்தனைகள் பலவற்றை நிறுத்தி கொண்டு விட்டன. இதனால் கடுமையான நிதிநெருக்கடியில் சிக்கித் தவித்து வரும் இலங்கை அரசுக்கு, பெரும் அளவு இந்தியாதான் உதவி வருகிறது.
தமிழக மீனவர்கள் தாக்கப்படும் விவகாரம் குறித்து கடற்படை அதிகாரிகளுடன் பேசினேன். கொழும்பு மீனவர்கள் டியூனா என்ற வகை மீன்களைத்தான் பெருமளவு பிடிக்கிறார்கள். தமிழக மீனவர்கள் பிரான் வகை மீன்களை பெருமளவு பிடிக்கின்றனர். எனவே இருநாட்டு மீனவர்களும் ஒருவித இணக்கத்துடன் மீன்பிடி தொழில் செய்ய ஏற்ற வகையில் இரு நாட்டு மீனவ தலைவர்களை அழைத்துப் பேச வேண்டுமென கேட்டுக் கொண்டேன். இதை பரிசீலனை செய்வதாக அதிகாரிகள் தெரிவித்தனர். தலைமன்னாருக்கும் ராமேஸ்வரத்துக்கும் இடையில் படகு சவாரி விட வேண்டுமென்றும் கேட்டுக்கொண்டேன். தூத்துக்குடியை குறிப்பிட்டுத்தான் கோரிக்கை வைக்கப்பட்டதாக தெரிவித்தனர். தூத்துக்குடி என்பது சரக்கு துறைமுகமாகத்தான் கருத வேண்டும். எனவே ராமேஸ்வரம்தான் சரியாக வரும் என்று கூறியதை அடுத்து அதையும் பரிசீலனைக்கு ஏற்றுக் கொண்டனர்.
பெரும் சர்ச்சையை கிளப்பி வரும் கச்சத்தீவு பகுதியில் இந்தியா, இலங்கை ஆகிய இரு நாடுகளும் இணைந்து சிறப்பு பொருளாதார மண்டலம் அமைக்க நடவடிக்கை எடுக்கும்படியும் வலியுறுத்தினேன். இதுகுறித்து உரிய முறையில் கவனம் செலுத்துவதாக இலங்கை அதிகாரிகள் தெரிவித்தனர். இவ்வாறு சுதர்சன நாச்சியப்பன் கூறினார்.

Source: http://www.dinamalar.com/

இலங்கையில் கம்பி வேலிக்குள் அடைத்து சித்ரவதை: தமிழர்களுக்கு நவீன ஆயுதங்கள் வழங்கி போராட்டத்தை தீவிரப்படுத்துவோம்; மாவோயிஸ்ட் நக்சலைட் தலைவர் அறிவிப்பு

இலங்கையில் சமீபத்தில் சிங்கள ராணுவம் நடத்திய போரில் ஏராளமான தமிழர்கள் கொல்லப்பட்டனர். இப்போர் மூலம் விடுதலைப்புலிகள் இயக்கத்தை அழித்து விட்டதாக சிங்கள ராணுவம் கூறிவருகிறது. இந்த நிலையில் போரில் உயிர் தப்பிய தமிழர்களை இலங்கை அரசு திறந்த வெளியில் அடைத்து வைத்து அவர்களை சுற்றிலும் கம்பி வேலி அமைத்துள்ளது.

இந்த கம்பி வேலிக்குள் அடைக்கப்பட்டுள்ள தமிழர்களை சிங்கள ராணுவத்தினர் சித்ரவதை செய்வதாக தகவல்கள் வெளியாகின.

இதற்கு அமெரிக்கா, நார்வே, கனடா, இங்கிலாந்து போன்ற நாடுகள் கடும் கண்டனம் தெரிவித்தன.

இந்த நிலையில் கம்பி வேலிக்குள் சிறைப்படுத்தப்பட்டுள்ள அப்பாவி தமிழர்களை இலங்கை அரசு விடுவிக்கா விட்டால் தமிழர்களுக்கு நவீன ஆயுதங்கள் வழங்கி சுதந்திர போராட்டத்தை தீவிரப்படுத்துவோம் என்று மாவோயிஸ்ட் நக்சலைட் இயக்க தலைவர் கணபதி அறிவித்துள்ளார்.

இதுபற்றி அவர் ஒரு இணைய தளத்திற்கு அளித்த பேட்டியில் கூறியிருப்பதாவது:-

உலகிலேயே மிகப்பெரிய இனப்படுகொலை இலங்கையில் நடந்துள்ளது. இலங்கை அரசு தமிழர்களை கம்பி வேலிக்குள் அடைத்து சித்ரவதை செய்வதை அறிந்து வேதனைப்படுகிறோம்.

அவர்களுக்கு நாங்கள் நவீன ஆயுதங்கள் வழங்கி சுதந்திர போராட்டத்தை தீவிரப்படுத்துவோம். இதற்கான விஷயங்களை நாங்கள் வகுத்து வருகிறோம். அண்டை நாட்டில் உள்ள தமிழர்கள் கொடூர சித்ரவதை செய்யப்படுவதை அனுமதிக்க மாட்டோம்.

அதிநவீன படகுகள் மூலம் கடல் வழியாக ஆயுதங்களை இலங்கைக்கு கொண்டு செல்வோம். இதை யாராலும் தடுத்து நிறுத்த முடியாது.

தமிழர்களிடம் ஆயுதங்கள் இருந்தால் இலங்கை ராணுவத்தினர் அங்குள்ள பெண்களை கற்பழிக்க மாட்டார்கள். இளைஞர்களையும் சுட்டுக்கொல்ல மாட்டார்கள். எனவே எங்களிடம் உள்ள நவீன ஆயுதங்களை தமிழர்களுக்கு வழங்குவோம்.

சித்ரவதை செய்தவர்கள் யாராக இருந்தாலும் அவர்கள் தண்டிக்கப்பட வேண்டும். நாங்கள் இலங்கை தமிழர்களுக்கு ஆயுத உதவி செய்வதை யாராலும் தடுத்து நிறுத்த முடியாது. இதற் கென்று தனி குழுக்களை ஏற்படுத்தி உள்ளோம்.

எங்களது நக்சலைட் இயக்கத்தில் தமிழகம் - கேரளாவைச் சேர்ந்த நிறைய இளைஞர்களை சேர்க்க முடிவு செய்துள்ளோம். இதற்காக தமிழகம் - கேரளா எல்லைப்பகுதிகளில் விரைவில் முகாம்கள் அமைக்க திட்டமிட்டுள்ளோம்.

நாங்கள் தற்போது மேற்கு வங்காளம், ஒரிசா, பீகார், ஜார்கண்ட் மாநிலங்களில் பலத்துடன் உள்ளோம். தென்மாநிலங்களில் எங்கள் அமைப்பை பலப்படுத்தும் பணியை தீவிரப்படுத்தி உள்ளோம்.

இவ்வாறு அவர் கூறினார்.

Source: http://www.maalaimalar.com

நாடுகடந்த தமிழ் ஈழத்துக்கு 5 நாடுகள் அனுமதி : இலங்கை அதிர்ச்சி

இலங்கையில் கடந்த மே மாதம் நடந்த 4-வது ஈழப்போரில் விடுதலைப்புலிகள் தோற்கடிக்கப்பட்டனர். போர் முடிந்த பிறகு சுமார் 3 லட்சம் ஈழத்தமிழர்களை அகதிகளாக முகாம்களுக்குள் சிங்கள அரசு அடைத்து வைத்துள்ளது.

விடுதலைப்புலிகளை வீழ்த்திவிட்ட போதிலும் உலகம் முழுவதும் வாழும் ஈழத்தமிழர்களின் “ஈழம்” கனவை சிங்கள அரசால் ஒன்றும் செய்ய முடியவில்லை. தனி ஈழம் நாட்டை உருவாக்கியே தீருவது என்ற முயற்சியில் ஈழத்தமிழர்கள் ஈடுபட்டுள்ளனர்.

முதல் கட்டமாக நாடு கடந்த தமிழ் ஈழத்தை உருவாக்கி உள்ளனர். உலகின் பல்வேறு நாடுகளில் வாழும் ஈழத்தை சேர்ந்த 59 தமிழர்கள் முன்நின்று நாடு கடந்த தமிழ் ஈழத்தின் நிர்வாகத்தை நடத்தி வருகிறார்கள்.
நாடு கடந்த தமிழ் ஈழத்துக்கு அமெரிக்கா, இங்கிலாந்து, கனடா, தென் ஆப்பிரிக்கா, நார்வே ஆகிய 5 நாடுகள் அனுமதி வழங்கி உள்ளது. இது இலங்கையின் சிங்கள அரசுக்கு கடும் அதிர்ச்சியையும் அதிருப்தியையும் ஏற்படுத்தி உள்ளது.

நாடு கடந்த தமிழ் ஈழ அரசை நடத்தி வரும் 59 தமிழர்கள் மீது நடவடிக்கை எடுக்குமாறு இலங்கை கோரிக்கை விடுத்தது. ஆனால் ஈழத் தமிழர்கள் மீது நடவடிக்கை எடுக்க 5 நாடுகளும் மறுத்துவிட்டன.

இலங்கையில் தமிழர்களை கொல்லும் காட்சி வீடியோ உண்மையானது; அமெரிக்க ஆய்வகம் தகவல்

நியூயார்க், அக். 19-

இலங்கையில் தமிழர்களை நிர்வாணமாக்கி சிங்கள ராணுவத்தினர் சுட்டுக் கொல்வது போன்ற வீடியோ காட்சி ஒன்று சமீபத்தில் வெளியானது. இது உண்மையான வீடியோ காட்சி அல்ல என்று இலங்கை அரசு மறுத்து வந்தது.
அமெரிக்காவில் உள்ள இன அழிப்புக்கு எதிரான அமைப்பினர் இந்த வீடியோ உண்மையானது தானா? என்று ஆராய வல்லுனர்கள் குழுவை அமைத்தனர்.

அவர்கள் அங்குள்ள ஆய்வகம் மூலம் இவற்றை ஆய்வு செய்தனர். இதன் முதல் கட்ட அறிக்கையை வெளியிட்டு உள்ளனர். அதில் கூறியிருப்பதாவது:-
எங்கள் முதல் கட்ட அறிக்கையின்படி இந்த வீடியோ உண்மையானது என்று தெரிகிறது. வீடியோ காட்சிகள் தொடர்ந்து வருகின்றன. வீடியோவை நிறுத்தி காட்சிகளை சேர்த்ததற்கான ஆதாரமோ அல்லது காட்சிகளை நீக்கியதற்கான ஆதாரமோ எதுவும் இல்லை. ஆரம்ப கட்ட ஆய்வில் 10-க்கும் மேற்பட்ட விஷயங்கள் உறுதி செய்யப்பட்டு உள்ளன.

முதலில் இறந்தவரின் ரத்தமும், அடுத்து இறப்பவரின் ரத்தமும் நிறத்தில் மாறுபாடு தெரியும். இந்த வீடியோவிலும் அந்த மாறுபாடு தெரிகிறது. காயமாக இருந்தால் அந்த மாறுபாடு தெரியாது.

துப்பாக்கி சுடும்போது ஏற்படும் சத்தம், அலறல் சத்தம் ஆகியவை வெளிவருவதிலும் உரிய கால இடைவெளி தெரிகிறது.

முதலில் சுடப்பட்டவரின் கால் அசைவு அவர் இறக்காமல் துடிப்பதை உறுதி ஏற்படுத்துகிறது.

எனவே இந்த வீடியோ உண்மையானதுதான். ஆனாலும் இன்றும் ஆய்வு நடத்த வேண்டியது உள்ளது. நவம்பர் மாதம் இறுதியில் முழு அறிக்கை வெளியிடப்படும்.

இவ்வாறு அதில் கூறப்பட்டுள்ளது.


Source: http://www.maalaimalar.com

இலங்கைத் தமிழர்களுக்கு சிரமங்கள் உண்டு; ராஜபக்ஷே தந்தது 'டீ' தான் : காங்., எம்.பி.

Dinamalar Comment
by Babu senthil,Iran 10/19/2009 3:13:38 PM IST
அழகிரி அவர்களே! போர் என்ற போர்வையில் முள்ளி வாய்க்காலில் 26,000 அப்பாவி மக்கள் படுகொலை செய்யப்பட்டதும் அநியாயமாகத் தெரியவில்லை, 3,00,000 தமிழ் மக்கள் வதை முகாம்களில் தடுத்து வைக்கப்பட்டுள்ளதும் அநியாயமகத் தெரியவில்லை? உங்கள் இந்த உண்மை அறி(ரி)யும் சுற்றுலா, ஓரு தடவை ஜெனரல் சரத் பொன்சேகா கூறிய ''தமிழக அரசியல்வாதிகள் கோமாளிகள்'' என்ற கூற்றை நிஜப்படுத்துவதாகவே அமைகின்றது !!!!


செய்தி

இலங்கைத் தமிழர்களின் உண்மை நிலையை கண்டறிய தி.மு.க., - காங்., - விடுதலைச் சிறுத்தைகள் கட்சி அடங்கிய எம்.பி.,க்கள் குழு கடந்த 10ம் தேதி இலங்கைக்கு சென்றது. அக்குழு, ஐந்து நாட்கள் அகதிகள் முகாம்களை பார்வையிட்டு, கடந்த 14ம் தேதி திரும்பியது.இலங்கைத் தமிழர்களின் உண்மை நிலை குறித்து மத்திய உள்துறை அமைச்சர் ப.சிதம்பரத்தின் ஆதரவாளரும், கடலூர் தொகுதி எம்.பி.,யுமான கே.எஸ்.அழகிரி, "தினமலர்' நாளிதழுக்கு அளித்த சிறப்பு பேட்டி:
இலங்கைத் தமிழர்களின் முகாம்களை பார்வையிட்டு தாயகம் திரும்பிய தி.மு.க., - காங்கிரஸ் எம்.பி.,க்கள் குழுவின் உண்மையான நோக்கம் வெற்றி பெற்றதாக கருதுகிறீர்களா?
இலங்கைத் தமிழர்களுக்கு மாபெரும் கொடுமை நடக்கிறது என்று ஒருதரப்பில் கூறப்பட்டது. இதை, எதிர்க்கட்சிகள் அரசியலாக்க முனைந்தனர். இலங்கைத் தமிழர்கள் வசிக்கும் நல்ல முகாம்களை தான் எங்களுக்கு காட்டுவர், சிரமம் உள்ள முகாம்களை காட்ட மாட்டார்கள் என்ற அச்சம் எங்களுக்கும் ஏற்பட்டது.அப்படி எதுவும் நடக்கவில்லை. வவுனியா காட்டில் 2,500 ஏக்கர் நிலத்தில் எட்டு முகாம்கள் அமைக்கப் பட்டுள்ளன. அந்த முகாம்களில் எங்களை இஷ்டம் போல் பார்வையிட அனுமதித்தனர்.
இலங்கை ராணுவத்தினரின் துன்புறுத்தல் குறித்து நீங்கள் சந்தித்த இலங்கைத் தமிழர்கள் புகாராக தெரிவித்தனரா?உண்மை கண்டறியும் குழுவாக நாங்கள் சென்றிருந்ததால் உண்மையை அறிய விரும்பினோம். இலங்கைத் தமிழர்களை உதாசீனப்படுத்தவில்லை; துன்புறுத்தவும் இல்லை. அவர்கள் வசிக்கும் கூடாரம், ஐ.நா., அமைப்புகளால் தான் கட்டப்பட்டுள்ளது. இலங்கை அரசு கட்டிக் கொடுக்கவில்லை.பொருட்களை வழங்குவதிலும், வாகனங்களை ஓட்டுவதிலும் பல்வேறு நாடுகளைச் சேர்ந்த ஐ.நா., குழுவினர் தான் பணியாளர்களாக ஈடுபட்டு வருகின்றனர். குடிநீர் சப்ளை சரியாக இல்லை என்ற குறை இருக்கிறது. நாள் ஒன்றுக்கு ஒரு மனிதருக்கு 10 லிட்டர் குடிநீர் வழங்கப்படுகிறது. நிறைவும் இருக்கிறது; குறைவும் இருக்கிறது.
முள்வேலியில் இலங்கைத் தமிழர்கள் சிக்கி தவிப்பதாக எதிர்க்கட்சி தலைவர்கள் குற்றம் சாட்டியிருப்பது பற்றி?இரண்டாயிரத்து 500 ஏக்கர் நிலத்திற்கு பாதுகாப்பு தேவை என்ற அடிப்படையில் முள் வேலி அமைக்கப்பட்டுள்ளது. மூன்று லட்சம் மக்களுக்கு பாதுகாப்பு கொடுக்க வேண்டும். அவர்களின் இருப்பிடத்திற்கு கொண்டு குடியமர்த்த வேண்டும் என்ற உணர்வு உள்ளது.முதல் கட்டமாக 58 ஆயிரம் பேரை, ஐந்தாயிரம் பேர் வீதம் யாழ்ப்பாணத்திற்கு கொண்டு செல்கின்றனர். மழைக் காலம் ஆரம்பிப்பதற்குள் இந்த பணி முடிய வேண்டும். மாவட்ட நிர்வாகம் வீடுகள் கட்டித் தரும் பணியில் ஈடுபட்டுள்ளது. உலக நாடுகள் அதற்கான உதவிகளை செய்து வருகின்றன. இலங்கை அரசும் உதவி செய்யும். நாங்கள் பார்த்த எட்டு முகாம்களில் துன்புறுத்தல் இல்லை. ஆனால், சிரமங்கள் உள்ளன.
ராஜபக்ஷே அளிக்கும் விருந்து தேவைதானா என எதிர்க்கட்சித் தலைவர்கள் கண்டனம் தெரிவிப்பதிருப்பது பற்றி?அது விருந்து அல்ல; வெறும் டீயும், சமோசாவும் தான் வழங்கினர்.
எம்.பி.,க்கள் குழு வருகைக்கு இலங்கைத் தமிழ் மாணவர்கள் எதிர்ப்பு தெரிவித்துள்ளதாக கூறப்படுகிறதே?யாரும் எதிர்ப்பு தெரிவிக்கவில்லை. அந்த நாட்டின் அதிபர், அமைச்சர்கள், தமிழ் அமைப்புத் தலைவர்கள், நிருபர்கள், தமிழக அரசியல்வாதிகளில் ஒருவர் கூட முகாம்களுக்கு சென்று பார்க்கவில்லை. ராணுவத்தினர், மாவட்ட கலெக்டர், ஐ.நா., அமைப்பினர் தான் அங்கு செல்கின்றனர்.நாங்கள் வருகிறோம் என தெரிவிக்கப்பட்டதும் அவர்கள் ஓடோடி வந்து பார்த்தனர். தங்களை சொந்த இடத்திற்கு அழைத்துச் செல்ல வேண்டும் என்ற கோரிக்கையை மட்டும் தந்தனர். திருமாவளவன் சில முகாம்களுக்கு சென்று பார்க்க வேண்டும் என்றார்.அவர் விரும்பிய முகாம்களுக்கும் சென்று பார்த்தோம். சாப்பாட்டிற்கும், மருத்துவத்திற்கும் குறையில்லை. எட்டு முகாம்களில் 121 டாக்டர்கள் பணியாற்றுகின்றனர். மாணவ, மாணவியர் 58 ஆயிரம் பேர் கல்வி பயில்கின்றனர். ஆசிரியர்கள் இரண்டாயிரம் பேர் உள்ளனர்.அனைத்துக் கட்சி எம்.பி.,க்களை ஏன் அழைத்து செல்லவில்லை என எதிர்க்கட்சித் தலைவர்கள் குறை கூறியிருப்பது பற்றி?அந்தந்த கட்சிகளின் சொந்த செலவில் தான் நாங்கள் சென்று வந்தோம். வேண்டுமென்றால் எதிர்க்கட்சிகளும் தங்களது சொந்த செலவில் சென்று பார்க்க வேண்டியது தானே. படகில் செல்வோம் என பரபரப்பாக பேசினர். இப்போது விமானத்தில் பறந்து சென்று பார்க்க வேண்டியது தானே.இவ்வாறு கே.எஸ்.அழகிரி கூறினார்.

Source: http://www.dinamalar.com

இந்தோனேஷியாவில் அடைக்கலம் கேட்டு இலங்கை தமிழ் சிறுமி கெஞ்சல்

ஆஸ்திரேலியாவில் தஞ்சம் அடைய படகில் சென்று கொண்டிருந்த 260 இலங்கை தமிழர்கள் இந்தோனேஷிய கடற்படை அதிகாரிகளால் மடக்கி பிடித்து கைது செய்யப்பட்டனர். அவர்களில் பிருந்தா என்ற 9 வயது சிறுமியும் இருந்தாள். இவள் இந்தோனேஷிய அதிகாரிகளிடம் கெஞ்சி மன்றாடும் வீடியோ காட்சிகள் ஆஸ்திரேலிய டெலிவிஷனில் ஒளிபரப்பாகியது.

தயவு செய்து எங்களுக்கு உதவுங்கள், எங்கள் உயிர்களை பாதுகாக்க உதவுங்கள் நாங்கள் உங்கள் குழந்தைகள் எங்களை பற்றி சிந்தியுங்கள்.

எங்களது உயிர்களுக்கு பாதுகாப்பளித்து அடைக்கலம் தாருங்கள். எங்களை ஏதாவது ஒரு நாட்டுக்கு அனுப்பி விடுங்கள் ஆஸ்திரேலியாவுக்கு அனுப்பா விட்டாலும் பரவாயில்லை நாங்கள் இனி இலங்கையில் வாழ முடியாது.

இவ்வாறு அந்த சிறுமி கெஞ்சினாள். எங்களுக்கு தயவு காட்டுங்கள் என அந்த சிறுமி அதிகாரிகளிடம் மன்றாடிய காட்சி நெஞ்சை உருக்குவதாக இருந்தது.
விடுதலைப்புலிகள் தோற்கடிக்கப்பட்ட பின்னர் இலங்கையில் தமிழர்கள் வாழ்வது மிகவும் ஆபத்தாக மாறி விட்டது எனக் கூறி இவர்கள் அனைவரும் ஆஸ்தி ரேலியாவுக்கு புறப்பட்டனர் என்பது குறிப்பிடத்தக்கது.

Source: http://www.maalaimalar.com

இலங்கையில் பட்டினி, சித்ரவதை, கொலை புகார்கள் உண்மையா?. முகாம்களில் தமிழக குழு பார்த்தது என்ன?

சென்னை, : இலங்கையில் உள்நாட்டு யுத்தம் முடிவுக்கு வந்தபின், முகாம்களில் தங்க வைக்கப்பட்டுள்ள 2 லட்சத்துக்கு மேலான தமிழர்கள் பற்றி வெவ்வேறு தகவல்கள் ஊடகங்களில் வந்த வண்ணம் இருந்தன. இரும்பு வேலிக்குள் தமிழர்கள் மிருகங்களை போல் அடைத்து வைக்கப்பட்டு, பட்டினி போட்டு சித்திரவதை செய்யப்படுவதாகவும், பெண்கள் பாலியல் வன்முறைக்கு ஆளாக்கப்படுவதாகவும், அப்பாவிகள் புலி ஆதரவாளர்கள் என்ற முத்திரை குத்தி கொன்று புதைக்கப்படுவதாகவும் பல பத்திரிகைகள் செய்திக் கட்டுரைகள் வெளியிட்டன. அந்த தகவல்களில் எந்த அளவில் உண்மை இருந்தது என்பதை அங்கு சென்று திரும்பியுள்ள நாடாளுமன்ற உறுப்பினர்கள் இப்போது ஆதாரபூர்வமாக தெரிந்துகொண்டிருக்கிறார்கள். ‘‘சில கட்சிகளும் அமைப்புகளும் தொடர்ந்து சொல்லி வந்தது போன்று மிகவும் பயங்கரமான சம்பவங்கள் எதுவும் அங்கு நடைபெறுவதாக தெரியவில்லை. முகாம்களில் இருக்கும் மக்களே கூட தங்கள் ஊருக்கு திரும்பிச் செல்ல வேண்டும் என்ற விருப்பத்தை வலியுறுத்தினார்களே தவிர கொடூரமான சம்பவங்கள் நடப்பதாகவோ தாங்கள் சித்திரவதை செய்யப்படுவதாகவோ புகார் தெரிவிக்கவில்லை. ராணுவத்தால் அழிக்கப்பட்ட இயக்கத்தின் ஆதரவாளர்களாக தோன்றும் சிலர் மட்டுமே, ‘இங்கு சண்டை உச்ச கட்டத்தை அடைந்தபோதே இந்தியா தலையிட்டு நிறுத்தியிருக்க வேண்டும்; அதை செய்யாமல் விட்டது பெரும் தவறு. அதனால் அரசின் கொடுமை தொடர்கிறது’ என்று கூறினர். முகாம் தமிழர்கள் நிலை குறித்தும், இலங்கை அரசின் நிலைப்பாடு என்ன என்பதை அறிந்து கொள்ளவும் இந்த பயணம் நிச்சயமாக உதவியது’’ என்று குழுவில் இடம் பெற்றிருந்த சில உறுப்பினர்கள் தெரிவித்தனர். குழு செல்வதற்கு முன்பே, அவர்களது பயணத் திட்டமும் தயாரானது. ஆனால், எந்தெந்த முகாம்களுக்கு செல்வது, யாரையெல்லாம் சந்திப்பது என்ற நிகழ்ச்சி அட்டவணை எதுவும் முன்கூட்டியே இலங்கை அரசுக்கு தெரிவிக்கப்படவில்லை. விடுதலைப் புலிகளின் ஆதரவு இயக்கமான தமிழ் தேசிய கூட்டமைப்பு எம்பிக்களை தான் இக்குழுவினர் முதலில் சந்தித்தனர். ஆர்.சம்மந்தன் தலைமையிலான 9 எம்பிக்களிடம் பேசியபோது, ‘முகாம்களில் இருந்த 20 ஆயிரம் பேரை காணவில்லை. கண்ணிவெடிகளை அகற்றிய பிறகு மக்களை ஊர் திரும்ப அனுமதிக்கிறோம் என அரசு சொல்வதெல்லாம் கட்டுக்கதை’ என்று அவர்கள் கூறியுள்ளனர். அதே நேரம் எந்தெந்த முகாம்களை குழு நேரில் சென்று பார்வையிட்டால் உண்மையை அறிந்துகொள்ளலாம் என்ற பட்டியலையும் அவர்களே கொடுத்துள்ளனர். குழுவினரும் அந்த தகவலின்படியே முகாம்களுக்கு சென்று பார்த்துள்ளனர். புலி ஆதரவு இயக்கத்தினர் தெரிவித்த தகவல்கள் பற்றி புலிகளுக்கு எதிரான அமைப்புகளை சேர்ந்த சித்தார்த்தன் (பிளாட்), ஸ்ரீதரன் (ஈபிஆர்எல்எப்), கிழக்கு மாகாண முதல்வர் பிள்ளையான் ஆகியோரிடம் தமிழக குழுவினர் விசாரித்தபோது, ‘‘போருக்கு பிறகு யாரும் கொல்லப்படவில்லை; முகாம்களில் வந்து சேர்ந்திருக்கும் இளைஞர்களை தனியாக பிரித்து அவர்களில் புலிகள் யாரும் இருக்கிறார்களா என்று சோதிக்கிறார்கள். முகவரியை கேட்கின்றனர். அது தவறான முகவரி என்று தெரிய வந்தால் அங்கிருந்து வெளியேற்றி வேறு முகாமுக்கு மாற்றுகின்றனர். அப்படி 12,000 பேர் அடைக்கப்பட்டுள்ளனர். பின்னர் அவர்களில் 2000 பேர் சரியான முகவரியை கொடுத்த பிறகு விடுவிக்கப்பட்டனர்’’ என்று தெரிவித்துள்ளனர். இலங்கை முஸ்லிம் காங்கிரஸ் தலைவர் ரவூல் ஹக்கீம் தலைமையிலான நிர்வாகிகள், ‘‘ஒரு தரப்பான தகவல்கள் இலங்கைக்கு வெளியே பரவுவதால் தவறான கருத்து உருவாகிறது. இந்த வேறுபாடுகளை தாண்டி இங்குள்ள தமிழர்களை ஒருங்கிணைத்தால் வலுவான ஓட்டு வங்கியாக மாறி அரசியல்ரீதியாக பலன் அடையலாம். அதற்கு இந்தியா முயற்சி செய்யலாம்’’ என்று யோசனை தெரிவித்துள்ளனர். தமிழ் பிரதிநிதிகளை எல்லாம் சந்தித்த பிறகு அரசு அதிகாரிகளை குழுவினர் சந்தித்துள்ளனர். முதல் 3 முகாம்களை மட்டும் பார்வையிட ஏற்பாடு செய்திருந்த அதிகாரிகளிடம், எல்லா முகாம்களையும் பார்க்க வேண்டும் என்று வலியுறுத்திய போது அவர்கள் ஆட்சேபிக்கவில்லை. ‘‘நீங்கள் எங்கே வேண்டுமானாலும் போகலாம்; யாரையும் சந்திக்கலாம். உங்களுக்கு தேவையான பாதுகாப்பு ஏற்பாடுகளை செய்வது மட்டும்தான் எங்கள் பொறுப்பு’’ என்று இலங்கை ராணுவ கமாண்டரும், மாவட்ட பெண் கலெக்டரும் தெளிவுபடுத்தியுள்ளனர். குழுவில் இடம்பெற்ற காங்கிரஸ் உறுப்பினர் கே.எஸ்.அழகிரி, ‘‘அந்த மக்களுக்கு தேவையான வசதிகள் ஐ.நா. அதிகாரிகளின் மேற்பார்வையில் சிறப்பாகவே செய்து தரப்படுகின்றன. தண்ணீருக்கும் பால் பவுடருக்கும் தட்டுப்பாடு இருப்பது உண்மைதான்’’ என்றார். மேலும் அவர் கூறுகையில், ‘‘வவுனியாவில் செட்டிகுளம் என்ற பகுதியில் அடர்ந்த காட்டில் 3000 ஏக்கரில் முகாம் அமைக்கப்பட்டுள்ளது. இதற்காக பெரிய மரங்களை வெட்டியுள்ளனர். ஐ.நா. பிரநிதிகள் பராமரிப்பில் தான் முகாம்கள் உள்ளன. ரேஷன் பொருட்களை வழங்குவது மட்டுமே இலங்கை அரசின் பொறுப்பு. அதுவும் மலை போல் வந்து குவிந்துள்ளது. சுனாமியின் போது தமிழகத்திற்கு வந்து குவிந்தது போல் பொருட்கள் வந்துள்ளன. இதனால், இலங்கை அரசுக்கு பெரிய சிரமம் இல்லை. முகாம் நிலவரம் பற்றி ஐநா பிரதிநிதிகளிடம் விசாரித்தோம். அவ்வளவு பேருக்கு கழிப்பிட வசதி போதாது என்றாலும், காட்டுப் பகுதி என்பதால் அதை பெரிய குறையாக யாரும் கூறவில்லை. 26 கி.மீ. தொலைவில் உள்ள ஆற்றில் இருந்து தண்ணீர் கொண்டு வரப்படுகிறது. ஒரு நபருக்கு ஒரு நாளைக்கு 10 லிட்டர் கிடைக்கிறது. இன்னொரு லைன் போடப்படுகிறது. முகாம்களில் பள்ளிகள் செயல்படுகின்றன.58 ஆயிரம் மாணவர்கள் படிக்கின்றனர். 2000 தமிழ் ஆசிரியர்கள் உள்ளனர். 220 தமிழ் டாக்டர்களுடன் மருத்துவமனையும் நடக்கிறது. வீடு திரும்ப வேண்டும் என்பதை தவிர வேறெந்த குறையும் சொல்லவில்லை’’ என்றார். தமிழர் பகுதிகளில் சிங்களர்களை குடியமர்த்தும் திட்டத்துடன்தான் கண்ணி வெடிகளின் பெயரால் அரசு தாமதம் செய்கிறது என்று கூறப்படுவது பற்றி அதிபர் ராஜபக்சேவை எம்.பிக்கள் சந்தித்தபோது கவலையுடன் விசாரித்தனர். திட்டவட்டமாக அந்த தகவலை மறுத்த ராஜபக்சே, ‘‘தமிழர்களின் பகுதிகளில் தமிழர்கள் மட்டுமே குடியமர்த்தப்படுவார்கள். முகாம்களுக்கு வராமல் பலர் வெளியிடங்களுக்கு சென்று விட்டனர். திரும்பி வரும்போது அவர்களும் அவரவர் இடங்களில் குடியமர்த்தப்படுவார்கள். அந்தந்த பகுதிகளில் வசித்தவர்களை தவிர வேறு எவரும் குடிபுக அனுமதிக்க மாட்டோம்’’ என்று தமிழக குழுவிடம் உறுதி கூறியுள்ளார்.

Source : http://www.dinakaran.com/

ஈழத் தமிழர்கள் இனி என்ன செய்ய வேண்டும்? உலகம் முழுவதும் கருத்துக்கணிப்பு

வாஷிங்டன், அக். 15-
தமிழர்களுக்கான ஒபாமா என்றொரு அரசியல் அமைப்பு அமெரிக்காவில் இயங்கி வருகிறது. இந்த அமைப்பு சார்பில், ஈழத்தமிழர்கள் இனி என்ன செய்ய வேண்டும்? என்று ஒரு கருத்துக்கணிப்பு நடந்து வருகிறது.

இக்கருத்துக்கணிப்புக்கான ஓட்டுப்பதிவு புதினம் இணையத்தளம் மூலம் நடந்து வருகிறது. நேற்று இந்த கருத்துக்கணிப்பு தொடங்கியது. அடுத்த மாதம் (நவம்பர்) 4-ந்தேதி வரை இந்த கருத்துக்கணிப்பு நடைபெறும்.

உலகம் முழுவதும் உள்ள ஈழத்தமிழர்கள் இதில் பங்கேற்று பதில் அளிக்க வேண்டுகோள் விடப்பட்டுள்ளது. கருத்துக்கணிப்பில் மொத்தம் 7 கேள்விகள் கேட்கப்பட்டுள்ளன.

ஈழத் தமிழர்களுக்காக ஒரு அரசாங்கத்தை உருவாக்க வேண்டுமா? அது நாடு கடந்த அரசாக இருக்க வேண்டுமா? அல்லது புகலிட அரசாக இருக்க வேண்டுமா?

நாம் உருவாக்கும் அரசு தற்காலிகமாக எந்த நாட்டில் இருந்து செயல்பட வேண்டும்? ஈழத்தமிழர்களின் செயல்பாடுகளில் மாற்றம் வேண்டுமா? தமிழர்களின் இறுதியான நோக்கம் என்னவாக இருக்க வேண்டும்? என்பது உள்பட 7 கேள்விகள் கேட்கப்பட்டுள்ளன.

இதில் கலந்து கொண்டு கருத்துக்களை தெரிவிக்க விரும்பும் ஈழத்தமிழர்கள் http://www.tamilsforobama.com/ என்ற இணையத்தளத்தில் சென்று பார்க்கலாம்.

Source: http://www.maalaimalar.com/

தோட்டத் தொழிலாளர்களுடன் எம்.பி.,க்கள் குழு சந்திப்பு

கொழும்பு : இலங்கை சென்றுள்ள தமிழக எம்.பி.,க்கள் குழுவினர் நேற்று, நுவாரா எலியா மற்றும் ஹட்டன் நகரத்திற்குச் சென்று, அங்குள்ள தோட்டத் தொழிலாளர்களைச் சந்தித்துப் பேசினர். இலங்கையில் முகாம்களில் தங்க வைக்கப்பட்டுள்ள தமிழர்களின் நிலையை நேரில் அறிந்து வர, தமிழக எம்.பி.,க்கள் குழு, ஐந்துநாள் பயணமாக கொழும்பு சென்றுள்ளது. இந்தக் குழுவினர் நேற்றுமுன்தினம் யாழ்ப்பாணம் மற்றும் வவுனியா பகுதிகளுக்கு சென்று பார்வையிட்டனர்.
இந்நிலையில், நேற்று இலங்கையில் தேயிலை பயிரிடும் முக்கிய பகுதியான, அந்நாட்டின் மத்திய மகாணத்தில் அமைந்துள்ள நுவாரா எலியா பகுதிக்கு சென்றனர். அங்குள்ள இந்திய வம்சாவளி தோட்டத் தொழிலாளர்களைச் சந்தித்துப் பேசினர். அவர்களின் வாழ்க்கை நிலவரம் பற்றி கேட்டறிந்தனர். இங்கு பணிபுரியும் தோட்டத் தொழிலாளர்கள் எல்லாம் 19வது நூற்றாண்டில் ஆங்கிலேயர்களால் இந்தியாவில் இருந்து அழைத்து வரப்பட்டவர்கள். நுவாரா எலியாவைப் பார்வையிட்ட பின், சிறிய நகரமான ஹட்டனுக்கு சென்ற எம்.பி.,க்கள் குழுவினர், அங்குள்ள தொண்டைமான் தொழிற்கல்வி மையத்திற்கு சென்று பார்வையிட்டனர். இந்த மையம் தோட்டத் தொழிலில் உள்ளவர்களுக்கு பயிற்சி வழங்கி வருகிறது. இலங்கை முன்னாள் பிரதமரும், எதிர்க்கட்சித் தலைவருமான ரணில் விக்கிரமசிங்கேயையும் மற்றும் சில எதிர்க்கட்சித் தலைவர்களையும் தமிழக எம்.பி.,க்கள் குழுவினர் இன்று சந்தித்துப் பேசுகின்றனர்.

www.dinamalar.com

தினமலர் பேப்பரில் இதை படித்தேன் - இது உண்மையா

புலிகள் போர்ப்படையில் தளபதியாக 22 ஆண்டுகள் இருந்து பிரபாகரனோடு ஏற்பட்ட மோதலால் வெளியேறி, தமிழ் மக்கள் விடுதலைப் புலிகள் என்ற இயக்கத்தை உருவாக்கிய கருணா அம்மான், தினமலர் இதழுக்கு அளித்த பேட்டி தொடர்ச்சி... நார்வேயில் நடந்த பேச்சுவார்த்தையில், ஓர் அமைதி ஒப்பந் தத்தை, "பரிசீலிக்கிறோம்' என, கையெழுத்திட்டு, ஒப்பந்தத்தைக் கொண்டு வந்து 2003ம் ஆண்டு மார்ச் மாதம் பிரபாகரனிடம் கொடுத் தோம். உடனே அதைத் தூக்கி வீசி எறிந்தார். "போராட்டத்தை விற்றுவிட்டு வந்து நிற்கிறீர்கள்' என்று, கத்தினார். "ஆச்சடா போச்சடா' என்று சத்தம் போட்டார்.நான் சொன்னேன், நீங்கள் சொல்வது போல் இல்லை. போர்க்களத்தில் நான் தான் நிற்கிறேன். ஆயிரக்கணக்கில் ராணுவத்தைக் கொன்று குவித்துள்ளோம். போராளிகளும் மடிந்து போகின்றனர்.
ஆனால் மாற்றம் வந்துள்ளதா; வராது. போராளிகள் நம்பிக்கை இழந்து போகின்றனர். நாங்கள் எத்தனை பேரைக் கொன்றாலும், ராணுவமும் கொன்றுகொண்டுதான் இருக்கும்.ஏனென்றால் அது ஒரு நாடு; நாட்டை எதிர்த்து போராடுகிறோம். உலகில் ஒரு நாடும் நம்மை அங்கீகரிக்கவில்லை. இந்தியாவின் ஆதரவும் இல்லை. அப்படியே ஆதரித்தாலும், பிரிவினை செய்து தனிநாடாக, இந்தியா ஒரு போதும் அனுமதிக்காது என, பிரபாகரனிடம் கூறினேன்.இந்த சூழ்நிலையில் தான், பெடரல் மாதிரி ஓர் அமைப்பை ஏற்படுத்த வேண்டும் என்று நாங்கள் விரும்பினோம்.
இதற்காக, சுவிட்சர்லாந்தில் தங்கியிருந்து அந்த நாட்டின் அரசின் மாதிரியை படித்தோம். அதே போல் ஓர் அமைப்பை இலங்கையில் கொண்டு வரவேண்டும் என்று தான் விரும்பினோம்.அதன் அடிப்படையில் தான், ஒப்பந்தத்தில் கையெழுத்துப்போட துணிந்தோம். அது இந்த மனிதருக்கு விளங்கவில்லை. உடனே, பிரிவின் பொறுப்பாளர்களைக் கூப்பிட்டார் பிரபாகரன். "இவன் போராட்டத்தை விற்று வந்திருக்கிறான். எனக்கு துரோகம் செய்துவிட்டான்' என்று கூறினார்.
அந்த சூழ்நிலையை எப்படி சமாளித்தீர்கள்?
நான் போர்ச்சூழலை விளக்கினேன்; போராளிகளின் மனநிலையைச் சொன்னேன். அதுவரை 14 ஆயிரத்து 500 போராளிகள் மடிந்திருந்ததைச் சொன்னேன். இனி இவர்கள் என்ன நடவடிக்கை எடுப்பார்கள் என்பது எனக்குத் தெரியும். நான் தந்திரமாக நடந்து கொண்டேன்.நான் நேராக மட்டக்களப்பு படைப் பிரிவுக்கு சென்று விட்டேன். அங்கு 6,000 போராளிகள் இருந்தனர். மறுநாள் கிளிநொச்சிப் பகுதிக்கு, 2,000 போராளிகளை அனுப்பச் சொன்னார்கள். நான் மறுத்துவிட்டேன். நான் சண்டையை விரும் பவில்லை; போராளிகளை அனுப்ப மாட்டேன் என்று கூறிவிட்டேன்.
அப்போது, கிழக்கு மாகாணத்தில் இருந்த போராளிகள் மனநிலை எப்படி இருந்தது?
இங்கே முக்கியமாக ஒன்றை சொல்ல வேண்டும். இரண்டு மாகாணங்களுக்கும் இடையே பெரிய இடைவெளி இருந்தது. மட்டக்களப்பு பகுதியில் படை பலம் அதிகம். யாழ்ப்பாணம் பகுதியில் பணபலம் அதிகம். மட்டக்களப்பு பகுதி தான் படையில் பலமாக இருந்தது. வடக்குப் பகுதியில் இருந்த தமிழர்களிடம் ஒரு ஆளை போராளியாக்க வேண்டும் என்று கேட்டால், 20 லட்சம் ரூபாய் பணத்தைக் கொடுத்து சமாளித்து விடுவார்கள்.அந்த வீட்டில் உள்ளவரை உடனே ரகசியமாக புறவாசல் வழியாக வெளிநாட்டுக்கு அனுப்பிவிடுவார்கள். இதுதான் நடந்து கொண்டிருந்தது. அதுவரை போரில் மடிந்த போராளிகளில் 8,000 பேர் கிழக்கு மாகாணத்தைச் சேர்ந்தவர்கள். வடக்கு மாகாணத்தில் மக்கள் தொகை அதிகம்; கிழக்கு மாகாணத்தில் குறைவு.
ஆனால், படைப்பிரிவில் கிழக்கு மாகாண போராளிகள் தான் அதிகம் இருந்தனர். முஸ்லிம்கள் இதில் அடக்கமில்லை.படைப்பிரிவில் இருந்த இந்த முரண்கள் போராளிகளிடமும், பொதுமக்களிடம் அவ்வப்போது முணுமுணுப்பாக வெளிப்பட்டிருந்தது. இந்த விஷயத்தை எடுத்துச் சொல்லி, 2,000 போராளிகளை கிளிநொச்சிக்கு அனுப்ப முடியாது என்று சொல்லிவிட்டேன். அப்போது தான், பிரபாகரன் உத்தரவை முதன்முறையாக, நான் மீறினேன்.
அப்போதை சூழ்நிலை எப்படி இருந்தது?
உடனே என்னை தலைமையகத்துக்கு அழைத்தனர். உடனடியாக வரவேண்டும் என்றனர்; நான் மறுத்துவிட்டேன். அங்கு போனால் என்ன நடக்கும் என்று எனக்குத் தெரியும். சுட்டுத்தான் போடுவார்கள். எனவே, சண்டையில் விருப்பமில்லை என்று கூறிவிட்டேன். அப்போது நான் மிகவும் நிதானமாக செயல்பட்டேன்.ஏற்கனவே இது போன்ற அனுபவம் ஒன்று இருந்தது. இந்தியப் படை வெளியேறிய போது, தமிழர்களுக்கான படை (டி.என்.ஏ.,) ஒன்று அமைக்கப்பட்டது. அந்த படையில் இருந்த தமிழ் இளைஞர்கள் 1,200 பேரை 18 நாளில் நாங்கள் கொன்று குவித்தோம். அது வீரமான செயல் அல்ல என்று எனக்குத் தெரியும்.அவசரப்பட்டால் அதேப்போன்று ஓர் நிலை ஏற்படும் என்பதும் எனக்குத் தெரியும். அதனால் நிதானமாக செயல்பட்டேன்.
மீண்டும் நாகரிகமற்ற முறையில் எங்களுக்கு நாங்களே மோதிக் கொண்டு, எங்கள் ரத்தத்தையே ஆறாக ஓடவிடுவதில் எனக்கு விருப்பம் இல்லை.போராளிகளுடன் கலந்து பேசினேன். கிழக்கு மாகாணத்தில் போராளிப் படைப் பிரிவைக் கலைத்து விடுவது என்று முடிவு செய்து பிரபாகரனுக்கு தெரிவித்தோம். உடனடியாக 6,000 போராளிகளையும் வீட்டுக்குப் போகச் சொல்லி விட்டேன். அவர்கள் அனைவரும் புலிகளின் இயக்கத்தை விட்டு வெளியேறி விட்டனர். படைப் பிரிவு கலைக்கப்பட்டுவிட்டது.
கடைசியாக பிரபாகரனுக்கு ஒரு கடிதம் எழுதினேன். படைப்பிரிவு கலைக்கப்பட்டு விட்டது. கலைத்தது நான்தான். எனவே போராளிகள் யாருடனும் மோதலில் ஈடுபடவேண்டாம். அப்படி மோதுவதானால் என்னுடன் மோதுங்கள்.நான் இதற்கு காரணமான ஆள். இவ்வாறு கடிதத்தில் எழுதியிருந்தேன். 2003ம் ஆண்டு சித்திரை மாதம் இது நடந்தது. அதன்பின் நாங்களும் படைப்பிரிவின் முக்கியஸ்தர்களும் வெளிநாடு சென்றுவிட்டோம்.
அத்துடன் பிரச்னை முடிந்ததா?
முடியவில்லை. வடக்கு மாகாண போராளிகளைக் கொண்டு, கிழக்கு மாகாணத்தில் போர் தொடுக்க வைத்தார் பிரபாகரன். சொந்த நாட்டு மக்களையே, அன்னியர்கள் போல் பாவித்து கொலை செய்ய உத்தரவிட்டார். இந்த வெறியாட்டத்தில் கிழக்கு மாகாணத்தைச் சேர்ந்த 520 பேர், வடக்கு மாகாணத்தைச் சேர்ந்த புலிகளால் கொல்லப்பட்டனர். அப்போது மிகவும் வேதனை அடைந்தேன்.மக்களை விட்டுவிட்டு வந்திருக்கக் கூடாதோ என்று நினைத் தேன். அந்த சூழ்நிலையில் அடுத்தக் கட்டமாக என்ன நடவடிக்கை எடுப்பது என்று யோசித்தோம். புலிகளிடம் இருந்து எங்கள் பகுதி மக்களை காக்க வேண்டிய கட்டாயம் இருந்தது.
இந்த சூழ்நிலையில் தான் இலங்கை அரசுடன் சேர்ந்தீர்களா?
இலங்கை அரசு எங்களை அழைத்தது. பேச்சுவார்த்தை நடத்தியது. அப்போது புலிகளிடம் இருந்து எங்கள் பகுதி மக்களை காப்பது பற்றி கேட்டோம். ஆயுதங்களை கீழேப் போடுவது பற்றி பேசினோம். கிழக்கு மாகாணத்தில் இலங்கை-இந்திய ஒப்பந்த அடைப்படையில் தீர்வு காண விரும்பித்தான் பேசினோம். ஆயுதப் போராட்டத்தை கைவிட விரும்பினோம்.அதன்பின் தேர்தல் நடத்தப்பட் டது. எங்கள் கட்சியைச் சேர்ந்தவர்கள் வெற்றி பெற்றனர். முதல்வர் பதவியை பிடித்துள்ளோம். உள்ளாட்சித் தேர்தல்கள் நடத்தப்பட்டுள்ளன. அதிலும் எங்கள் கட்சியைச் சேர்ந்தவர்கள் வெற்றி பெற்றுள்ளனர்.
கிழக்கு மாகாண முதல்வர் பிள்ளையான், உங்கள் கட்சியைச் சேர்ந்தவர். அவருடன் முரண்பாடு ஏற்பட்டுள்ளதாகக் கூறப்படுகிறதே?
இல்லை. இப்படித் தவறான தகவல் பரப்பப்படுகிறது. கிழக்கு மாகாணத்தில் தமிழர், சிங்களர், முஸ்லிம்கள் அதிகமாக வசிக்கின்றனர். அவர்கள் சார்ந்து வாழ வேண்டிய அவசியம் உள்ளது. இதற்கு தேவையான சூழ்நிலையை ஏற்படுத்துவதற்கு நாங்கள் முயற்சி செய்து வருகிறோம். இந்த நிலைமையை விரும்பாத சிலர், இது போன்ற தவறான தகவல்களை பரப்பி வருகின்றனர்.
கிழக்கு மாகாணத்தில் நிலைமை எப்படி இருக்கிறது?
அங்கு வளர்ச்சிப் பணிகள் நடந்து கொண்டிருக்கின்றன. மக்கள் சுபிட்சமாக வாழ தேவையான வளர்ச்சிக்கான திட்டங்களை அரசிடம் வலியுறுத்தி வருகிறோம். அரசு தரும் திட்டங்களை செயல்படுத்தி வருகிறோம். தொழில் வளர்ச்சிக்கு தேவையான நடவடிக்கைகளை எடுத்து வருகிறோம்.
அங்கு வன்முறை சம்பவங்கள் தொடர்கிறதா?
நான் லண்டனில் இருந்த போது சில சம்பவங்கள் நடந்தன. நான் இங்கு வந்தவுடனே, அது போன்ற சம்பவங்கள் இனி நடக்காமல் தடுக்க தேவையான நடவடிக்கைகளை எடுத்தோம். தமிழர் - முஸ்லிம் நட்புறவு அமைப்புகள் ஏற்படுத்தப்பட்டுள்ளன. கிராம ரீதியாக அமைப்புகள் ஏற்படுத்தப்பட்டு, பிரச்னைகளை பேசித் தீர்த்துக் கொள்ள கவுன்சிலிங் செய்து வருகிறோம். வன்முறைகளை தடுக்க எந்தெந்த வழிகளில் முடியுமோ அத்தனை வழிகளையும் கையாண்டு வருகிறோம்.
தமிழர் - சிங்களர்களிடையே குரோதம் குறைந்துள்ளதா?
குரோதத்தை வளர்த்ததே அரசியல் தலைவர்கள்தானே. வெறுப்புணர்வுகளை களையும் வகையில் பல செயல்பாடுகள் நடக்கின்றன. கிழக்கு மாகாண மக்களுக்கு பிரபாகரன் என்ற ஆளைத் தெரியாது. அவர் கிழக்கு பகுதிக்கு வந்ததும் இல்லை. அந்த ஆளை, கிழக்கு பகுதி தமிழ் மக்களுக்கு அறிமுகம் செய்தவன் நான்தானே. இப்போது, எங்களுடைய மக்களிடம், "பிரபாகரன் என்ற ஆளை தூக்கி எறியுங்கள். நாம் இலங்கை என்ற நாட்டில் வாழ்கிறோம். இது நமது நாடு. இது நமது ராணுவம். தேசிய அளவில் நாம் விட்டுக்கொடுத்து, இணக்கமாக வாழ வேண்டும்' என்று வலியுறுத்தி வருகிறேன். "பிரச்னைகளை நமக்குள் பேசித் தீர்க்க வேண்டும்' என்றும் கூறி வருகிறேன்.
விடுதலைப் புலிகளுடனான இலங்கை ராணுவத்தின் போர் உச்சக்கட்ட நிலையில் உள்ளதே?
இலங்கை ராணுவம் புலிகள் பரப்பளவை சுருக்கி வருகிறது. புலிகள் ஓடிக் கொண்டே இருக்கின்றனர். நான் படைப்பிரிவில் இருந்து வெளியேறிய பின் போர்முனையில் புலிகளுக்கு எந்த வெற்றியும் கிடைக்கவில்லை. கிழக்கு மாகாணத்தில் இருந்து விரட்டப்பட்ட அவர்கள், இப்போது வடக்கு மாகாணத்திலும் முற்றிலும் ஒடுக்கப்பட்டுள்ளனர். முல்லைத்தீவு பகுதியை ராணுவம் நெருங்கிவிட்டது.
இந்த நிலை ஏற்படும் என்று எங்களுக்கு அப்போதே தெரியும். நாங்கள் சொன்னபோதே சமாதான ஒப்பந்தத்துக்கு பிரபாகரன் சம்மதித்திருந்தால் இப்போதைய நிலை ஏற்பட்டிருக்காது. தோல்வியடையாமல், பிரச்னைக்கு தீர்வு கண்டிருக்கலாம். பொதுமக்களும் கொல்லப்பட்டிருக்க மாட்டார்கள். 5000க்கும் மேற்பட்ட பொதுமக்கள் இப்போதைய போரில் மடிந்திருக்கின்றனர். இதற்கெல்லாம் காரணம் பிரபாகரன் தான். பிரபாகரனின் பிடிவாதத்தால், புலிகள் இயக்கம் பயங்கரவாத இயக்கம் என்ற பெயரை மட்டும்தான் பெற முடிந்தது.
இந்த சூழ்நிலையில் பிரபாகரனின் வியூகம் எப்படி இருக்கும்?
புலிகளின் கடைசி நகரம் கிளிநொச்சி தான். அங்கு 80 ஆயிரம் பேர் வசித்தனர். அதை ராணுவம் பிடித்து விட்டது. இந்த நகரை விடமாட்டோம் என்று பிரபாகரன் வெளிநாட்டில் பிரசாரம் செய்து வந்தார். அவரது வாய்ச்சவடால் தகர்க்கப்பட்டுள்ளது. புலிகளின் இயக்கம் 40 சதுர கி.மீ., பரப்பளவுக்குள் சுருக்கப்பட்டுவிட்டது.முல்லைத்தீவு தான் ராணுவத்தின் அடுத்த குறி. கடற்படை வீரர்கள் இப்போது வடக்கு கடல் பகுதியில் இருந்து நெருக்கி வருகின்றனர். இந்த சூழ்நிலையில் பிரபாகரன், அந்த பகுதியில் வசிக்கும் அப்பாவி பொதுமக்களை மனித கேடயங்களாக பயன்படுத்தி வருகிறார். அவர்களை பிடித்து வைத்துள்ளார். தப்ப முயன்றால் சுட்டு விடுவோம் என மிரட்டி வைத்திருக்கிறார். பொதுமக்கள் தப்ப முடியாமல் தவித்து வருகின்றனர்.
ராணுவ நடவடிக்கையில் பொதுமக்கள் பாதிக்கும் வாய்ப்பு இருக்கிறதே?
வாய்ப்பு உண்டு. ஆனால் கிழக்கு மாகாணமும் இதேப் போன்று ராணுவ கட்டுப்பாட்டுக்குள் கொண்டு வரப்பட்டது. அங்கும் பொதுமக்களை கேடயமாக புலிகள் பயன்படுத்தினர். ஆனால் பொதுமக்களுக்கு பாதுகாப்பு கொடுத்து, புலிகளை அடக்கியது ராணுவம். பொதுமக்களுக்கு தேவையான அனைத்து உதவிகளையும் ராணுவம் செய்தது. அதே போல்தான் இங்கும் நடக்கும். ஒரு விஷயத்தை புரிந்து கொள்ள வேண்டும். உலக நாடுகள் பலவும் புலிகள் இயக்கத்தை தடை செய்திருந்த போதும், இலங்கையில் அந்த இயக்கம் தடை செய்யப்படவில்லை.
சில நாட்களுக்கு முன்தான் தடை செய்யப்பட்டது. அப்படியானால், இலங்கை அரசு எவ்வளவு நிதானமாக நடந்து கொள்கிறது என்பதை புரிந்து கொள்ள வேண்டும்.பிரபாகரன் பிடியில் மனிதக் கேடயங்களாக உள்ள பொதுமக்கள் துணிந்து அங்கிருந்து வெளியேற வேண்டும். மட்டக் களப்பு மாவட்டத்தில் ராணுவ நடவடிக்கையின் போது, இதே போன்ற சூழ்நிலை ஏற்பட்டது. அப்போது 60 ஆயிரம் பொதுமக்கள் இதேப் போன்று வெளியேறினர். அவர்களை ராணுவம் பாதுகாத்தது. அனைவரும் புலிகள் என்று கூறி சுட்டு வீழ்த்திவிட வில்லை என்பதை புரிந்து கொள்ள வேண்டும்.
முல்லைத்தீவு பகுதியில் ராணுவ நடவடிக்கைகள் வெற்றியடையும் போது பிரபாகரன் நிலை என்னவாக இருக்கும்?
ராணுவம் இன்னும் சில நாட்களில் வெற்றியடையும் என்று அங்கிருந்து வரும் தகவலை வைத்து உறுதி செய்கிறேன். ராணுவம் வெற்றி யடையும் போது பிரபாகரனின் நிலை என்னவாகும் என்று சொல்ல முடியாது. உலக வரலாற்றில் பலரும் பிடிபட்டுள்ளனர். இவர் பிடிபடுவாரா அல்லது சயனைட் சாப்பிடுவாரா என்பதை உறுதி செய்ய முடியாது.பிரபாகரன் என்ற ஆள் வெளி உலகுக்கு தெரிவது போல் மனஉறுதி மிக்கவர் அல்ல. அவரை உறுதி மிக்க ஆளாக காட்டியது, போராளிகளின் தியாகம்தான். அவர் தஞ்சம் தேடி வெளிநாடுகளுக்கு போகவும் வாய்ப்பு உள்ளது.
புலிகள் இயக்க போராளிகள், சுற்றி வளைக்கப்படும் போது, தற்கொலை செய்யும் முடிவை எடுக்கிறார்களே?
இது பயிற்சி பெற்ற போராளிகள் எடுக்கும் முடிவு. ஆரம்ப காலத்தில் இருந்த பிரபாகரனும் சூழ்நிலைகளின் அடிப்படையில் இப்படிப்பட்ட முடிவை எடுக்கும் துணிச்சல் உள்ளவர்தான். பின்னர் அவரது வாழ்க்கை போக்கு மாறிவிட்டது. சொகுசு வாழ்க்கைக்கு வந்துவிட்டார். பல ஆயிரம் கோடி ரூபாய் பணம் வெளிநாட்டு வங்கிகளில் முதலீடு செய்யப்பட்டுள்ளது. இந்த பணத்தை வைத்து வெளிநாடுகளில் தஞ்சம் தேடத்தான் முயற்சிப்பாரே தவிர, வேறுவகையான முடிவை அவர் எடுப்பார் என்று எனக்கு தோன்றவில்லை.
தமிழ தலைவர்கள் சிலர் போர் நிறுத்தம் செய்ய வேண்டும் என்று கோரி வருகின்றனரே...
போர் நிறுத்தம் அவசியம்தான். பொதுமக்களை பாதுகாக்கத்தான் போர்நிறுத்தம் செய்ய வேண்டும்; பிரபாகரனைக் காப்பாற்ற அல்ல. போர் நிறுத்தம் அவசியம் என்றால், இந்த சூழ்நிலையில் பிரபாகரன் சரணடைய வேண்டியதுதானே. போர் நடவடிக்கைக்கு நான்தான் காரணம். அப்பாவி பொதுமக்கள் பாதிக் கப்படக் கூடாது என்றால் அவர் ராணுவத்திடம் சரணடைந்துவிடவேண்டியதுதானே. அவர் சரணடைந்தால், போர்நிறுத்தம் உடனடியாக அமலுக்கு வரும். இதை தமிழகத் தலைவர்கள் வலியுறுத்த வேண் டும். பிரபாகரனை ஒரு கதாநாயகனாக பார்ப்பதை நிறுத்த வேண்டும்.